Daniel 2

Ilokano (Ti Baro a Naimbag a Damag Biblia) 1996

← Chapter 1 Jump to: Chapter 3 →

1Iti maikadua a tawen a panagturay ni Nebucadnesar, adda natagtagainepna a nangriribuk unay kenkuana ken puon ti saanna a nakaturturogan.

2Iti kasta, pinaayabanna dagiti amin a mammuyon, salamangkero, baglan ken managanito tapno ibagada ti kaipapanan ti tagtagainepna. Idi dimmatagda,

3kinuna ti ari kadakuada, “Mariribukanak iti natagtagainepko. Kayatko a maammoan ti kaipapananna.”

4Simmungbatda ket kinunada iti pagsasao nga Arameo, “Sapay koma ta agbiag ti Natan-ok nga Ari iti agnanayon! Ibagam ti tagtagainepmo ket ipalawagmi ti kaipapananna.”

5Kinuna ti ari kadakuada, “Naikeddengkon a no diyo maibaga kaniak ti tagtagainep ken ti kaipapananna, marangrangkaykayto ket marakrakto pay dagiti balbalayyo.

6Ngem no maibagayo kaniak ti tagtagainep ken ti kaipapananna, gunggonaankayo babaen ti pannangtedko kadagiti sagut ken pammadayaw. Ibagayo ngarud kaniak ita ti tagtagainep ken ti kaipapananna.”

7Kinunada manen nga insungbat, “Natan-ok nga Ari, no ibagam kadakami ti tagtagainepmo, ipalawagmi kenka ti kaipapananna.”

8Gapu iti daytoy, kinuna ti ari, “Husto tay kunak. Kayatyo a dadaelen ti tiempo agsipud ta makitayo a naikeddengkon ti rumbeng a mapasamak.

9No saanyo a maibaga ti tagtagainepko, agpapada ti dusayo. Nagnunumoanyo nga ulbodendak bareng no agbaliw ti panunotko. Ibagayo ngarud kaniak ti tagtagainep; iti kasta, maammoak no kabaelanyo pay nga ibaga ti kaipapananna.”

10Simmungbat dagiti mammagbaga, “Awan ti tao ditoy rabaw ti daga a makaibaga iti kalikagumam, O Ari. Awan pay ari, uray pay isu ti katan-okan ken kabilgan, a nagdawat iti kastoy kadagiti mammuyon, salamangkero, wenno baglan.

11Natan-ok nga Ari, awan ti makaibaga iti sungbat ti saludsodmo malaksid dagiti didiosen, ngem saanda met a makipagtaeng kadagiti tattao.”

12Gapu iti dayta, kasta unay ti pungtot ni Nebucadnesar, ket imbilinna a mapapatay amin a mammagbaga iti ari iti Babilonia.

13Naipaulog ti bilin a mapapatayda amin agraman ni Daniel ken dagiti gagayyemna.

14Napan ni Daniel ken ni Arioc a kapitan dagiti guardia ti ari ken nabilin a mangipatungpal iti pannakapapatay dagiti mamasirib iti Babilonia.

15Sinaludsodna ken ni Arioc no apay a nangipaulog ti ari iti kasta a bilin. Iti kasta, imbaga ni Arioc kenkuana ti napasamak.

16Dinagdagus ni Daniel ti napan iti ari ket kiniddawna ti ad-adu a tiempo tapno maibagana kenkuana ti kaipapanan ti tagtagainep.

17Kalpasanna, nagawid ni Daniel ket impakaammona kada Hananias, Misael ken Azarias ti napasamak.

18Imbagana kadakuada nga agdawatda iti kaasi ti Dios ti langit tapno ipaltiingna kadakuada ti tagtagainep ket saanda a mairaman a mapapatay kadagiti mammagbaga iti Babilonia.

19Iti dayta a rabii, babaen iti maysa a parmata, naipakaammo ken ni Daniel ti nasao a palimed. Iti kasta, dinaydayawna ti Dios ti langit. Kinunana:

20“Masirib ken mannakabalin ti Dios! Madaydayaw iti agnanayon awan inggana.

21Iturayanna dagiti panawen ken tiempo; isu ti mangisaad ken mangikkat kadagiti ari. Ikkanna dagiti tattao iti sirib ken pannakaawat.

22Ipakaammona dagiti nauneg ken nalimed a banag; ammona dagiti nailemmeng iti nasipnget, ket ti Dios nalawlaw iti lawag.

23Agdaydayaw ken agraemak kenka, O Dios dagidi kapuonak. Inikkannak iti sirib ken pigsa; impangagmo ti kararagko, ket impakaammom kadakami ti tagtagainep ti ari.”

24Napan ngarud ni Daniel ken ni Arioc a dinutokan ti ari a mangpapatay kadagiti mamasirib ti Babilonia. Kinunana, “Dimo patpatayen ida. Itulodnak iti ari ta ibagak kenkuana ti kaipapanan ti tagtagainepna.”

25Dinardaras ni Arioc nga impan ni Daniel iti sangoanan ni Nebucadnesar. Kinunana iti ari, “Adtoy ti maysa kadagiti Judio a napagtalaw a kas balud a nasarakak a makaibaga kenka iti kaipapanan ti tagtagainepmo.”

26Sinaludsod ti ari ken ni Daniel (a napanagan pay iti Beltesazar), “Maibagam kadi kaniak ti natagtagainepko ken ti kaipapananna?”

27Simmungbat ni Daniel, “Natan-ok nga Ari, awan ti baglan, salamangkero, mammuyon wenno astrologo a makaibaga iti dayta.

28Ngem adda Dios sadi langit a makaibaga kadagiti palimed. Impakaammona kenka, Natan-ok nga Ari, ti mapasamak iti masakbayan. Daytoy ti tagtagainep, ti parmatam idi matmaturogka.

29“Idi matmaturogka, O Natan-ok nga Ari, natagtagainepmo ti maipapan iti masakbayan; ket ti Dios a mangipakaammo kadagiti palimed impakitana kenka ti mapasamakto.

30Ita, naipaltiing kaniak ti palimed, saan a gapu ta masirsiribak ngem ti siasinoman a tao, no di ket tapno maipakaammo kenka ti kaipapanan ti tagtagainepmo ket maawatam dagiti pampanunot a dimteng kenka.

31“Natagtagainepmo, O Ari, ti maysa a dakkel nga estatua a naraniag ken agrimrimat. Nagtakder iti sangoanam ket nakabutbuteng a matmatan.

32Puro a balitok ti ulona. Pirak ti barukong ken takkiagna, ket bronse ti tian ken dagiti luppona.

33Landok dagiti gurongna; landok ken damili dagiti sakana.

34Idi kitkitaem ti estatua, adda dakkel a bato a nagreggaay iti bantay. Nagdisso ti bato kadagiti landok ken damili a saka ti estatua, ket naburburakda.

35Dagus a narumrumek ti landok, damili, bronse, pirak ken balitok; nagbalinda a kasla tapok iti pagtaltagan no tiempo ti kalgaw. Nayanginda amin ket pulos nga awan ti nabati a paset ti estatua. Ngem nagbalin a dakkel a bantay daydi bato a nagdisso iti estatua, ket nadappatanna ti entero a daga.

36“Daytoy ti tagtagainepmo ket daytoy met ti kaipapananna.

37Sika, Apo, ti katan-okan kadagiti amin nga ari. Pinagbalinnaka ti Dios ti langit nga ari ket inikkannaka iti pannakabalin, bileg ken dayaw.

38Pinagturaynaka iti amin a tao, animal ken tumatayab iti amin a lugar. Sika ti ulo a balitok.

39Kalpasan ti panagturaymo, tumaudto ti sabali nga imperio, ngem saanto a mannakabalin a kas iti pagariam. Kalpasanna, addanto tumaud a maikatlo nga imperio a bronse a mangituray iti entero a daga.

40Natangkento met a kas iti landok ti maikapat a pagarian. No kasano ti panangburak ken panangdadael ti landok iti amin, kastanto ti panangburak ken panangrumek daytoy a pagarian kadagiti immun-una a pagarian.

41Nakitam met a naglaok a damili ken landok dagiti saka ken ramayna. Kayatna a sawen, a mabingbingayto a kas imperio. Ngem natangkento a kas iti landok, uray no naglaok a landok ken damili.

42Kastoy met ti kayat a sawen ti sakana a naaramid iti naglaok a landok ken damili: napigsanto ti pagarian, ngem nalakanto a marpuog.

43Nakitam pay a naglaok ti landok ken damili. Kayatna a sawen a padasento dagiti agtuturay a pagkaykaysaen dagiti familiada babaen iti panagiinnasawada, ngem didanto agtalinaed iti kasta a kasasaad kas iti saan a mabalin a panaglaok ti landok ken damili.

44Iti panawen dagitoy nga agturay, mangipasdekto ti Dios ti langit iti pagarian a pulos a dinto agpatingga. Saanto a maparmek dayta a pagarian ngem gibusannanto dagiti amin a pagarian. Isu laeng ti agpaut iti agnanayon.

45Nakitam a nargaay ti bato manipud iti bantay ket rinumrumekna ti estatua a landok, bronse, damili, pirak ken balitok. Ipakaammo ti naindaklan a Dios iti Natan-ok nga Ari ti mapasamak iti masakbayan. Imbagak ti pudno a tagtagainepmo ken ti napaypayso a kaipapananna.”

46Nagpakleb ni Ari Nebucadnesar kas pammadayawna ken ni Daniel. Kalpasanna, imbilinna a maidatag ken ni Daniel dagiti sakrifisio ken daton.

47Kinuna ti ari ken ni Daniel, “Ti Diosmo ti katan-okan kadagiti amin a didiosen, ti Apo dagiti ar-ari. Isu ti mangipalgak kadagiti palimed agsipud ta naipalawagmo daytoy a palimed.”

48Insaadna ni Daniel iti nangato a pagtakeman. Inikkanna iti adu a sagut ket pinagbalinna a gobernador iti entero a probinsia ti Babilonia. Isu pay ti insaadna a pangulo dagiti amin a mammagbaga iti pagarian.

49Pinatgan ti ari ti kiddawna a madutokan da Sedrac, Mesac ken Abednego a mangimaton kadagiti aramid iti probinsia ti Babilonia. Nagbati ni Daniel iti palasio.

← Chapter 1 Jump to: Chapter 3 →