Acts 17

Ilokano (Ti Baro a Naimbag a Damag Biblia) 1996

← Chapter 16 Jump to: Chapter 18 →

1Sinursor da Pablo ken Silas ti Amfipolis ken Apolonia ket dimtengda idiay Tesalonica a yan ti maysa a sinagoga dagiti Judio.

2Kas iti masansan nga aramiden ni Pablo, napan iti sinagoga, ket iti las-ud ti tallo nga Aldaw a Panaginana, nakisarsarita kadagiti tattao. Inaramatna dagiti Nasantoan a Sursurat

3iti panangilawlawag ken panangipaneknekna a masapul nga agsagaba ken agungar ti Cristo. “Daytoy Jesus nga ipakaammok kadakayo,” kinunana, “isu ti Cristo.”

4Sumagmamano kadakuada ti namati a pudno ti saona. Kimmaduada kada Pablo ken Silas, kasta met ti adu a Griego nga agdaydayaw iti Dios ken adu kadagiti nalatak a babbai iti kagimongan.

5Ngem nagilem dagiti Judio. Inurnongda dagiti bulakbol iti kalkalsada sada nangparnuay iti riribuk iti siudad. Rinautda ti balay ti maysa a tao nga agnagan iti Jason, ta birbirokenda da Pablo ken Silas tapno idatagda ida kadagiti tattao.

6Idi saanda a masarakan dagiti dua, inulodda ni Jason agraman sumagmamano a kakabsat. Impanda ida iti saklang dagiti ofisiales ti siudad. “Mangriribuk dagitoy a tattao iti sadinoman a papananda,” impukpukkawda. “Ita, immayda ditoy siudadtayo,

7ket pinadagus ida ni Jason iti balayna. Isuda amin, salsalungasingenda dagiti linteg ti Emperador. Kunkunada nga adda sabali nga ari a managan Jesus.”

8Kasta unay ti pannakariribuk dagiti tattao ken dagiti turayen ti siudad a nakangngeg iti daytoy.

9Sakbay a napalubosan ni Jason ken dagiti dadduma a kakabsat, pinagfiansa ida dagiti agtuturay.

10Apaman a dimteng ti rabii, imbaon dagiti mamati da Pablo ken Silas idiay Berea. Idi makasangpetda sadiay, napanda a dagus iti sinagoga dagiti Judio.

11Mannakaawat dagiti taga-Berea. Saanda a kas kadagiti taga-Tesalonica. Sigagagarda a nagdengngeg iti mensahe. Inaldaw nga adalenda dagiti Nasantoan a Sursurat tapno ammoenda no pudno met laeng ti sasawen ni Pablo.

12Adu kadakuada ti namati agraman ti adu a Griego—dagiti mararaem a babbai ken lallaki iti kagimongan.

13Ngem idi madamag dagiti Judio idiay Tesalonica nga inkasaba met ni Pablo ti sao ti Dios idiay Berea, napanda sadiay ket sinugsoganda dagiti tattao a mangriribuk.

14Dinagdagus dagiti kakabsat nga imbaon ni Pablo a mapan iti igid ti baybay, ngem nagbati da Silas ken Timoteo.

15Sumagmamano a lallaki ti nangitulod ken ni Pablo idiay Atenas. Sakbay a nagsubli idiay Berea, imbilin ni Pablo kadakuada: “Masapul a sumurot kaniak da Silas ken Timoteo iti kabiitan a tiempo.”

16Bayat ti panaguray ni Pablo kada Silas ken Timoteo idiay Atenas, napalalo ti pannakariribukna gapu iti kaadu ti didiosen a nakitana iti siudad.

17Iti kasta, iti sinagoga, nakisarsarita kadagiti Judio ken kadagiti Hentil nga agdaydayaw iti Dios. Inaldaw met a kinasaona dagiti tattao a maisar-ong iti tiendaan.

18Nakisuppiat met kenkuana dagiti mamaestro nga Epicureo ken Estoico. Kinuna ti sumagmamano kadakuada, “Ania ti salsalawasawen daytoy aginsisirib a tao?” Kinuna met ti dadduma, “Kasla sabali a dios ti ikaskasabana.” Kinunada daytoy agsipud ta ikaskasaba ni Pablo ti maipapan ken ni Jesus ken iti panagungar.

19Inawisda ni Pablo ket inkuyogda iti taripnong ti konseho ti siudad a maaw-awagan iti Areopago. “Kayatmi nga ammoen daytoy baro a pannursuro a sarsaritaem,” kinunada.

20“Karkarna dagiti sasawem ket kayatmi a maammoan ti kaipapananda!” (

21Magustoan dagiti taga-Atenas ken dagiti ganggannaet nga agnanaed sadiay ti agsarsarita ken agdengdengngeg kadagiti kabarbaro a banag.)

22Timmakder ni Pablo iti sangoanan ti Areopago ket kinunana kadagiti taga-Atenas, “Makitak a relihiosokayo iti amin a banag.

23Ta iti panagpasiarko iti siudadyo ken pannakakitak kadagiti disso a pagdaydayawanyo, nasarakak ti maysa nga altar a nakaisuratan ti kastoy: ‘Maipaay iti Dios a di Am-ammo.’ Nupay diyo am-ammo dayta a pagdaydayawanyo, isu ita ti ipakaammok kadakayo.

24Ti Dios a namarsua iti lubong ken kadagiti amin a linaonna, isu ti Apo ti langit ken daga. Saan nga agnaed kadagiti templo nga aramid ti tao.

25Dina met masapul ti aniaman nga ited ti tao babaen iti panagserbina kenkuana, ta isu ti mangted iti biag iti amin a parsua, ken iti isuamin a banag.

26Pinarsuana ti amin a kita ti puli iti sangkataoan, ket pinagnaedna ida iti amin a paset ti daga. Isu a mismo ti nangikeddeng kadagiti tiempo ken pagpatinggaan dagiti disso a pagnaedanda.

27Inaramidna daytoy tapno sapulenda ti Dios, bareng no masarakanda bayat ti panagar-arikapda a mangbirok kenkuana. Nupay kasta, saan nga adayo ti Dios iti uray siasinoman kadatayo,

28ta kastay kunadan, ‘Agbiag, aggunay ken addatayo kenkuana.’ Kas iti kuna ti sumagmamano a mannaniwyo, ‘Ta uray datayo, annakna met.’

29Yantangay ta annaknatayo ti Dios, ditay koma ipagarup nga umasping ti Dios iti ladawan a balitok wenno pirak wenno bato a sinukog ti kinalaing ken kabaelan ti tao.

30Pinalabas ti Dios dagiti tiempo a di pannakaammo kenkuana ti tao. Ngem ita, bilinenna ti amin a tattao a tallikudanda ti kinadakesda.

31Ta intudingna ti aldaw a panangukomnanto a sililinteg iti entero a lubong babaen iti pinilina a tao. Intedna ti pammaneknek kadagiti amin a tattao babaen iti panangpagungarna iti dayta a tao.”

32Idi mangngegda a nagsao ni Pablo maipapan iti panagungar ti natay, rinabrabak ti sumagmamano kadakuada, ngem kinuna met ti dadduma, “Kayatmi ti dumngegto manen kenka maipapan iti daytoy.”

33Iti kasta, pinanawan ni Pablo ti taripnong.

34Adda dagiti naallukoyna ket namatida. Mairaman kadakuada ni Dionisio a kameng ti Areopago ken ti maysa a babai nga agnagan Damaris. Ket adda pay dagiti dadduma a namati.

← Chapter 16 Jump to: Chapter 18 →