Matthew 10

Ilokano (Ti Baro a Naimbag a Damag Biblia) 1996

← Chapter 9 Jump to: Chapter 11 →

1Inayaban ni Jesus dagiti sangapulo ket dua nga adalanna. Inikkanna ida iti pannakabalin a mangpaksiat kadagiti dakes nga espiritu, ken mangpaimbag kadagiti agsagsagaba iti amin a kita ti sakit ken an-annayen.

2Dagitoy dagiti sangapulo ket dua nga apostoles: umuna, da Simon (a managan Pedro) ken Andres a kabsatna; da Santiago ken Juan nga annak ni Zebedeo;

3da Felipe ken Bartolome; ni Tomas ken ni Mateo, ti agsingsingir iti buis; ni Santiago nga anak ni Alfeo, ken ni Tadeo;

4ni Simon a Patriota ken ni Judas Iscariote a mangliput ken ni Jesus.

5Imbaon ni Jesus dagitoy sangapulo ket dua. Kastoy ti imbilinna kadakuada: “Dikayo mapmapan iti uray sadino a daga dagiti Hentil wenno iti uray sadino nga ili dagiti Samaritano.

6Ngem inkayo ketdi kadagiti napukaw a karnero iti nasion ti Israel.

7Inkayo ikasaba daytoy, ‘Asidegen ti Pagarian ti Langit!’

8Paimbagenyo dagiti masakit, pagungarenyo dagiti natay, agasanyo dagiti agkukutel ken paksiatenyo dagiti demonio. Awan imbayadyo iti inawatyo. Ngarud, diyo pabayadan ti ipaayyo.

9Dikayo mangitugot iti kuarta—balitok man wenno pirak wenno gambang.

10Dikayo met mangitugot iti bay-on, uray bado a pagsukatan, uray sapatos wenno sarukod, ta karbengan ti mangmangged ti maikkan iti kasapulanna.

11“No dumtengkayo iti maysa nga ili wenno barrio, bumirokkayo iti mayat nga umawat kadakayo. Agyankayo kenkuana agingga a pumanawkayo iti dayta a lugar.

12No sumrekkayo iti maysa a balay, kunayo, ‘Dios ti mangted iti talna kadakayo.’

13No awatendakayo dagiti akimbalay, ibatiyo ti inkablaawyo a talna. No didakayo awaten, ibabawiyo ti inkablaawyo.

14“Kasta met a no adda balay wenno ili a dinto umawat wenno dumngeg kadakayo, panawanyo ida ket pampagenyo ti tapok kadagiti sakayo.

15“Laglagipenyo nga inton Aldaw ti Panangukom, nalaglag-anto ti dusa nga ipalak-am ti Dios kadagiti taga-Sodoma ken Gomorra ngem kadagiti tattao iti dayta nga ili.”

16“Dumngegkayo! Ibaonkayo a kas karnero iti ayan ti arban dagiti lobo. Ngarud, masapul a nasiribkayo a kas iti uleg ken naamokayo a kas iti kalapati.

17Agannadkayo, ta addanto dagiti tattao a mangtiliw ken mangisaklang kadakayo iti pangukoman. Saplitendakayto iti uneg dagiti sinagoga.

18Gapu kaniak, maisaklangkayto iti sangoanan dagiti agtuturay ken ar-ari tapno paneknekanyo kadakuada ken kadagiti Hentil ti Naimbag a Damag.

19Ngem inton addakayo iti sangoanan ti ukom, diyonto pakadanagan no anianto ti sawenyo wenno kasanonto ti panangisaoyo. Maipaltiingto ti sawenyo inton dumteng dayta a tiempo.

20Ta saanto nga agtaud kadakayo ti ibalikasyo; agtaudto iti Espiritu ni Amayo nga agsasao kadakayo.

21“Papapatayto dagiti tattao dagiti bukodda a kakabsat. Kastanto met ti aramiden dagiti amma kadagiti annakda. Busorento dagiti annak dagiti nagannak kadakuada ket papapataydanto ida.

22Guraendakayto dagiti tattao gapu kaniak. Ngem ti siasinoman a makaibtur agingga iti panungpalan, maisalakanto.

23No idadanesdakayo iti maysa nga ili, inkayo agkamang iti sabali nga ili. Ibagak kadakayo a diyonto pay malpas ti trabahoyo iti amin nga il-ili ti Israel, inton umay ti Anak ti Tao.

24“Saan a natantan-ok ti agad-adal ngem ti maestrona; saan met a naturturay ti adipen ngem ti apona.

25Ngarud, mapnek koma ti agad-adal no agbalin a kas iti maestrona; kasta met ti adipen, no agbalin a kas iti apona. No Beelzebub ti ipanaganda iti pangulo ti maysa a familia, naal-alasto pay ti maipanagan kadagiti kamkameng ti familiana.”

26“Dikay ngarud agbuteng kadagiti tattao; ta awan ti nailemmeng a dinto maiparangarang, ket awan met ti palimed a dinto mailatak.

27Ti ibagak kadakayo iti kasipngetan, isaoyo iti lawag; ket ti mayarasaas kadakayo, ipukkawyo iti tuktok dagiti balbalay.

28Dikay agbuteng kadagiti mangpapatay iti bagi, ngem dida mabalin a papatayen ti kararua. Agbutengkayo ketdi iti Dios, isu a makabalin a mangpatay iti bagi ken kararua idiay infierno.

29Iti maysa a sentimo makagatangkayo iti dua a sallapingaw. Nupay kasta, awan matnag uray maysa kadakuada no di ipalubos ni Amayo.

30No maipapan kadakayo, uray dagiti buokyo nabilangda aminen.

31Isut' gapuna a dikay agbuteng ta napatpategkayo nga adayo ngem ti adu a sallapingaw.”

32“Siasinoman a mangipaduyakyakto kaniak, ipaduyakyakkonto met iti imatang ni Amak sadi langit.

33Ngem ti mangilibak kaniak, ilibakkonto met iti sangoanan ni Amak sadi langit.”

34“Diyo ipagarup nga immayak mangyeg iti kappia ditoy lubong. Diak immay mangyeg iti kappia no di ket kampilan.

35Immayak tapno pataudek ti ibubusor dagiti annak a lallaki kadagiti ammada, dagiti annak a babbai kadagiti innada, dagiti manugang a babbai kadagiti katuganganda a babbai.

36Dagiti kabusor ti tao isuda met laeng dagiti kameng ti familiana.

37“Ti dakdakkel ti panagayatna iti amana wenno iti inana ngem ti panagayatna kaniak, saan a maikari nga agbalin nga adalak; ti dakdakkel ti panagayatna kadagiti annakna ngem ti panagayatna kaniak, saan a maikari nga agbalin nga adalak.

38Siasinoman a di mangibaklay iti krusna ken sumurot kaniak, saan a maikari nga agbalin nga adalak.

39Siasinoman a mangipangpangruna iti biagna, mapukawnanto; ket ti makapukaw iti biagna gapu kaniak, masarakannanto.”

40“Siasinoman nga umawat kadakayo, siak met laeng ti awatenna. Siasinoman nga umawat kaniak, awatenna met ti nangibaon kaniak.

41Siasinoman nga umawat iti profeta gapu ta maysa a profeta, magunggonaanto met a kas iti pannakagunggona ti profeta. Siasinoman nga umawat iti nalinteg a tao, gapu ta isu ket nalinteg, magunggonaanto met a kas iti pannakagunggona ti nalinteg a tao.

42Laglagipenyo a ti siasinoman a mangted iti uray sangabaso laeng a nalamiis a danum iti maysa kadagitoy nanumo a pasurotko, gapu ta isu ket pasurotko, awan duadua nga awatennanto ti gunggonana.”

← Chapter 9 Jump to: Chapter 11 →