Joel 3

Ilokano (Ti Baro a Naimbag a Damag Biblia) 1996

← Chapter 2 Jump to:

1Kuna ti Apo, “Iti dayta a tiempo, isublikto ti Juda ken ti Jerusalem manipud pannakakayawda.

2Ummongekto dagiti amin a pagilian, ket ipanko ida idiay Tanap ni Josafat. Sadiayto ti pangukomak kadakuada gapu iti amin nga inaramidda kadagiti tattaok. Inwarawarada dagiti Israelita kadagiti sabali a pagilian. Biningbingayda ti dagak nga Israel.

3Nagbibinnunotda no siasino kadakuada ti mangala kadagiti balud. Nagilakoda kadagiti ubbing tapno adda pagbayadda iti balangkantis a babai ken iti arak.

4“Ania ti kayatyo nga aramiden kaniak, Tiro, Sidon, ken amin a Filistia? Kayatdak kadi a balsen gapu iti inaramidko? No kayatdak a balsen, dagdagusenkayto a balsen!

5Innalayo dagiti pirak ken balitokko, ket impanyo dagiti napateg a gamengko kadagiti temployo.

6Impanawyo dagiti tattao ti Juda ken Jerusalem iti pagilianda ket inlakoyo ida kadagiti Griego.

7Ita, iruarko ida kadagiti disso a nangilakoanyo kadakuada. Aramidekto met kadakayo ti inaramidyo kadakuada.

8Ipaluboskonto a mailako dagiti annakyo kadagiti taga-Juda a mangilakonto met kadakuada kadagiti taga-Saba nga adda iti adayo a pagilian. Ni Yahweh ti nagsao iti daytoy.

9“Ipakaammoyo daytoy kadagiti nasion: ‘Agsaganakayo a makigubat! Ayabanyo dagiti mannakigubat. Ummongenyo amin a soldado, ket inkayo!

10Aramidenyo a kampilan dagiti aradoyo; aramidenyo a gayang dagiti paggapasyo. Uray ti nakapuy masapul a makiranget.

11Darasenyo ti umay, dakay amin a kabangibang a nasion, ket agtitiponkayo iti tanap.’” O Apo, ibaonmo ti armadam a mangdarup kadakuada.

12“Masapul nga agsagana dagiti pagilian, ket mapanda idiay Tanap ni Josafat. Sadiay, siak, ni Yahweh, agtugawakto a mangukom kadagiti amin a kabangibang a nasion.

13Dakesda la unay; Paraspasem ida a kas iti trigo iti tiempo ti panagani. Pespesem ida a kas iti ubas a maladdit iti napno a pagpespesan agingga nga aglippias ti arak.”

14Rinibribu dagiti adda iti Tanap ti Pangeddeng. Dumtengen sadiay ti aldaw ni Yahweh.

15Agsipnget ti init ken ti bulan; saanen nga agraniag dagiti bituen.

16Agpukkaw ni Yahweh manipud Bantay Sion; manipud Jerusalem, agallangogan ti timekna. Agkintayeg ti daga ken ti tangatang, ngem salaknibannanto dagiti tattaona.

17“Mabigbigmonto, Israel, a siak ni Yahweh a Diosmo. Agnaedak iti Sion a nasantoan a turodko. Agbalinto a nasantoan a siudad ti Jerusalem; saanton a parmeken dagiti ganggannaet.

18Inton dumteng dayta nga aldaw, masaknapanto iti ubas dagiti kabambantayan; adunto ti baka kadagiti katurturodan; nabuslonto ti danum iti entero a Juda. Addanto waig nga aggapu iti Templo ni Yahweh, ket padanumannanto ti Tanap dagiti Acacia.

19“Agbalinto a let-ang ti Egipto; agbalinto met a langalang ti Edom. Ngamin, rinautda ti daga ti Juda, ket pinapatayda dagiti tattao nga awan basolna.

20Ibaleskonto dagiti napapatay; diakto pakawanen dagiti nakabasol. Agnanayonton nga adda agnaed idiay Juda ken idiay Jerusalem, ket siak, ni Yahweh, agtaengakto idiay Bantay Sion.”

← Chapter 2 Jump to: