2 Corinthians 11

Ilokano (Ti Baro a Naimbag a Damag Biblia) 1996

← Chapter 10 Jump to: Chapter 12 →

1Anusandak koma uray no adda bassit mamaagko. Wen, anusandak!

2Agimonak kadakayo, kas iti panagimon ti Dios. Mayarigkayo iti natarnaw a balasang nga intulagko a mayasawa laeng ken ni Cristo.

3Maamakak amangan no masabidongan ti panunotyo ket laksidenyo ti naan-anay ken nasin-aw a panagtulnogyo ken ni Cristo—kas iti pannakaallilaw ni Eva babaen iti nasikap nga uleg.

4Ngamin, awatenyo a siraragsak iti siasinoman nga umay mangikasaba kadakayo iti sabali a Jesus, saan a ti inkaskasabami. Ket bigbigenyo ti maysa nga espiritu ken maysa nga ebanghelio a maigiddiat iti Espiritu ken ebanghelio nga inawatyo kadakami.

5Ammok a saanak a nababbaba ngem dagitoy naisangsangayan nga “apostolesyo.”

6Nalabit a saanak a nalaing nga agsao, ngem saanak nga agkurang iti ammo. Inlawlawagmin daytoy kadakayo iti amin a tiempo ken gundaway.

7Awan uray sentimo a siningirko idi inkasabak kadakayo ti Naimbag a Damag. Nagpakumbabaak tapno maitan-okkayo. Basol kadi ti inaramidko?

8Bayat ti panagtrabahok iti arpadyo, tinangdanandak dagiti dadduma nga iglesia ket kas tay kunadan, tinakawak ida, tapno matulongankayo.

9Kabayatan ti kaaddak kadakayo, dikay rinengrengreng no masapulko ti kuarta. Intugot dagiti kakabsat a naggapu idiay Macedonia ti amin a masapulko. Kas iti napalabas, kastanto met iti masakbayan: Diakto agbalin a pakadagsenanyo!

10Babaen iti kinapudno ni Cristo nga adda kaniak, ikarik nga awan ti siasinoman iti entero nga Acaya ti mabalin a mangpasardeng kaniak iti daytoy a panagpasindayagko.

11Apay a kunak daytoy? Gapu kadi ta dikay ay-ayaten? Ammo ti Dios nga ay-ayatenkayo!

12Ituloyko latta ti ar-aramidek iti agdama tapno awan panggapuan dagita nga “apostoles” nga agpaspasindayag ken agkunkuna nga agtrabahoda a kas iti panagtrabahomi.

13Saan a pudno nga apostoles dagitoy a tattao. Sinan-apostolesda, manangallilawda iti amin nga aramidda, ket agpammarangda a pudno nga apostoles ni Cristo.

14Saan a nakaskasdaaw daytoy! Uray ni Satanas, kabaelanna ti agparang a kasla anghel ti lawag!

15Isu a saan a nakaskasdaaw no dagiti adipenna agpammarangda nga adipen ti kinalinteg. Ngem iti kamaudiananna, madusadanto kas mayannurot kadagiti aramidda.

16Ulitek: Awan koma ti mangipagarup a maagak. Ngem no ipagarupyo a maagak, awatendak ngarud a kas maysa a maag tapno adda met sangkabassit a pagpannakkelko.

17Kinapudnona, saan a kayat ti Apo ti banag a sasawek ita. Iti daytoy a panagpasindayag, pudno nga agsasaoak a kasla maag.

18Yantangay ta adu unay ti mangipasindayag iti nailubongan nga aramidda, agpasindayagak met.

19Masiribkayo la unay isut' gapuna a siraragsakak a mangan-anus iti maag!

20Ibturanyo ti pannakaadipenyo, ti pannakagundawayyo, ti pannakaumsiyo wenno ti pannakatungpayo.

21Mabainak a mangannugot, ngem dimi naitured nga inaramid dagita! Ngem no adda makaitured nga agpasindayag iti maysa a banag—agsasaoak a kaslaak la maysa a maag—maituredko met.

22Hebreoda kadi? Uray siak met. Israelitada kadi? Kastaak met. Kaputotan kadi ida ni Abraham? Uray siak.

23Adipen kadi ida ni Cristo? Kaslaak la agsasao a mauyong—ngem nalalaingak nga adipen ngem isuda! Narigrigat ti panagtrabahok. Naibalbaludak. Ad-adu ti pannakasaplitko. Ad-adu ngem isuda ti kaaddak iti ngarab ti tanem.

24Naminlima a sinaplitdak dagiti Judio iti sagtatallopulo ket siam.

25Namitlo a sinaplitdak dagiti Romano, ket naminsan a nauborak. Namitlo a narba ti barko a nagluganak, ket iti naminsan, maysa nga aldawko a nagpatpataw iti taaw.

26Iti namin-adu a panagbiahek, nagpeggadak kadagiti layus ken tulisan. Nagpeggadak kadagiti kadaraak a Judio ken kadagiti Hentil. Adu ti peggad kadagiti siudad. Peggad kadagiti let-ang. Peggad kadagiti tengnga ti taaw. Peggad kadagiti manglimlimo a gagayyem.

27Nabambannog ken narigrigatanak. Masansan a mapuyatanak. Nabisinan ken nawawak. Masansan nga awan kanek, awan balay a pagturogak wenno pagan-anayko.

28Malaksid kadagiti sabali pay a banag, inaldaw a madandanaganak gapu kadagiti amin nga iglesia.

29No adda kumapsut, kumapsutak met. No adda matnag iti basol, maladingitanak.

30No masapul nga agpasindayagak, ipasindayagko dagiti bambanag a mangipakita iti kinakapuyko.

31Ti Dios ken Ama ni Apo Jesus—madaydayaw koma ti naganna iti agnanayon—ammona a saanak nga agul-ulbod.

32Idi addaak idiay Damasco, pinaguardiaan ti gobernador nga adda iti babaen ni ari Aretas dagiti ruangan ti siudad tapno patiliwnak.

33Ngem inkabildak iti kuribot sadak impababa iti maysa a tawa ti bakud, ket nakalibasak kenkuana.

← Chapter 10 Jump to: Chapter 12 →