Ezra 9

Ilokano (Ti Baro a Naimbag a Damag Biblia) 1996

← Chapter 8 Jump to: Chapter 10 →

1Kalpasan amin dagitoy, immay kaniak ti sumagmamano a pangulo nga Israelita ket imbagada a makipulpulapol dagiti Israelita, dagiti papadi ken dagiti Levita kadagiti tattao iti aglawlaw a pagilian. Kapulpulapolda dagiti tattao ti Canaan, Ammon, Moab ken Egipto, wenno kadagiti Heteo, Perezeo, Jebuseo ken Amorreo. Tultuladenda met dagiti makarimon nga aramid dagitoy a tattao.

2Nangasawa dagiti Judio kadagiti ganggannaet a babbai, isut' gapuna a namulitan dagiti nasantoan a tattao ti Dios. Dagiti papangulo ken ofisiales ti kangrunaan a nagbasol.

3Idi mangngegko daytoy, rinay-abko ti pagan-anayko gapu iti ladingitko. Pinarutko dagiti buok ken barbasko, ket nagtugawak a nasneban iti leddaang.

4Nagtugawak sadiay a sililiday agingga iti rabii a panagidatag kadagiti daton. Inaribungbongandak dagiti tattao, dagiti amin a mabuteng iti imbaga ti Dios ti Israel maipapan kadagiti basol dagiti nagsubli a napagtalaw a kas balud.

5Idi dumtengen ti oras ti panagidaton iti rabii, timmakderak iti ayanko a nagladladingit. Siaaruatak pay laeng iti naray-ab a pagan-anayko. Nagparintumengak ket inkararagko ken ni Yahweh a Diosko:

6“O Dios, mabainak unay a mangitangad iti rupak kenka. Nangatngaton ngem ti ulomi dagiti agrurutap a basolmi, ket tumuknoda sadi langit.

7Manipud pay iti tiempo dagiti kapuonanmi, adu unayen ti basolmi a tattaom. Gapu iti daytoy, natnagkam iti pannakabalin dagiti ganggannaet nga ari—dakami, dagiti arimi ken dagiti papadimi. Napapatay, natakawan ken naitalawkami a kas balud, ket naibabainkam iti kasta unay agingga ita.

8O Apo a Diosmi, kinaasiannakam iti apagbiit, ket impalubosmo nga adda dagiti makalibas kadakami ken agbiag a sitatalged iti daytoy nasantoan a lugar. Inlisinakam iti pannakatagabu ket inikkannakami iti baro a biag.

9Tagabukami idi ngem dimo impalubos nga agtalinaedkam iti pannakatagabu. Gapu kenka, naasian kadakami dagiti ari ti Persia ket pinalubosannakami nga agbiag ken mangbangon manen iti nadadael a Templom, ken tapno agbiagkami a natalged iti Juda ken Jerusalem.

10“Ngem ita, O Dios, ania pay ti masaomi kalpasan amin dagitoy a napasamak? Sinalungasingmi manen dagiti bilin

11nga intedmo kadakami babaen kadagiti adipenmo a profeta. Imbagada kadakami a saan a nadalus ti daga nga inkam tagikuaen agsipud ta pinunno dagiti agnanaed sadiay kadagiti narugit ken makarimon nga aramid.

12Imbagada pay a no kayatmi a tagikuaen ti daga, no kayatmi a maipatawid kadagita kaputotanmi, dikam mangasawa kadagita a tattao ken dimi tultulongan ida a rumang-ay wenno agballigi.

13Kalpasan amin dagitoy a napasamak kadakami a dusami gapu kadagiti basol ken labsingmi, ammomi a sika a Diosmi, dinusanakam iti nalaglag-an ngem ti rumbeng koma a dusami, ket impalubosmo nga agbiagkami.

14Ania pay ti pambaranmi a mangsalungasing manen kadagiti bilbilinmo ket makiasawakami kadagitoy managdakdakes a tattao? No aramidenmi daytoy, awan duadua a kapungtotnakami unay ket ikisapnakami a mamimpinsan. Iti kasta, awan ti makalasat kadakami.

15O Apo a Dios ti Israel, nalintegka; nagbasolkami, ngem impalubosmo a makalasatkami. Ipudnomi kenka dagiti basolmi. Awan ti kalinteganmi a dumatag iti saklangmo.”

← Chapter 8 Jump to: Chapter 10 →