Habakkuk 3

Ilokano (Ti Biblia (1973))

← Chapter 2 Jump to:

1Maysa a carag ni Habacuc a mammadto, a maitonos iti Si-gionoth.

2O Jehova, nangngegco ti damag a maipapan kenca, ket agbutengac: O Jehova, parayrayem ti aramidmo iti ngalay dagiti tawtawen; Iti ngalay dagiti tawtawen isu ipacaammom; Iti pungtot lagipem ti caasi.

3Ti Dios immay nanipud iti Teman, Ken ti Santo nanipud bantay Paran. (Selah) Ti dayagna abbonganna dagiti langlangit, Ket ti daga napno iti dayawna.

4Ket ti raniagna cas la iti silaw; Isu adda sinsinamarna nga umay manipud iti imana; Ket adda abbong ti pannacabalinna.

5Iti sangona napan ti angol, Ket ti apuy a gayang rimmuar iti yan dagiti sacsacana.

6Isu nagintec, ket rinucudna ti daga; Isu kimmita, ket impuruacna a nasayyasayya dagiti nasnacion; Ket dagiti agnanayon a banbantay naiwarisda; Dagiti agnanayon a turturod nagrucnoyda; Dagiti addangna cacasda la idi ugma.

7Nakitac dagiti tolda ni Cusan iti ladingit; Dagiti bengbeng ti daga ti Madian nagkintayegda.

8Nagrurodan aya ni Jehova dagiti carcarayan? Naibusor aya ti ungetmo cadagiti carcarayan, Wenno ta pungtotmo maibusor iti taaw. A simmacayca cadagiti cabayom, Cadagiti luganmo a pangisalacan?

9Ti ba-im nalucasan a naananay; Dagiti naisapata cadagiti caputotan pudnoda a sao. (Selah.) Sica linuctam ti daga cadagiti carcarayan.

10Dagiti banbantay nakitadaca, ket nagbutengda; Ti bagio dagiti dandanum naglabas; Ti yuyeng binalicasna ti timecna, Ket inngatona dagiti im-imana iti ngato.

11Ti init ken ti bulan nagsardengda a siiintec cadagiti pagnaedanda. Gapu iti lawag dagiti panam idi a napanda, Gapu iti gilap ta nasileng a picam.

12Sica binaddebaddecmo ti daga iti unget; Sica tinaltagmo dagiti nasnacion iti pungtot.

13Sica rimmuarca a maipaay iti pannacaisalacan ti ilim, Maipaay iti pannacaisalacan ti pinulotam; Sica sinugatmo ti olo ti balay ti nadangkes a tao. A linabusam ti pamuon agingga iti tengnged met laeng. (Selah)

14Sica sinalputmo cadagiti sarucodna met laeng ti olo dagiti buyotna; Isuda immayda a cas alawig a mangwarawara caniac; Ti nagrag-oanda isu ti panangalun-unda a sililimed iti napanglaw.

15Sica nagbaddecca iti taaw agraman cadagiti cabayom, Ti gabsuon dagiti napegges a dandanum.

16Nangngegco, ket ti bagic nagkintayeg. Dagiti bibigco nagpigergerda iti timec; Kinacapuy sumrec cadagiti tulangco, ket agkintayegac iti dissoc; Agsipud ta masapul nga agurayac a sitatalna iti aldaw ti riribuc, Iti isasangpet dagiti tattao a mangraut cadatayo.

17Ta uray ti cayo nga higos dinto aglasbang, Uray bunga awanto cadagiti uv-uvas; Ti apit nga olivo agcurangto, Ket dagiti taltalon didanto mamaltuad iti taraon; Ti pangen maiccatto manipud iti pagyaponan, Ket awanto ti arban cadagiti pagtaracnan:

18Nupay casta agragsacacto ken ni Jehova. Agragsacacto iti Dios ti pannacaisalacanco.

19Ni Jehova, nga Apo, isu ti pigsac; Ket aramidenna dagiti sacsacac a cas sacsaca ti ugsa a ludludan. Ket aramidennacto a magna iti rabaw dagiti nangato a dissoc. Agpaay iti Pangulo a Musico, cadagiti instrumentos a nacuerdasan.

← Chapter 2 Jump to: