2 Peter 3

Ilokano (Ti Baro a Naimbag a Damag Biblia) 1996

← Chapter 2 Jump to:

1Gagayyemko, maikaduan daytoy a suratko kadakayo. Kadagitoy dua a surat, pinanggepko a patibkeren dagiti pakinakemyo babaen iti panangipalpalagipko kadagitoy a bambanag kadakayo.

2Laglagipenyo koma ti kinuna dagidi nasantoan a profeta ken ti imbilin ti Apo ken Mangisalakan nga impakaammo dagiti apostolesyo.

3Umuna unay, maawatanyo koma a kadagiti maudi nga aldaw, umayto kadakayo dagiti tattao nga awan sabali a panggepda no di ti mangtungpal iti dakes a tarigagayda. Pagang-angawandakayto

4a kunkunada, “Inkarina nga umay, saan kadi? Ayanna ngarud? Natayen dagiti ammami, ngem awan met nagbaliwan ti amin manipud pannakaparsua ti lubong!”

5Saanda a bigbigen ti kinapudno nga idi un-unana, nagbilin ti Dios ket timmaud ti langit ken ti daga. Naparsua ti daga manipud iti danum ken babaen iti danum.

6Ket ti danum met laeng, wen, daydi Layus, ti nangdadael iti daan a lubong.

7Ngem babaen iti isu met laeng a sao ti Dios, mataginayon ti agdama a langit ken daga tapno dadaelento ti apuy. Ta mapuorandanto inton dumteng dayta nga aldaw a pannakaukom ken pannakadadael dagiti awanan-dios.

8Ngem, gagayyemko, diyo liplipatan ti maysa a banag! Iti imatang ti Apo, awan paggiddiatan ti maysa nga aldaw ken sangaribu a tawen. Agpadpada dagitoy kenkuana.

9Saan nga itantan ti Apo a tungpalen ti inkarina, kas ipagarup ti dadduma. Ngem an-anusannakayo ti Apo gapu ta dina kayat a madadael ti siasinoman, no di ket kayatna nga agbabawi ti amin a tattao kadagiti basbasolda.

10Dumtengto ti Aldaw ti Apo a di mapakpakadaan, kas iti yaay ti mannanakaw. Iti dayta nga Aldaw, agpukawto dagiti langlangit a kagiddan ti napigsa a daranudor, ket matunaw iti apuy ti init, bulan ken dagiti bituen ket awanton ti daga ken amin a linaonna.

11Yantangay ta kastoy ti pannakadadaelto dagitoy, ania ngarud a kita ti tao ti pagbalinanyo? Masapul nga idatonyo ti bagiyo iti Dios ket agbiagkay a nasantoan.

12Kabayatanna, urayenyo ti idadateng ti Aldaw ti Dios. Aramidenyo ti amin a kabaelanyo a mangpapardas iti yaayna—ti Aldaw a pannakauram ken pannakadadael dagiti langlangit ken pannakatunawto dagiti planeta.

13Ngem namnamaentayo ti inkari ti Dios: ti baro a langit ken ti baro a daga a pagnaedanto ti kinalinteg.

14Iti kasta, gagayyemko, bayat ti panagur-urayyo iti dayta nga Aldaw, makikappiakayo iti Dios ket ikagumaanyo ti agbalin a nadalus ken awan pakapilawanna iti imatangna.

15Naanus ti Dios ket ibilangyo ti kinaanusna a kas gundaway nga itedna tapno maisalakankayo. Kasta met ti insurat kadakayo ni Pablo nga ingungotentayo a kabsat babaen iti panangaramatna iti kinasirib nga inted ti Dios kenkuana.

16Iti amin a suratna maipapan iti daytoy, kasta ti ipalpalagipna. Adda sumagmamano a bambanag a narigat a maawatan kadagiti sursuratna, ket balballikugen dagiti nengneng ken nakapuy ti pammatina a tattao a kas ar-aramidenda kadagiti dadduma a paset ti Nasantoan a Surat. Iti kasta, yegda ti bukodda a pannakadadael.

17Ngem dakayo, gagayyemko, ammoyon daytoy. Agannadkayo ngarud tapno dikayo mayaw-awan kadagiti biddut dagiti dakes a tattao ket matnagkayo manipud kadagiti natalged a lugaryo.

18Dumur-askayo iti parabur ken pannakaammoyo ken ni Jesu-Cristo nga Apo ken Mangisalakan kadatayo. Itan-ok ken idaydayawtayo ni Cristo, ita agingga iti agnanayon! Amen.

← Chapter 2 Jump to: