Ezra 9

Ilokano (Ti Biblia (1973))

← Chapter 8 Jump to: Chapter 10 →

1Idi a dagitoy a banbanag naaramidda, dagiti pangpangoloen immadanida caniac, a kinunada, Dagiti tattao ti Israel, ken dagiti papadi ken dagiti Levitas, dida insina dagiti bagbagida cadagiti tattao dagiti dagdaga, nga agar-aramidda a mayalubog cadagiti kinarimonda, dagiti met laeng Cananeos, dagiti Heteos, dagiti Ferezeos, dagiti Jebuseos, dagiti Ammonitas, dagiti Moabitas, dagiti Egipcios, ken dagiti Amorreos.

2Ta nagalada cadagiti annacda a babbai a maipaay cadacuada met laeng ken cadagiti annacda a lallaki, iti casta a ti nasantoan a bin-i nailaoc cadacuada met laeng cadagiti tattao dagiti dagdaga; ti ima dagiti pangoloen ken dagiti agturay isu idi ti nangnangrona itoy a panaglabsing.

3Ket idi a nangngegco daytoy, pinigisco ti pagan-anayco ken ti lambonco, ket pinarutco ti buoc ti oloc ken ti imingco, ket nagtugawak nga agmalmalanga.

4Idin timmipon caniac ti tunggal maysa a nagkintayeg cadagiti sasao ti Dios ti Israel, a gapu iti panaglabsing dagidiay a naggapu iti pannacacayaw; ket nagtugawak nga agmalmalanga agingga iti daton iti rumabii.

5Ket iti panagdaton ti rumabii timmacderac iti panagpacumbabac a ti met laeng cawes ken lambonco a sirarayab; ket nagparintumengac, ket inyucradco dagiti imac ken Jehova a Diosco;

6Ket kinunac, O Diosco, mabainac ket mabibinegac a mangitangad iti rupac kenca, Diosco, ta dagiti kinadangkesmi immaduda iti rabaw dagiti ol-olomi, ket ti babacmi dimmackelda agingga cadagiti langlangit.

7Nanipud cadagidi al-aldaw dagiti ammami nagbabaccami iti casta unay agingga itoy nga aldaw; ket gapu cadagiti kinadangkesmi, dagiti ar-arimi, ken dagiti papadimi, nayawatcami, iti ima dagiti ar-ari dagiti dagdaga, iti campilan, iti pannacacayaw, ken ti pannacaagaw, ken iti simamalanga a rupa, cas itoy nga aldaw.

8Ket ita iti maysa a bassit a canito naiparangarang ti parabur gapu ken Jehova a Diosmi, tapno ibatinacami a maysa a tidda a macalapsut, ken mangted cadacami iti maysa a lansa iti nasantoan a dissona, tapno lawagan ti Diosmi dagitimatami, ken iccannacami iti bassit a bang-ar iti pannacatagabumi.

9Ta dacami tagabucami; nupay casta dinacami indian ti Diosmi iti pannacatagabumi, no di ket inragpatnacami iti kinamanangngaasi iti imatang dagiti ar-ari ti Persia, tapno bang-arandacami tapno patacderenmi ti balay ti Diosmi, ken mangtarimaan cadagiti rebrebbana, ken mangted cadacami iti maysa a bacud iti Juda ken idiay Jerusalem.

10Ket ita, O Diosmi, anianto ti saoenmi iti calpasan daytoy? ta indianmi dagiti bilbilinmo.

11Nga imbilinmo iti pannacaaramat dagiti ad-adipenmo a mamadto, a kinunam, Ti daga a taguicuaenyo, narugit a daga a gapu iti kinarugit dagiti tattao dagiti dagdaga, gapu cadagiti kinarimonda, a nangpunno manipud iti maysa a bangir agingga iti sabali iti kinarugitda:

12Gapuna ita dicayo ited dagiti annacyo a babbai cadagiti annacda a lallaki, dicayo met mangala cadagiti annacda a babbai a maipaay cadagiti annacyo a lallaki dicayo sapulen ti cappiada wenno ti rang-ayda iti agnanayon; tapno pumigsacayo, ken canenyo ti imbag ti daga, ket isu ti ibatiyo a maysa a tawid cadagiti annacyo iti agnanayon.

13Ket calpasan ti amin nga immay cadacami a gapu cadagiti kinadakes dagiti ar-aramidmi, ken gapu iti dackel a babacmi, idinto a sica a Diosmi dinusanacami iti babassit ngem iti carbengan dagiti kinadangkesmi, ket iniccannacami iti castoy a matda,

14Salungasingenminto manen aya dagiti bilbilinmo, ken makisinggalutcami iti pannakiasawa cadagiti tattao nga agaramid cadagitoy a kinarimon? dicanto aya agpungtot cadacami agingga iti maibuisnacami tapno awanto ti matda, wenno macalapsut?

15O Jehova, a Dios ti Israel nalintegca; ta nabaticami a nacalapsut, cas itoy nga aldaw: adtoy, addacami iti sangoanam cadagiti babacmi; ta awan ti macapagtacder iti saclangmo gapu itoy.

← Chapter 8 Jump to: Chapter 10 →