Ruth 3

Ilokano (Ti Biblia (1973))

← Chapter 2 Jump to: Chapter 4 →

1Ket ni Noemi a catuganganna kinunana kencuana, Anacco, diacto agsapul ti inana nga agpaay kenca, tapno naimbag coma kenca?

2Ket ita saan nga isu ti cabagianta ni Booz, a dagiti tagabuna a babbalasang sica nakiaddaca? Adtoy, isu agpataep iti daytoy a rabii iti cebada idiay pagtaltagan.

3Gapuna agdigosca, ken aglanaca ala, ken icabilmo kenca dagiti cawesmo, ket sumalagca iti pagtaltagan; ngem dicanto agpadlaw iti lalaki, agingga iti calpasan ti pannangan ken iyiinumna.

4Ket isunto, nga intono isu agidda tandaanamto ti disso a pagiddaanna, ket sumreccanto, ket lucasamto dagiti sacsacana, ket agiddacanto; ket isu ibagananto kenca no ania ti aramidemto.

5Ket ni Ruth kinunana kencuana, Amin dagiti ibagam aramidecto.

6Ket simmalog iti pagtaltagan ket inaramidna ti mayalubog iti amin daydi a ni catuganganna imbilinna kencuana.

7Ket idi a ni Booz nacacaan ken nacainum, ket ti pusona adda idi a siraragsac, napan nagidda iti maysa a pungto ti penpen ti bukel: ket isu immay a siiinayad unay, ket linucasanna dagiti sacsacana, ket nagidda.

8Ket naaramid idi iti tengnga ti rabii, a di lalaki nagbuteng, ket timmaliaw; ket adtoy, ti babai adda idi a nagidda cadagiti sacsacana.

9Ket ni Booz kinunana, Siasinoca, ket isu simmungbat, Siac ni Ruth nga adipenmo: gapuna nga iyarpawmo ta cawesmo iti adipenmo; ta sica ti asideg a cabagian.

10Ket isu kinunana, Benditaca coma ken Jehova, anacco: ta sica imparangarangmo ti naimimbag a nakem iti naududi a tungpal ngem iti immuna iti dica ipapan isusurot cadagiti agtutubo a lallaki, a nabacnangda man wenno napanglawda.

11Ket ita, anacco, dica agbuteng; aramidecto kenca ti isu-amin nga ibagam; ta amin ti ili ti cailiac ammona a sica ti maysa a maicari a babai.

12Ket ita pudno a siac asidegac a cabagian; nupay casta adda sabali a cabagian nga asasideg ngem siac.

13Agtukenca iti daytoy a rabii, ket inton bigat, a no daydiay tungpalennanto kenca ti biang ti maysa a cabagian, naimbag; isu bay-am nga agaramid iti biang ti maysa a cabagian: ngem no isu dinanto aramiden kenca ti biang ti maysa a cabagian, cas ni Jehova sibibiag, isunton ti panangar-aramidco kenca ti biang ti maysa a cabagian: agiddaca agingga iti bigat.

14Ket isu nagidda cadagiti sacsacana agingga iti bigat: ket isu bimmangon iti sacbay a ti maysa a tao malasinna ti sabali. Ta kinunana, Saan coma a maammoan a ti babai immay iti pagtaltagan.

15Ket isu kinunana, Yegmo ta cagaymo nga adda kenca, ket isu ti itayam; ket isu intayana; ket ni Booz nangsucat iti innem a casucat a cebada, ket incabilna kencuana: ket isu napan iti ili.

16Ket idi a ni Ruth immay ken catuganganna, isu kinunana, Casanoca, anacco? Ket isu impalawagna amin daydi a ti lalaki inaramidna kencuana.

17Ket kinunana, Dagitoy innem a casucat a cebada intedna caniac; ta kinunana, Saanca a mapan nga ongngaong ken ni catugangam.

18Idin isu kinunana, Agtugawca a sitatalna, anacco, agingga iti maammoan coma no casano ti pannacaibanag ti panggep; ta ti lalaki dinto agtalna, agingga iti maturposna ti panggep iti daytoy nga aldaw.

← Chapter 2 Jump to: Chapter 4 →