Nahum 2

Ilokano (Ti Biblia (1973))

← Chapter 1 Jump to: Chapter 3 →

1Daydiay a mangburburac simmang-at a maibusor kenca: aywanam ti sarikedked, bantayam ti dalan, pakirdem dagita lomom, papigsaem unay ta pannacabalinmo.

2Ta ni Jehova pabaroenna ti kinatan-oc ni Jacob, a cas ti kinatan-oc ti Israel, ta dagiti agibuybuyat imbuyatda ida, ket dinadaelda dagiti santac ti uvasda.

3Ti calasag dagiti maingel a lallakina napalabaga, dagiti natured a lallalki addaanda iti escarlata: dagiti luglugan agraniag iti paslepda iti aldaw ti panagsaganana, ket dagiti cipres a gaygayang iwaradiwadda.

4Dagiti luglugan agpeggesda cadagiti daldalan; agtarayda cadagiti nalawa a daldalan; nga agsublisubli: ti langada cas la cadagiti aluten a sidadarang; agtarayda a cas la kimat.

5Isu malagipna dagiti natatacnengna: isuda agtibcolda iti pannagnada; agdarasda a mapan iti bacudna, ket ti abbong maisagana.

6Dagiti ruangan dagiti carcarayan maluctanda, ket ti palacio marunaw.

7Ket isu nakedngan: isu malucaisan, maipan iti ruar; ket dagiti tagabuna a babbai agsainnecdanto a cas iti timec dagiti calapati, a dandanugenda dagiti barucongda.

8Ngem ti Ninive nanipud idi ugma isu cas la ban-aw ti danum: nupay casta agtalawda. Aginteccayo, aginteccayo, ipuccawda; ngem awan ti tumaliaw a cumita.

9Alaenyo ti sinamsam a pirac, alaenyo ti sinamsam a balitoc; ta awan ti patingga ti sanicua, ti dayag ti isu-amin a naimnas nga alicamen.

10Isu maongaongan, ken maugutan, ken walangwalang; ket ti puso matunaw, ket dagiti tumtumeng agtitimogda, ket ti tuoc adda cadagiti isu-amin a lomo, ket dagiti ruprupa cadacuada amin nabessagda.

11Sadino ti taeng dagiti leon, ken ti panganan dagiti urbon a leon, a pagnaan ti leon ken ti leon a cabaian,, ti urbon ti leon, ket awan ti namagbuteng cadacuada?

12Ti leon ginisgisna a pinispisi ti umdas nga agpaay cadagiti urbonna, ken nangbeckel iti maipaay cadagiti cabayanna a leon, ket pinusecna dagiti gucayabna iti tinucmaanna, ken ti pagtaenganna iti panagagaw.

13Adtoy, a maibusorac kenca, cuna ni Jehova dagiti buybuyot, ket uramecto iti asuc dagiti lugluganna, ket ti campilan alun-unennanto dagiti urbonmo a leon; ket pucawecto ta tinucmaam iti daga, ket ti timec dagiti babaonem dinto mangeganen.

← Chapter 1 Jump to: Chapter 3 →