Judges 21

Ilokano (Ti Baro a Naimbag a Damag Biblia) 1996

← Chapter 20 Jump to:

1Naguummong dagiti lallaki nga Israelita idiay Mizpa ket insapatada ken ni Yahweh: “Saanminto nga ipalubos nga adda Benjaminita a mangasawa iti siasinoman nga anakmi a babai.”

2Kalpasanna, napan dagiti tattao idiay Betel ket nagyanda sadiay agingga iti rabii. Iti imatang ti Dios, silaladingitda a nangidung-aw;

3“ Apo a Dios ti Israel, apay a naaramid daytoy iti Israel? Apay a kasapulan a mapukaw ti tribu ti Benjamin?”

4Iti sumuno a bigat, nasapa a bimmangon dagiti tattao ket nagaramidda iti altar sadiay. Nangidatagda iti daton a pakikappia ken daton a mapuoran.

5Sinaludsodda, “Asino kadagiti tribu ti Israel ti saan a nakigimong idiay Mizpa iti imatang ti Apo?” (Ngamin, nagkarida idi a mapapatay ti siasinoman a saan a mapan sadiay tapno sumango ken ni Yahweh.)

6Kasta unay ti ladingitda gapu iti napasamak kadagiti kakabsatda a Benjaminita. Kinunada, “Ita nga aldaw, napukaw ti Israel ti maysa kadagiti tribuna.

7Ania ti aramidentayo tapno adda yasawatayo kadagiti lallaki a nabati agsipud ta insapatatayo iti Apo a ditay yasawa kadakuada dagiti annaktayo?”

8Nagdamagda no ania kadagiti tribu ti Israel ti saan a dimmar-ay iti taripnong ni Yahweh idiay Mizpa. Natakuatanda nga awan ti siasinoman a taga-Jabes idiay Galaad a napan nakigimong sadiay.

9Idi saggaysa a maawagan dagiti tattao, pudno nga awan naggapu idiay Jabes.

10Iti kasta, nangibaon ti entero a gimong iti 12,000 a katuredan a tattaoda ket daytoy ti naibilin kadakuada, “Inkayo idiay Jabes ket patayenyo amin a taga-sadiay, agraman babbai ken ubbing.

11Patayenyo amin a lallaki agraman dagiti babbai a saan a birhen.”

12Napanda idiay Jabes ket nakasarakda iti 400 a babbalasang; impanda ida idiay kampo ti Silo idiay Canaan.

13Pinaibaga ti entero a gimong kadagiti Benjaminita nga adda iti lugar a maaw-awagan iti Bato ti Rimmon a nagsardengen ti gubat.

14Nagsubli dagiti Benjaminita. Inted dagiti Israelita kadakuada dagiti babbalasang a dida pinatay idiay Jabes. Ngem nagkurang ti bilang dagiti babbai.

15Naasian dagiti tattao kadagiti Benjaminita ta nangaramid ni Yahweh iti giwang ti panagkaykaysa dagiti tribu ti Israel.

16Iti kasta, kinuna dagiti pangulo ti entero a gimong, “Awanen babbai iti tribu ti Benjamin. Ania ti aramidentayo tapno adda yasawatayo kadagiti nabati a lallaki?

17Masapul a saan a mapukaw iti Israel ti maysa kadagiti sangapulo ket dua a tribuna. Kasano ti pamay-antayo tapno mataginayon ti tribu ni Benjamin?

18Ditay mabalin nga ipaasawa kadakuada dagiti annaktayo, gapu ta inlunodtayo ti siasinoman a mangipalubos iti anakna a balasang nga asawaen ti Benjaminita.”

19Pagammoan, nalagipda a dandanin ti tinawen a fiesta ni Yahweh idiay Silo. (Adda ti Silo iti amianan ti Betel, abagatan ti Lebona ken dayaen ti kalsada iti nagbaetan ti Betel ken Sikem.)

20Imbagada kadagiti Benjaminita, “Inkay aglemmeng iti kaubasan,

21ket agsiputkayo. No lumabas dagiti babbalasang ti Silo a mapan agsala iti fiesta, rummuarkayo iti kaubasan ket mangtiliw ti tunggal maysa kadakayo iti asawaenna a yawidna iti sakup ti Benjamin.

22No umayto agriri kadakami ti ama wenno kabsatda, kunaminto kadakuada a kasla dakayo ti agsasao: ‘Pangngaasiyo ta ipalubosyo nga asawaenmi ida, ta dimi met rinabsut ida iti paggugubatan. Uray ta diyo inted ida kadakami, saanyo ngarud a sinalungasing ti sapatayo.’”

23Kasta ti inaramid dagiti Benjaminita: Pimmili ti tunggal maysa iti asawaenna kadagiti babbalasang nga agsalsala ket ginuyodna nga impanaw. Nagsublida iti sakupda, binangonda manen dagiti ilida ket nagnaedda sadiay.

24Nagawid met dagiti dadduma nga Israelita. Napan ti tunggal maysa iti pagtaenganna, iti tribu, familia ken bukodna a daga.

25Iti daydi a panawen, awan ari ti Israel ket inaramid ti tunggal maysa ti kinaykayatna.

← Chapter 20 Jump to: