Philemon 1

Ilokano (Ti Biblia (1973))

Jump to:

1Ni Pablo, balud ni Jesu-Cristo, ken ni cabsat a Timoteo, isuratmi ken Filemon, ingongoten ken catulonganmi.

2Ken ni Apia, ay-ayaten a cabsat, ken ni Arquipo a cabuyotanmi ken iti Iglesia iti balaymo:

3Parabur ken talna ti Dios nga Amatayo ken ni Apo Jesu-Cristo adda coma cadacayo.

4Agyamanac a cancanayon iti Diosco, nga ibabaetca cadagiti carcararagco,

5Idinto a naammoac ti ayatmo ken ti pammati nga adda kenca ken Apo Jesus ken cadagiti isu-amin a sasanto;

6Tapno ti pannacaicadcadua ti pammatim, agbalin coma a napigsa babaen ti pannacaammo iti isu-amin nga imbag nga adda cadacayo a maipaay ken Cristo.

7Ta adda adu a rag-oc ken liwliwac gapu iti ayatmo, agsipud ta dagiti puspuso dagiti sasanto naliwliwada gapu kenca, cabsat.

8Gapuna, uray adda addu a turedco gapu ken Cristo a mangibilin kenca ti maipaay.

9Nupay casta, gapu iti ayat caycayatco ti agdawat kenca idinto a castoyac, Siac ni Pablo a panglacayen; ken ita balud pay gapu ken Cristo Jesus;

10Dawatec kenca gapu ken anacco nga Onesimo nga inyanacco cadagiti cawcawarco,

11Isu nga idi naminsan awan ti naitulongna kenca, ngem ita macatulong kenca ken caniac:

12Isu a pinagsublic kenca, cayatco a sao-en, ti pusoc met laeng:

13Tinarigagayac nga isu ti imbatic coma iti dinnac, tapno iti naganmo tulungannac coma cadagiti pannacacawar gapu iti evangelio:

14Ngem no awan ti pananganamungmo, diac coma cayat ti agaramid iti uray ania; tapno ti kinaimbagmo saan coma a cas nagtaud iti pannacasapul no di iti nacnakemmo a panagayat.

15Ta nalabit gapu itoy met laeng, isu nayadayu kenca iti bassit a tiempo, tapno, isu agsubli nga agtaeng kenca iti agnanayon;

16Saanen a cas la adipen, no di ket napatpateg ngem adipen, cas la cabsat a dungdungoen, nangrona caniac, ngem nangnangrona pay kenca nga agpadpada iti lasag, ken iti biang ti Apo.

17No ngarud no ibilangnac a cadua, isu awatem a cas caniac met laeng.

18Ngem no adda bassit a naranggasanna kenca, wenno adda utangna a bassit ilanadmo iti cuentac;

19Siac ni Pablo sinuratac babaen iti imac met laeng; ipulangconto; nupay diac sao-en kenca nga uray pay ti kinataom mautangmo caniac.

20Wen, cabsat; adda coma rag-oc kenca iti Apo; palamiisam ti pusoc gapu ken Cristo.

21Agsipud ta siac adda panagtalecco iti annugotmo, nagsuratac kenca, nga ammoc a sica aramidemto pay ti adadda ngem iti ibagac.

22Ket casta met nga isaganaannac ti pagdagusac; ta inanamaec a gapu cadagiti cararagyo maipaayacto cadacayo.

23Cablaawannacayo ni Epafras, a caduac iti pagbaludan, gapu ken Cristo Jesus;

24Ni Marcos, ni Aristarco, ni Demas, ni Lucas, dagiti catulungac.

25Ti parabur ni Apotayo a Jesu-Cristo adda coma iti espirituyo. Amen.

Jump to: