1 John 3

Ilokano (Ti Biblia (1973))

← Chapter 2 Jump to: Chapter 4 →

1Kitaenyo no ania a kita ti ayat ti insagut cadatayo ti Ama, tapno managantay annac ti Dios, ket annacnatay ngarud. Gapu itoy ti lubong saannatay nga am-ammo, gapu ta isu saanna a naammoan.

2Ay-ayatec, ita annacnatay ti Dios; ket saan pay a maiparangarang no aniatayto; ammotayo nga no isu maiparangarangto, umaspingtayto kencuana, ta isu makitatayto cas ti kinaisuna.

3Ket isu-amin dagiti addaan itoy nga inanama kencuana, aggugor a cas isu nadalus.

4Isu-amin a macaaramid iti basol, aramidenna met ti maisallungasing iti linteg; ta ti basol isu ti panagsalungasing iti linteg.

5Ket ammoyo nga isu naiparangarang tapno iccatenna dagiti basbasol, ket awan basol kencuana.

6Siasinoman nga agtaeng kencuana saan nga agbasol; siasinoman nga agbasol, isu ti saanna a nakita, ket dina met naammoan.

7Annacco a dongdongngoen, dicay ituloc nga iyao-awannacayo ti uray siasino; ti agaramid iti kinalinteg, nalinteg, a cas met isu nalinteg.

8Ti agaramid iti basol cucua ti diablo, ta nanipud idi damo, ti diablo agbasbasol. Gapu itoy a panggep naiparangarang ti Anac ti Dios, tapno pucawenna dagiti ar-aramid ti diablo.

9Siasinoman a mabukel iti Dios, saan nga agbasol; ta ti bukelna a nadiosan agtaeng kencuana, ket isu saanna a mabalin ti agbasol agsipud ta nabukel iti Dios.

10Iti daytoy maiparangarang dagiti annac ti Dios ken dagiti annac ti diablo, siasinoman a saan nga agaramid ti kinalinteg, saan a tao ti Dios, uray ti di agayat ken cabsatna.

11Ta daytoy ti damag a nangngegyo nanipud idi punganay: Nga agayan-ayattayo coma:

12Saan a cas ken ni Cain nga iturayan ti dakes ket pinatayna ni cabsatna. Ket ania ti gapu a pinatayna? Agsipud ta dagidi ar-aramidna dakesda, ket dagiti ar-aramid ni cabsatna nalintegda.

13Dicay masdaaw, cacabsat, no guraennacayo ti lubong.

14Ammotayo nga immalistayo nanipud ken patay, agingga iti biag agsipud ta ayatentayo dagiti cacabsat; ti saan nga agayat, agtalinaed ken patay.

15Siasinoman a gumura ken cabsatna mangpapatay ket ammoyo nga awan ti manangpapatay nga adda biagna nga agnanayon, nga agtaeng kencuana.

16Itoy ti pacaammoantayo iti ayat agsipud ta isu intedna ti biagna a maipaay cadatayo; ket datayo rebbengtay nga ited dagiti biagtayo a maipaay cadagiti cacabsat.

17Ngem dayta agicut cadagiti sanicua daytoy a lubong, ket makitana ni cabsatna nga aglac-am iti pannacasapul, ket punitanna kencuana ti pusona, casano ti panagnaed ti ayat ti Dios kencuana?

18Annacco a dongdongngoen, saantay coma a pagayat ti sao ket saan met ti dila, no di ket ti aramid ken ti napudno.

19Itoy ti pacaammoantayo a taonatay ti pudno, ket pagtalgedentayo dagiti pusotayo iti sangoananna:

20Ta no ti pusotayo pabasolennatayo, ti Dios, dacdackel ngem iti pusotayo, ket isu ammona amin.

21Ayayaten, no ti pusotayo saannatay a pabasolen, adda panagtalectayo iti Dios;

22Ket isu-amin a dawatentayo, awatentayo kencuana; ta salimetmetantayo dagiti bilbilinna, ket aramidentayo dagiti banbanag a macaayayo cadagiti matana.

23Ket daytoy ti bilinna: A mamatitayo coma iti nagan ti Anacna, a Jesu-Cristo, ket agayan-ayattayo cas imbilinna cadatayo.

24Ket ti mangsalimetmet cadagiti bilbilinna, agtaeng kencuana, ket isu kencuana. Ket itoy ti pacaammoantayo nga isu agtaeng cadatayo, gapu iti Espiritu nga intedna cadatay.

← Chapter 2 Jump to: Chapter 4 →