1 Kings 9

Ilokano (Ti Baro a Naimbag a Damag Biblia) 1996

← Chapter 8 Jump to: Chapter 10 →

1Kalpasan ti panangbangon ni Solomon iti Templo ken ti palasio agraman dagiti amin a kayatna a bangonen,

2nagparang manen ni Yahweh kenkuana a kas iti panagparangna idi idiay Gabaon.

3Kinuna ni Yahweh, “Nangngegko ti kararagmo. Ikonsagrarko daytoy a Templo a binangonmo a pagdaydayawan kaniak dagiti tattao iti agnanayon. Aywanak ken salaknibak daytoy a templo iti agnanayon.

4Ita, no agserbika kaniak a kas iti daydi amam a David, ket buyogam iti kinatakneng ken kinapudno ket tungpalem amin a bilinko kenka ken agtulnogka kadagiti lintegko,

5tungpalek ti inkarik idi ken ni David nga amam idi imbagak kenkuana nga addanto kaputotanna a mangituray iti Israel iti agnanayon.

6Ngem no tallikudandak, sika wenno dagiti kaputotam, no diyo tungpalen dagiti bilin ken linteg nga ipaalagadko kadakayo, ket agserbi ken agdaydayawkayo kadagiti didiosen,

7pagtalawekto dagiti tattaok nga Israelita iti daga nga intedko kadakuada. Baybay-akto daytoy a Templo a kinonsagrarko a pagdaydayawan dagiti tattao kaniak. Sarsaritaendanto ti Israel ket lalaisento dagiti tattao iti amin a lugar.

8Agbalinto daytoy a Templo a gabsuon ti bato ket masdaaw ken makigtotto dagiti amin nga aglabas. Kunadanto, ‘Apay a kastoy ti inaramid ti Apo iti daytoy a daga ken iti daytoy a Templo?’

9Ket isungbatto dagiti dadduma, ‘Gapu ta binaybay-an dagiti tattao ti Apo a Diosda a nangiruar kadagiti kapuonanda iti daga ti Egipto. Insapatada ti kinapudnoda kadagiti didiosen ket nagdaydayaw ken nagserbida kadakuada. Daytoy ti gapuna nga indissuor ti Apo daytoy a didigra kadakuada.’”

10Duapulo a tawen a binangon ni Solomon ti Templo ken ti palasiona.

11Ni Hiram nga ari ti Tiro ti nangted idi iti amin a kayo ti sedro ken saleng, ken amin a balitok a masapul iti daytoy a trabaho. Idi malpas dagiti patakder, inikkan ni Solomon ni Hiram iti duapulo a siudad iti sakup ti Galilea.

12Ngem idi makita ni Hiram dagiti siudad, dina nagustoan dagitoy

13ket kinunana ken ni Solomon: “Kastoy met gayam, kabsat, dagiti siudad nga intedmo kaniak!” Gapu iti daytoy, maaw-awagan pay laeng daytoy a daga iti Cabul.

14Nangited idi ni Hiram iti dandani lima a tonelada a balitok ken ni Solomon.

15Daytoy ti pakasaritaan ti inkapilitan a panagtrabaho nga imbilin ni Solomon kadagiti umili tapno mabangon ti Templo, ti palasio, ken ti bakud ti siudad, tapno magaburan ti akindaya a paset ti siudad, ken tapno matarimaan dagiti ili ti Hasor, Megiddo ken Gezer. (

16Rinaut idi ti ari ti Egipto ti Gezer, sinakupna ti siudad, pinatayna dagiti umili sana pinuoran ti siudad. Kalpasanna, intedna ti Gezer a kas regalona iti anakna idi nagkasarda ken ni Solomon.

17Tinarimaan ni Solomon ti siudad.) Inkapilitan met ti panagtrabaho dagiti tattao idi tarimaanenda ti Akimbaba a Bet-horon,

18Baalat, Tamar nga adda iti let-ang ti Juda,

19dagiti siudad a nakaidulinan dagiti abastona, dagiti siudad nga ayan dagiti kabalio ken dagiti luganna a pakigubat ken amin a kayatna a bangonen iti Jerusalem, Libano, ken iti sadinoman a lugar iti pagarianna.

20Iti inkapilitan a panagtrabaho, inaramat ni Solomon dagiti kaputotan dagiti tattao ti Canaan a saan a pinapatay dagiti Israelita idi innalada ti dagada—dagiti Amorreo, Heteo, Perezeo, Heveo ken Jebuseo. Tagabu pay laeng dagiti kaputotanda agpapan ita.

22Awan Israelita a tinagabu ni Solomon. Nagserbida kenkuana a soldado, ofisiales, kapitan a mangimaton kadagiti lugan a pakigubat ken dagiti nakakabalio a mannakigubat.

23Adda met dagiti kapatas—550 amin a mangimaton kadagiti trabahador iti nadumaduma a proyekto ni Solomon.

24Idi malpas ti palasio a pinaaramidna a pagnaedan ti asawana nga anak ti ari ti Egipto. Innalana manipud iti Siudad ni David sana pinagnaed iti palasio. Kalpasanna, ginaburanna ti akindaya a paset ti siudad.

25Mamitlo iti makatawen nga agidatag ni Solomon kadagiti daton a mapuoran ken daton a pakikappia iti altar a binangonna a maipaay ken ni Yahweh. Nagpuor met iti insenso iti imatang ni Yahweh. Ket nalpas ni Solomon ti Templo.

26Nagpaaramid met ni Solomon iti adu a barko idiay Eziongeber. Adda daytoy a siudad iti igid ti Baybay ti Aqaba iti asideg ti Elat idiay Edom.

27Imbaon ni Ari Hiram ti sumagmamano a tripulantena a makapagserbi kadagiti tattao ni Solomon.

28Naglayagda a napan idiay Ofir, ket idi agsublida, nangyawidda iti dandani 16 a tonelada a balitok nga agpaay ken ni Solomon.

← Chapter 8 Jump to: Chapter 10 →