Micah 5

Ilokano (Ti Baro a Naimbag a Damag Biblia) 1996

← Chapter 4 Jump to: Chapter 6 →

1Tattao ti Jerusalem, aglemmengkayo kadagiti sarikedked! Nalakubtayon! Darupendan ti pangulo ti Israel!

2Kuna ti Apo, “Betlehem iti Efrata, sika ti maysa kadagiti kabassitan nga ili ti Juda. Ngem pataudek kenka ti maysa a mangituray iti Israel a nagtaud ti kapuonanna idi ugma.”

3Ngarud, yawatto ni Yahweh dagiti tattaona kadagiti kabusorda agingga nga ipasngay ti babai ti anakna a lalaki. Kalpasanna, agsublinto dagiti kadaraanna a naitalaw a kas balud ket maitiponda kadagiti kailianda.

4Inton umay, iturayannanto dagiti tattaona babaen iti bileg nga aggapu iti Apo ken ti dayag ti Apo a Dios. Natalgedto ti panagbiag dagiti tattaona agsipud ta bigbigento dagiti tattao iti sangalubongan ti kinatan-okna,

5ket yegnanto ti kappia. No rauten dagiti taga-Asiria ti pagiliantayo ket rebbaenda dagiti sarikedkedtayo, ipasangotayo a mangsaranget kadakuada dagiti kapigsaan a pangulotayo.

6Parmekendanto ti Asiria, ti daga ni Nimrod, babaen kadagiti kampilanda. Ispalendatayto kadagiti taga-Asiria inton sakupenda ti dagatayo.

7Addanto dagiti makalasat kadagiti kaputotan ni Jacob. Mayarigdanto iti makapabang-ar a linnaaw nga aggapu iti Apo a maipaay kadagiti adu a nasion, kas iti arbis a mangbisibis kadagiti agtubtubo a mula. Agpannuraydanto iti Dios, saan nga iti tao.

8Addadanto kadagiti sidong dagiti nasnasion. Mayarigdanto iti leon nga agbirbirok iti taraonna iti bakir wenno iti pagpastoran. Sumrek iti ayan dagiti karnero ket tukmaan ken rangrangkayenna ida. Awan ti mangisalakan kadakuada.

9Parmekento dagiti natda a kaputotanna dagiti kabusorda ket ikisapdanto ida amin.

10Kuna ti Apo, “Iti dayta a tiempo, italawkonto dagiti kabalioyo ket dadaelekto amin a luganyo a pakigubat.

11Rebbekekto dagiti siudad iti dagayo ket rebbaekto dagiti sarikedkedyo.

12Dadaelekto dagiti anting-anting nga ar-aramatenyo. Pukawekto amin a mammadlesyo.

13Dadaelekto dagiti imahen ken dagiti nasagradoan nga adigi a bato a pagdaydayawanyo. Dikayton agdaydayaw kadagiti inaramidyo met laeng.

14Duprakekto dagiti imahen ni Asera a didiosen iti dagayo, ket dadaelekto dagiti siudadyo.

15Iti nakaro a pungtotko, balsekto dagiti nasion a di nagtulnog kaniak.”

← Chapter 4 Jump to: Chapter 6 →