Esther 2

Ilokano (Ti Biblia (1973))

← Chapter 1 Jump to: Chapter 3 →

1Calpasan dagitoy, idi naglinac ti pungtot ni Asuero, nalagipna ni Vasti, ken no ania ti inaramidna, ken no ania ti naibilin a maibusor kencuana.

2Idin kinuna dagiti ad-adipen ti ari a nagannong kencuana, Mabiruc coma dagiti naimnas a virgen nga agtutubo a maipaay iti ari:

3Ket mangtuding coma ti ari cadagiti agturturay cadagiti amin a provincia ti pagarianna, nga urnongenda amin dagiti agtutubo a virgen idiay Susan a palacio, iti balay dagiti babbai, iti aywan ni Hegai nga agaywan iti siled ti ari, ti agbantay cadagiti babbai; ket dagiti aniaman a maipaay iti panaggugorda maited coma cadacuada;

4Ket ti balasang a macaay-ayo iti ari isu coma ti agreina iti saad ni Vasti. Ket ti banag inay-ayona ti ari; ket inaramidna ti casta.

5Adda idi maysa a Judio idiay Susan a palacio, a ti naganna Mardokeo, nga anac a lalaki ni Jair, nga anac a lalaki ni Simi, nga anac a lalaki ni Kis, a maysa a Benjamita.

6A naipan idi a naggapu iti Jerusalem a cadua dagiti nacayawan a naipan a cadua ni Jeconias nga ari ti Juda, nga impan ni Nabucodonosor nga ari ti Babilonia.

7Ket tinagibina ni Hadassa, nga isu, ni Ester, nga anac a babai ni ulitegna: ta ni Ester awan idi ti amana ken inana, ket ti balasang naimnas idi ken nalibnos; ket idi natay da amana ken inana, ni Mardokeo innalana a cas anacna a babai.

8Iti casta naaramid, idi a ti bilin ti ari ken ti pangngeddengna naiwarnac, ket idi a naurnong dagiti adu a babbalasang idiay Susan a palacio, iti aywan ni Hegai, a naala ni Ester iti balay ti ari, iti aywan ni Hegai, nga agaywan cadagiti babbai.

9Ket ti balasang nacaayayo kencuana, ket di balasang nacagun-od iti kinaimbag kencuana; ket intedna a nasingdat idi balasang dagiti banbanag a maipaay iti panaggugor, agraman cadagiti apagna, ken pito a babbalasang a maitutop a maited kencuana a naggapuda iti balay ti ari: ket isu ti inyallatiwna ken dagiti babbalasangna iti casayaatan a disso ti balay dagiti babbai.

10Ni Ester dina impacaammo ti ilina uray iti cabagianna; ta incumit ni Mardokeo kencuana nga isu dina ipacaammo.

11Ket agpagpagna idi ni Mardokeo iti inaldaw iti sangoanan ti paraangan ti balay dagiti babbai, tapno ammoenna no casano ti inaramid ni Ester, ken no ania ti maaramid kencuana.

12Idi dimteng ti batang ti tunggal balasang tapno sumrec ken ari Asuero, calpasan ti pannacaaramid kencuana ti mayalubog iti linteg a maipaay cadagiti babbai sangapulo ket dua a bulan (ta casta idi ti pannacatungpal dagiti al-aldaw dagiti panaggugorda, cayatna a sawen, innem a bulan iti lana ti mirra, ket innem a bulan iti nasam-it a bangbanglo ken cadagiti banbanag a maipaay iti panaggugor dagiti babbai),

13Iti castoy a wagas ngarud immay ti balasang iti ari: Aniaman a kinalicagumanna naited kencuana tapno maipacuyog kencuana manipud iti balay dagiti babbai agingga iti balay ti ari.

14Iti rumabii napan ti balasang ket iti bumigat nagsubli iti maicadua a balay dagiti babbai, iti aywan ni Saasgaz, nga agaywan iti siled ti ari, a mangaluad cadagiti camcamalala: ti balasang saanen simrec iti ari, malacsid no ti ari agrag-o kencuana, ket naayaban ti balasang a mainaganan.

15Idi a ti batang ni Ester, nga anac a babai ni Abihail nga uliteg ni Mardokeo isu a nangala kencuana a cas anacna a babai, dimteng a sumrec iti ari, isu saan a nagkidaw no di laeng ti tinudingan ni Hagai nga agaywan iti siled ti ari, a mangaluad cadagiti babbai: Kit ni Ester nacagun-od iti parabur iti imatangda amin a kimmita kencuana.

16Iti casta ni Ester naipan ken ari Asuero idiay uneg ti balayna a naarian idi maicapulo a bulan, nga isu ti bulan a Tebet, idi maicapito a tawen ti panagarina.

17Ket ti ari inayatna ni Ester a nangnangrona ngem cadagiti amin a babbai, ket di babbai nacagun-od iti parabur ken imbag iti imatangna a nangnangrona ngem cadagiti amin a virgen; iti casta nga insaadna kencuana ti naarian a balangat iti rabaw ti olona, ket inaramidna a reina iti saad ni Vasti.

18Idin ti ari nangaramid iti maysa a dackel a rambac a maipaay cadagiti pangpangoloenna ken dagiti ad-adipenna, a rambac met laeng ni Ester; ket nangaramid iti panangpacawan cadagiti provincia, ken nangted cadagiti sagsagut, a mayalubog iti kinaimbag ti ari.

19Ket idi a naurnong dagiti virgen iti maicadua a daras, idin adda nga agtugtugaw ni Mardokeo, idiay ruangan ti ari.

20Ni Ester dina pay la impacaammo iti cabagianna uray iti ilina: a cas iti panangicumit kencuana ni Mardokeo, ta ni Ester tinungpalna ti imbilin idi ni Mardokeo, a cas idi isu nataraken kencuana.

21Cadagidi nga al-aldaw, bayat ti caadda idi ni Mardokeo nga agtug-tugaw idiay ruangan ti ari, dua cadagiti agaywan iti siled ti ari, da Bigtan ken Teres, cadagiti nangaluad iti dapian, nagpungtotda, ket panggependa nga icabil dagiti imada ken ari Asuero.

22Ket naipacaammo ti banag ken Mardokeo, isu a nangiparangarang ken reina Ester; ket imbaga ni Ester daytoy iti nagan ni Mardokeo.

23Ket idi a naaramid ti panagpalutput iti panggep, ket isu ti nasaracan a casta, isuda a dua naibitayda iti maysa a cayo: ket naisurat iti libro dagiti cronicas iti sangoanan ti ari.

← Chapter 1 Jump to: Chapter 3 →