Joshua 23

Ilokano (Ti Baro a Naimbag a Damag Biblia) 1996

← Chapter 22 Jump to: Chapter 24 →

1Adun a tawen ti napalabas manipud impaay ni Yahweh ti kappia iti Israel. Saanen a riniribuk dagiti kabusor iti aglikmutda. Lakay unayen ni Josue.

2Inayabanna dagiti amin nga Israelita, dagiti panglakayen, pangulo, ukom ken ofisiales dagiti tattao, ket kinunana, “Lakayak unayen.

3Nakitayon ti amin nga inaramid ti Apo a Diostayo kadagitoy a pagilian gapu kadakayo. Ti Apo a Diosyo ti nakigubgubat iti agpaay kadakayo.

4Intudingko a tagikuaen dagiti tribuyo ti daga dagiti tattao a pinarmekko ken amin a nabati pay a nasion manipud iti Jordan agingga iti Taaw Mediterranean.

5Pagsanudento ida ti Apo a Diosyo, ket mapaksiatdanto bayat ti idadarupyo. Kukuayonto ti dagada, kas inkari kadakayo ti Apo a Diosyo.

6Ngarud, ikagumaanyo a tungpalen ti amin a nailanad iti Linteg ni Moises. Diyo salungasingen ti uray maysa a pasetna.

7Dikay makilangen kadagiti nabati a tattao iti dennayo wenno baliksen ti nagan dagiti diosda wenno pagsapata ti naganda wenno agserbi kadakuada wenno agdaydayaw kadakuada.

8Agtalinaedkayo ketdi a napudno iti Apo a kas iti inar-aramidyo agpapan ita.

9Iti imatangyo, pinaksiat ti Apo ti dadakkel ken nabibileg a pagilian, ket awan pay ti makabael a mangparmek kadakayo.

10Mabalin a pagtarayen ti uray maysa kadakayo ti sangaribu a tattao, gapu ta ti Apo a Diosyo ti makirupak iti biangyo a kas inkarina.

11Isut' gapuna nga ikagumaanyo nga ayaten ti Apo a Diosyo.

12No sumiasikayo, ket tumiponkayo kadagiti tattao nga adda pay la a nabati iti sidongyo, ken makiasawakayo kadakuada,

13namnamaenyo a dinton paksiaten ti Apo a Diosyo dagitoy a pagilian. Napeggaddanto a kas iti silo wenno palab-og a pakatinnaganyo, ken saplit kadagiti bukotyo wenno siit kadagiti matayo agingga a mapukawkay iti daytoy nasayaat a daga nga inted kadakayo ti Apo a Diosyo.

14“Ita, dandaniakon sumina iti daytoy a biag. Ammoyo iti amin a puso ken kararuayo nga inted ti Apo a Diosyo ti amin nga agkakaimbag a banag nga inkarina. Naaramid amin; awan ti saan a natungpal.

15Wen, tinungpal ti Apo a Diosyo ti amin a naimbag a banag a kinunana nga aramidenna. Ngem no salungasingenyo ti tulag ti Apo a Diosyo nga imbilinna a tungpalenyo, no agserbi ken agdaydayawkayo kadagiti didiosen, dusaennakayto gapu iti pungtotna ket iti saan a mabayag, awanton ti matda kadakay iti daytoy nasayaat a daga nga intedna kadakayo.”

← Chapter 22 Jump to: Chapter 24 →