Zephaniah 1

Ilokano (Ti Biblia (1973))

Jump to: Chapter 2 →

1Ti sao ni Jehova nga immay ken ni Sofonias nga anac ni Cusi, nga anac ni Gedalias, nga anac ni Amarias, nga anac ni Ezekias, cadagiti al-aldaw ni Josias, nga anac ni Amon, nga ari ti Juda.

2Siac ikisapconto dagiti isu-amin a banbanag iti rabaw ti daga, cuna ni Jehova.

3Ibusecto ti tao ken animal; ibusecto dagiti tumatayab ti langit, ken dagitiicican ti taaw, ken dagiti pacaitibcolan cadagiti nadangkes; ket dadaelecto ti tao iti rabaw ti daga, cuna ni Jehova.

4Ket yunnatconto ti imac a maibusor iti Juda, ken cadagiti isu-amin nga agnaed ti Jerusalem; ket dadaelecto ti matda ni Baal iti daytoy a disso, ken ti nagan ti Kemarin agraman dagiti papadi;

5Ken dagidiay agcarcararag iti buyot ti langit cadagiti tuctoc ti balay; ken dagidiay agcarcararag, nga agsapata gapu ken Jehova ken agsapata gapu ken Malcam:

6Ken dagidiay agbawing iti isusurot ken Jehova; ken dagidiay saan a nagbiruc ken Jehova, wenno saan a nagsaludsud maipapan kencuana.

7Agulimecca iti imatang ni Apo Jehova; ta ti aldaw ni Jehova asidegen: ta ni Jehova nangisagana iti maysa a daton, isu dinalusanna dagiti naawis.

8Ket maaramidto iti aldaw ti daton ni Jehova, a dusaecto dagiti piprincipe, ken dagiti annac ti ari, ken amin a sicacawes iti pagan-anay a gangannaet.

9Ket iti daydiay nga aldaw dusaecto amin dagidiay aglactaw iti dapian, a mangpusec iti balay ni apoda iti panangranggas ken allilaw.

10Ket iti daydiay nga aldaw, cuna ni Jehova, addanto anabaab ti anug-og nga aggapu iti ruangan ti ican, ken dung-aw nga aggapu iti maicadua a paset, ken dackel a daranudor nga aggapu cadagiti turturod.

11Agdung-awcayo, dacayo nga agnaed ti Mactes; ta isu-amin nga ili ti Canaan napacsuyanda, isu-amin dagidiay a napaawitan iti pirac madadael.

12Ket maaramidto iti daydiay a pannawen, a sukimatecto ti Jerusalem babaen cadagiti pagsilawan; ket dusaecto dagiti tattao nga agtugaw cas iti arac iti arinsaedna, a cunada cadagiti pusoda, Ni Jehova saanto nga agaramid iti naimbag, saanto met nga agaramid iti dakes.

13Ket ti sanicuada agbalinto a sinamsam, ket dagiti balbalayda agwalangwalang: wen, mangibangondanto cadagiti balbalay, ngem didanto agnaed cadacuada; ket mangmuladanto ti cauvasan, ngem didanto uminum iti aracna.

14Ti dackel nga aldaw ni Jehova asideg, isu asideg ken napardas unay, ti met laeng timec ti aldaw ni Jehova: ti maingel a lalaki agickis a sipapait unay sadiay.

15Daydiay nga aldaw isu ti aldaw ti pungtot, aldaw ti riribuc ken rigat, aldaw ti racrac ken langalang, aldaw ti sipnget ken lulem, aldaw dagiti ul-ulep ken napuscol a kinasipnget,

16Aldaw ti tangguyob ken panagbuac, a maibusor cadagiti il-ili a nasarikedkedan, ken maibusor cadagiti torre iti pagsulian.

17Ket yegconto ti rigat cadagiti tattao tapno magmagnada a cas bulsec a tattao, agsipud ta nagbasolda a maicaniwas ken ni Jehova; ket ti darada maiparucpocto a cas la tapuc, ken ti lasagda a cas iti ibleng.

18Uray ti piracda uray ti balitocda didanto mabalin ti mangispal cadacuada iti aldaw ti pungtot ni Jehova; ngem ti isu-amin a daga malamutto iti apuy ti imonna: ta aramidennanto ti panungpalan, wen, nacakigkigtot a panungpalan, ti isu-amin nga agnaed iti daga.

Jump to: Chapter 2 →