Titus 1

Ilokano (Ti Biblia (1973))

Jump to: Chapter 2 →

1Siac ni Pablo, nga adipen ti Dios ken apostol ni Jesu-Cristo, cas mayannurot iti pammati dagiti pinili ti Dios, ken ti pannacaammo iti pudno, a mainugot iti kinasanto,

2Babaen ti pananginanama iti biag nga agnanayon, nga ti Dios, a dina mabalin ti agulbod, incarina idi sacbay dagiti ginasgasut a tawen;

3Ngem cadagiti pannawenna impacaamona ti saona, babaen ti paibaga a naitalec caniac, cas iti bilin ti Dios a Manangisalacan cadatayo;

4Isuratco ken Tito, pudno nga anacco cas iti sapasap a pammati: Parabur ken talna ti Dios Ama ken ni Cristo Jesus a Manangisalacan cadatayo.

5Gapu itoy imbatica idiay Creta, tapno ituloymo nga ornosen dagiti banbanag a dipay nalpas idi, ken tapno mangisaadca cadagiti panglacayen iti tunggal Ili, cas imbilinco kenca;

6No siasinoman a tao ti awan pacababalawanna, asawa ti maymaysa a babai, nga adda annacna a namati, a saanda a naidarum gapu iti kinadakes, ket saanda a nasukir iti linteg.

7Ta ti obispo masapul nga awan pacababalawanna, ta isu ngarud ti pagaywanen ti Dios; saan a napalangguad, saan a managpungtot, saan a mannakiringgor, saan a mannakicabil, saan a naagum iti pirac;

8No di ket managpadagus, naayat iti naimbag, natacneng, nalinteg, nasingpet, managparbeng;

9A salimetmetanna a sititibker ti sao a napudno, isu a mayannugot iti sursuro, tapno iti casta mabalinna ti mamalbalacad babaen ti nadalus a sursuro, ken tapno mauyotanna dagiti sumupiat.

10Ta adda adu a manangririboc, managsao ti awan capapay-anna ken manangal-lilaw, nangrona cadagiti adda iti pannacacugit:

11A dagiti ngiwngiwatda masapul nga apputen; tattao a mangririboc cadagiti amin a sangacabbalayan nga isursuroda ti saanna a carbengan gapu iti naalas a gonggona.

12Kinuna ti maysa cadacuada met laeng, maysa a mammadtoda met laeng; Dagiti taga Creta agnanayon a natirida dakes nga an-animal, nabuclis nasadut.

13Daytoy a pangpanecnec pudno: gapuna babalawem ida iti nainget, tapno nasalun-atda iti pammati,

14A dida ipangag dagiti parparbo a sarita dagiti Judio, ken dagiti bilbilin dagiti tattao ket sumiasida iti pudno.

15Isu-amin dagiti banbanag nadalusda cadagiti nadalus; ngem cadagiti narugit ken dagiti di mamati, awan ti nadalus, no di ket narugitan ti isipda met laeng ken ti concienciada.

16Ipaduyacyacda nga ammoda ti Dios: ngem gapu cadagiti ar-aramidda tal-licudanda, idinto a macarimonda ken nasukirda, ket naisiasida cadagiti amin nga ar-aramid a naimbag.

Jump to: Chapter 2 →