Revelation 13

Ilokano (Ti Baro a Naimbag a Damag Biblia) 1996

← Chapter 12 Jump to: Chapter 14 →

1Nakitak ti maysa a narungsot nga animal a rumrumkuas iti taaw. Pito ti ulona ket sangapulo met ti sarana. Nagkorona ti tunggal sara ket iti tunggal ulo, adda dagiti naisurat a nagan a nanglais iti Dios.

2Kasla leopardo ti nakitak nga animal, kasla agsaksaka nga oso, ken kasla agngiwngiwat a leon. Inted kenkuana ti dragon ti bukodna a pannakabalin, ti trono ken ti naindaklan a turayna.

3Kasla nasugat ti maysa nga ulo ti animal. Nagistayanna impatay daytoy ngem immimbag met laeng. Nasdaaw dagiti amin a tattao iti lubong iti napasamak ket simmurotda iti animal.

4Nagdaydayaw dagiti amin a tattao iti dragon gapu ta intedna ti turayna iti animal. Nagdaydayawda met iti animal. “Siasino ti kas iti narungsot nga animal?” kinunada. “Siasino ti makabael a makirupak kenkuana?”

5Napalubosan ti narungsot nga animal nga agsalawasaw, agsao iti maibusor iti Dios, ken agturay iti uneg ti 42 a bulan.

6Rinugianna ti agsao iti maibusor iti Dios, iti nagan ti Dios, iti balay ti Dios ken amin nga agnaed sadi langit.

7Napalubosan a manggubat ken mangparmek kadagiti tattao ti Dios, ket naikkan iti kalintegan a mangituray kadagiti tattao iti amin a tribu, pagilian, pagsasao ken puli.

8Agdaydayawto kenkuana dagiti amin a tattao iti rabaw ti daga, malaksid dagiti naisurat ti naganda iti libro ti biag sakbay a naparsua ti lubong. Daytoy a libro kukua ti napapatay a Kordero.

9“Dumngeg ngarud ti siasinoman nga adda pannakaawatna!

10Siasinoman a nairanta a matiliw, matiliwto. Ti nairanta a mapapatay iti kampilan, mapapatayto iti kampilan. Daytoy ti pakasapulan iti panagibtur ken pammati iti biang dagiti tattao ti Dios.”

11Nakakitaak manen iti sabali a narungsot nga animal a rimmuar iti daga. Dua ti sarana a kasla sara ti karnero, ngem kasla agsasao a dragon.

12Inaramatna ti amin a turay ti immuna a narungsot nga animal. Pinilitna ti daga ken dagiti amin nga agnanaed ditoy nga agdaydayawda iti umuna a narungsot nga animal a naimbaganen ti sugat a dandanina impatay.

13Nagiparang kadagiti nakaskasdaaw a pagilasinan ti maikadua a narungsot nga animal. Iti imatang ti amin, pinagtinnagna ditoy daga ti apuy manipud langit.

14Inallilawna amin a tattao nga agnanaed ditoy daga babaen kadagiti pagilasinan a naipalubos nga iparangna iti imatang ti umuna a narungsot nga animal. Imbaga ti narungsot nga animal kadagiti tattao ditoy lubong a mangaramidda iti ladawan a pammadayaw iti narungsot nga animal a nasugat iti kampilan ngem nagbiag.

15Napalubosan ti maikadua a narungsot nga animal a mangted biag iti ladawan ti immuna, tapno makasao ti ladawan ken mabalinna a patayen dagiti amin a saan nga agdaydayaw kenkuana.

16Pinilit ti narungsot nga animal dagiti amin a tattao, nanumo ken natan-ok, nabaknang ken napanglaw, tagabu ken siwawayawaya, a mamarkaan iti makannawan nga ima wenno iti mugingda.

17Awan ti makapaglako wenno makapaggatang no saan naimarka kenkuana ti nagan ti animal wenno ti numero a kaibatogan ti naganna.

18Kasapulan ditoy ti kinasirib. Mabalin a maammoan ti masirib ti kaipapanan ti numero ti animal gapu ta kaibatogan daytoy ti nagan ti lalaki. Ti numero ket 666.

← Chapter 12 Jump to: Chapter 14 →