1 Corinthians 11

Ilokano (Ti Baro a Naimbag a Damag Biblia) 1996

← Chapter 10 Jump to: Chapter 12 →

1Tuladendak ngarud a kas iti panangtuladko ken ni Cristo.

2Dayawenkayo gapu ta kanayon a malaglagipdak ken sursurotenyo dagiti pannursuro nga inyawatko kadakayo.

3Ngem kayatko a maawatanyo a ni Cristo ti pannakaulo ti tunggal tao. Ti lalaki ti pannakaulo ti babai, ket ti Dios ti pannakaulo ni Cristo.

4Isut' gapuna a no nakadalungdong ti lalaki no agkararag wenno mangasaba, ibabainna ni Cristo.

5Ti babai a saan nga agdalungdong no agkararag wenno mangasaba, ibabainna ti asawana. Awan dumana iti babai a nakuskosan ti ulona.

6Kinapudnona, no saan nga agdalungdong ti babai, nasaysayaat laengen no agpakuskos. Ngem gapu ta nakababain nga agpakuskos ti babai, agdalungdong ngarud.

7Saan a rumbeng nga agdalungdong ti lalaki, ta isu ti pakakitaan iti ladawan ken dayag ti Dios. Ti babai ti mangiladawan iti dayag ti lalaki.

8Ta saan a nagtaud ti lalaki iti babai, no di ket ti babai ti nagtaud iti lalaki.

9Ken saan a naparsua ti lalaki gapu iti babai, no di ket naparsua ti babai gapu iti lalaki.

10Ngarud, gapu kadagiti angheles, agdalungdong koma ti babai tapno maipakita nga iturayan ti lalaki.

11Nupay kasta, iti panagbiagtayo iti Apo, ti babai napateg iti lalaki ket ti lalaki napateg iti babai.

12Ta idinto a nagtaud ti babai iti lalaki, mayanak met ti lalaki iti babai; ngem agtaud amin a banag iti Dios.

13Dakayo ti mangeddeng: Rumbeng kadi nga awan dalungdong ti babai no agkararag iti Dios iti publiko?

14Saan kadi nga isuro ti nakaisigudan nga ugali a naalas nga atiddog ti buok ti lalaki

15ngem napintas a banag iti babai? Naited kenkuana ti atiddog a buok a pannakadalungdongna.

16Ngem no adda sumuppiat iti daytoy, ibagak kadakayo nga awan kasta nga ugalitayo, uray pay kadagiti iglesia ti Dios.

17Ngem iti panangibagak kadakayo kadagitoy sumaganad, saankayo a dayawen. Awan ngamin ti pagimbagan nga ited ti panaggigimongyo, no di ket pagdaksan.

18Umuna, naipadamag kaniak a mabingaybingaykayo kano no aggigimongkayo, ket mamatiak bassit iti daytoy. (

19Nasken a masinasinakayo tapno maiparangarang dagiti pudno a mapagtalkan.)

20Iti kastoy a panagtataripnongyo, saanen a ti Pangrabii ti Apo ti kanenyo.

21Ta no mangankayo, agiinnunakayo a mangan iti bukodyo a pangrabii. Iti kasta, adda mabisinan, adda pay mabartek.

22Apay, awan kadi ti balayyo a panganan ken paginumanyo? Wenno laisenyo kadi ti iglesia ti Dios ket ibabainyo dagiti napanglaw? Ania ti namnamaenyo a sawek kadakayo maipapan iti daytoy? Dayawenkayo? Saan a mabalin!

23Ta inawatko iti Apo ti pannursuro nga inyawatko met kadakayo: Iti rabii a pannakaliput ni Apo Jesus, innalana ti tinapay.

24Kalpasan ti panagyamanna iti Dios, pinispisina ti tinapay ket kinunana, “Daytoy ti bagik nga agpaay kadakayo. Aramidenyo daytoy a panglaglagipyo kaniak.”

25Kasta met a kalpasan ti pangrabii, innala ni Jesus ti kopa ket kinunana, “Daytoy ti kopa ti baro a tulag a napatalgedan babaen iti darak. Tunggal uminumkayo iti daytoy, aramidenyo a panglagip kaniak.”

26Kaipapananna daytoy a tunggal mangankayo iti daytoy a tinapay ken uminumkayo iti daytoy a kopa, ipakaammoyo ti ipapatay ti Apo agingga iti panagsublina.

27Isut' gapuna a ti siasinoman a mangan iti tinapay wenno uminum iti kopa ti Apo iti wagas a nakababain, makabasolto iti bagi ken dara ti Apo.

28Ngarud, masapul nga umuna nga usigen ti tunggal tao ti bagina sakbay a mangan iti tinapay ken inumanna ti kopa.

29Ta ti siasinoman a mangan iti tinapay ken uminum iti kopa a dina ammoen ti kaipapanan ti bagi ti Apo, yegna ti pannakaukom iti bagina.

30Daytoy ti gapuna nga adu kadakayo ti nakapsut ken masakit ket adun ti natay.

31No usigentayo koma nga umuna ti bagitayo, dinatay ukomen ti Dios.

32Ngem ukomen ken dusaennatayo ti Apo tapno ditayo mairaman iti pannakadusa ti lubong.

33Ngarud, kakabsatko, agiinnuraykayo no aguummongkayo a mangan iti Pangrabii ti Apo.

34Ket no adda mabisin kadakayo, mangan idiay balayna tapno dikayto maukom inton agtataripnongkayo. No maipapan kadagiti dadduma a parikut, risutekto ida inton umayak.

← Chapter 10 Jump to: Chapter 12 →