Lamentations 5

Ilokano (Ti Biblia (1973))

← Chapter 4 Jump to:

1Lagipem, O Jehova, no ania ti dimteng cadacami: adtoy, ket kitaem ti pacaumsianmi.

2Ti tawidmi mayawat cadagiti gangannaet, dagiti balbalaymi cadagiti sangsangaili.

3Ulilacami ket awan ti ammami; dagiti innami casda la balbalo.

4Ininummi ti danummi babaen ti pirac; ti cayomi mailaco cadacami.

5Dagiti mangparigat cadacami addada cadagiti tengngedmi: nabannogcami, ket awan ti inanami.

6Intulocmi ti imami cadagiti Egipcios, ken cadagiti Asirios, tapno mapneccami iti tinapay.

7Dagiti ammami nagbasolda, ket awandan; ket inawitmi dagiti kinadakesda.

8Dagiti ad-adipen iturayandacami: awan ti asinoman a mangruc-at cadacami iti imada.

9Gun-odenmi ti tinapaymi babaen ti peggad dagiti biagmi, a gapu ti campilan iti let-ang.

10Ti cudilmi nangisit a cas horno, maipuon iti sumsumged a pudot ti bisin.

11Pinilitda dagiti babbai idiay Sion, dagiti babbalasang cadagiti il-ili ti Juda.

12Dagiti piprincipe naibitinda cadagiti imada. Dagiti rupa dagiti panglacayen saanda; a nadaydayaw.

13Dagiti agtutubo a lallaki baclayenda ti gilingan; ket dagiti ububbing maitibcolda iti baba ti pagsungrod.

14Dagiti panglacayen binay-bayanda ti ruangan, dagiti agtutubo iti panagtocarda.

15Ti ragsac ti pusomi naawan: ti panagsalami nagbalin a ladingit.

16Ti balangat natnag nanipud iti olomi: asicami pay! ta nagbasolcami.

17Gapu itoy ti pusomi mapacsoyan; gapu cadagitoy a banbanag dagiti matami nacudrepda;

18Maipuon iti bantay Sion isu a langalang: dagiti lobo magnada iti rabawna.

19Sica, O Jehova, mataginayonca; ti tronom agtalinaed manipud caputotan agingga iti caputotan.

20Apay lipatannacami iti agnanayon, ken baybay-annacami iti castoy a cabayag?

21Isublinacami kenca, O Jehova, ket maipulangcamto; pabaroem dagiti al-aldawmi cas idi ugma.

22Ngem sica naglictadannacami a naananay; napungtotca unay a maibusor cadacami.

← Chapter 4 Jump to: