Jonah 4

Ilokano (Ti Biblia (1973))

← Chapter 3 Jump to:

1Ngem ni Jonas naapas unay, ket nagunget.

2Ket nagcararag ken ni Jehova, ket kinunana, Dawatec kenca, O Jehova, saan a daytoy daydi kinunac idi addaac pay idiay dagac? Gapuna a dinardarasco ti ipapanco idiay Tarsis; ta ammoc idi a sica ti Dios a managparabur, ken manangngaasi, natanang nga agpungtot, nabacnang iti kinamanagayat, ket pagbabawiam ti dakes.

3Ita ngarud, O Jehova, dawatec kenca nga iccatem ti biagco, ta nasaysayaat caniac ti ipapatay ngem ti panagbiag.

4Ket ni Jehova kinunana, Naimbag aya ti aramidem iti panagpungtotmo?

5Idin rimmuar ni Jonas iti ili, ket nagtugaw iti daya ti ili, ket idiay nagaramid iti calapaw, ket nagtugaw iti linong ti sirocna inggana iti makitana no anianto ti maaramid ti ili.

6Ket ni Jehova a Dios insaganana ti maysa a tabungaw, isu a pinagcalatcatna iti ngato ni Jonas, tapno linonganna coma ti olona, nga ispalenna iti dakes a casasaadna. Iti casta ni Jonas napalalo a ragsacna gapu iti tabungaw.

7Ngem ti Dios insaganana ti maysa nga igges idi bimmigat iti sumaruno nga aldaw, ket kinibkibanna di tabungaw, tapno nagango.

8Ket naaramid, nga idi limgac ti init, insagana ti Dios ti angin a napudot a naggapu iti daya; ket ti init kinabilna iti olo ni Jonas, iti casta nagcapuy, ket indawdawatanna ti bagina met laeng a matay coma, ket kinunana, Nasaysayaat caniac ti ipapatay ngem ti panagbiag.

9Ket kinuna ti Dios ken ni Jonas, Naimbag aya ti aramidem iti panagpungtotmo gapu iti tabungaw? Ket isu kinunana, Naimbag nga aramid ti panagpungtotco, nga uray agingga iti matayac.

10Ket kinuna ni Jehova, Kinailalaam ti tabungaw, isu a dica nagbannogan, ken dica met pinatubo, nga iti bayat ti maysa a rabii timmubo, ket iti bayat ti maysa a rabii napucaw:

11Ket siac awanto ngata ti caasic iti Ninive, daydiay ili a dackel, isu a yan ti nasuroc a sangagasut ket duapulo a ribu a tattao a dida ammo ti macanawan ken macatigid; ken castamet adu a vacvaca?

← Chapter 3 Jump to: