2 John 1

Ilokano (Ti Biblia (1973))

Jump to:

1Ti panglacayen isuratna iti napili nga ina ken cadagiti annacna, isuda nga ayatec a pudno; ket saan laeng a siac, no di pay ket dagiti isu-amin a macaammo iti pudno:

2A gapu iti pudno nga agtaeng cadatayo, ket agyanto cadatayo iti agnanayon:

3Adda coma cadacayo ti parabur, asi ken talna, nga aggapu iti Dios Ama ken ni Jesu-Cristo, Anac ti Ama, iti pudno ken ayat.

4Agragsacac iti nalaus gapu ta nasaracac dagiti dadduma cadagiti annacmo, a magmagnada iti kinapudno, a cas met iti panangawattayo iti bilin ti Ama.

5Ket ita dawatec kenca, ina, saan a cas la isuratco kenca ti maysa a bilin a baro, no di daydi met laeng adda cadatayo nanipud idi damo, nga agayanayattayo coma.

6Ket daytoy ti ayat, a magmagnatayo coma cas mayannurot cadagiti bilbilinna. Daytoy ti bilin, cas iti nangngegyo nanipud idi punganay, a magmagnacayo coma kencuana.

7Ta adu dagiti mangalallilaw a limtuad ditoy lubong, a dida umanamong a ni Jesu-Cristo immay a naglasag. Dayta ti mangalallilaw ken isu ni anti-cristo.

8Igagayo dagiti bagbagiyo, tapno dicay coma mapucaw dagiti banbanag nga inaramidtayo, no di ket awatenyo coma ti maysa a gonggona a naananay.

9Siasinoman a gumundaway ket saan nga agtalinaed iti sursuro ni Cristo, awan ti Dios kencuana: ti agtalinaed iti sursuro, isu met laeng adda kencuana ti Ama ken ti Anac.

10No adda umay cadacayo, ket saanna nga itugot daytoy a sursuro, dicay awaten iti balayyo, ket dicay met cablaawan:

11Ta ti mangcablaaw kencuana, mairaman cadagiti dakes nga aramidna.

12Idinto nga adu a banbanag nga isuratco coma cadacayo, diac cayat nga aramaten ti papel ken tinta; ngem namnamaec ti umay cadacayo, ken agsaoac ti rupanrupa, tapno naananay coma ti rag-otayo.

13Dagiti annac ti napili a babai a cabsatmo cablaawandaca.

Jump to: