Obadiah 1

Ilokano (Ti Biblia (1973))

Jump to:

1Ti sirmata ni Abdias. Castoy ti cuna ni Jehova nga Apo a maipapani ti Edom: Nangngegmi dagiti damdamag a naggapu ken Jehova, ket adda naibaon cadagiti nasnacion, a cunana, Tumacdercayo ket tumacdertayo coma a maibusor kencuana iti gubat.

2Adtoy, inaramidca a bassit cadagiti nasnacion; ket malaisca unay.

3Ti kinatangsit ta pusom liniputannaca, sica nga agnaed cadagiti birri ti bato a ti pagtaenganna nangato; a cunaenna iti pusona, Siasinonto ti macaipadaga caniac?

4Nupay addaca a mangalalimpatoc a cas aguila ken nupay ti umucmo maisaad cadagiti bitwen, itinnagcanto manipud idiay cuna ni Jehova.

5No dagiti mannanacaw immayda coma kenca, wenno dagiti tultulisan iti rabii, (Anian ti pannacadadaelmo!) saanda ngata coma nga agtacaw laeng agingga iti mapnecda? No dagiti mangnguvas serkendaca coma, saanda ngata a mangibati cadagiti uvas a banbanaen?

6Anian ti pannacasukimat dagiti banag ni Esau! Anian a pannacaamiris dagiti nailemmeng a gamengna!

7Amin dagiti tattao a cacannaponmo insangpetdaca iti dalanmo agingga met laeng iti beddeng; dagiti tattao a nakicappia kenca liniputandaca, ket inatiwdaca; dagiti mangan ti tinapaymo pasbangandaca; awan ti pannacaawat kencuana.

8Diacto aya dadaelen dagiti mamasirib iti Edom, iti dayta nga aldaw, cuna ni Jehova, ken dagiti mannacaammo idiay bantay ni Esau?

9Ket dagiti tattaom a nabileg, O Teman, mapagcullayawdanto a ti tungpalna tumunggal maysa madadael coma idiay bantay ni Esau babaen ti pannacapapatay.

10Gapu iti ranggas nga inaramidmo ken Jacob a cabsatmo, sica mabungoncanto ti bain, ket madadaelcanto iti agnanayon.

11Idi aldaw a panagtacdermo iti bangir ken idi aldaw a panangipanaw dagiti sangsangaili iti sanicuana, ken dagiti gangannaet simrecda cadagiti ruanganna, ket naggiginnasatanda ti maipapan iti Jerusalem, maysaca met laeng a cas cadacuada.

12Ngem dica imatangan ti aldaw ni cabsatmo iti aldaw ti kinadacsangasatna; ket dica agrag-o cadagiti annac ni Juda iti aldaw a pannacadadaelda; dica met agpalangguad iti aldaw ti liday.

13Dica sumrec iti ruangan ti ilic iti aldaw ti pannacariribucda: wen, dica imatangan ti ladingitda iti aldaw ti pannacariribucda, dica met mangala cadagiti cucuada iti aldaw ti pannacariribucda.

14Dica agtacder iti pagcruzan ti dalan tapno agpapatay cadagiti tattaona nga aglisi; ket dica yawat dagiti tattaona a mabati iti aldaw ti rigat.

15Ta ti aldaw ni Jehova umadani cadagiti amin a nacion: ti cas inaramidmo, maaramidto met kenca; ti namay-am cadagiti tattao castanto met ti pacapay-an ta olom met laeng.

16Ta cas iti panaginumyo idiay nasantoan a bantayco, castanto met dagiti amin a nacion uminumda a cancanayon; wen, uminumdanto, ket alimunendanto, ket agbalindanto, a cas la saan a timmao.

17Ngem idiay bantay Sion addanto dagiti macalisi, ket isu nasantoanto; ket ti balay ni Jacob tagicuaendanto ti cucuada.

18Ket ti balay ni Jacob maysanto nga apuy, ket ti balay ni Jose maysanto a gil-ayab, ket ti balay ni Esau punget ti garami, ket isuda puurandanto ket ikisapdanto ida; ket awanto a pulos ti matda iti balay ni Esau ta casta ti sinao ni Jehova.

19Ket dagiti taga Abagatan, tagicuaendanto ti bantay ni Esau, ket dagiti adda iti tanap tagicuaendanto ti daga dagiti Filisteos; ket tagicuaendanto met ti daga ti Efraim, ken ti daga ti Samaria; ket ti Benjamin tagicuaennanto ti Galaad.

20Ket dagiti nacayawan ti daytoy a buyot ti annac ti Israel, nga adda cadagiti Cananeo, tagicuaendanto ti dagada inggana iti Sarepta; ket dagiti nacayawan ti Jerusalem, nga add a diay Sefarad tagicuaendanto dagiti il-ili iti Abagatan.

21Ket dagiti manangispal sumang-atdanto idiay bantay Sion, a mangocom iti bantay ni Esau; ket ti pagarian cucuanto ni Jehova.

Jump to: