2 Thessalonians 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1หฒวัง ก๋อ-โย์ว อ่า, ก๊อง เถา บัว เญย เฒี้ยว เยซู กีตู่ แอ๋ง ต้าย หย่า ก๊อง เถา นิ่น อ๋อย เซียว ฒุ้น บัว, ปุน บัว เหธา นิ่น เยียม, เยีย บัว โท้ เม่ย บัว

2ไม้ ตู๋ง เฮญี้ยว ฮวาง เฮญี้ยว หลุ่น, เหว่ย หฒุ ม่าย เต๋ย เมี่ยน ก๊อง เฒี้ยว ต้าย เญย ฮนอย เถา ลิ์ว อ๊ะ. ไม้ กุ๊น ม่าย เมี่ยน ก๊อง สีง ลี่ง ปุน เยีย บัว โต่ว หว่า, ไฟ ฒุ่น ต้าย ก๊อง ไฟ เฟี้ย เฝียน ฮนั้ง น้าย นอ ก๊อง.

3ไม้ ตู๋ง ปุน หาย เต้า หล่ง หาย หญู่ง หฒะเอ๋ย ดั๊ว เม่ย บัว. วั้ว นอม ฮนอย ไม้ แก้ง เถา, ฒู้ง อ๋อย หฒุ ม่าย น้าย เต๋ย สี่ ธ้วด. เมี่ยน อ๋อย แหง่ง เจี๊ยน ทิน-ฮู่ง, หย่า ม่าย ป์าม เล์ย-หลัด วั้ว เต้า หิ่น ธ้วด ต้าย, ต้ง ฒู้ง อ๋อย หฒุ เหมียด วั้ว เต้า.

4นิ่น อ๋อย แหง่ง เจี๊ยน หย่า เธง กั้น เก้า โฮล เจี๋ย ต้ง เมี่ยน เห่ว เฒี่ยน เหธา เมี่ยน หฒั่ง เญย เหยียด ฒู้ง. นิ่น ฒู้ง อ๋อย เฒว์ย เจี๊ยน หฒั่ง ทิน-ฮู่ง เญย เปย๊า กะญั์ว ก๊อง นิ่น กั้น โหฒว ทิน-ฮู่ง.

5เม่ย บัว จั๋ง ไม้ ตุ๊ ไฟ? เยีย เหธา เม่ย บัว เยียม วั้ว หฒั่น เยีย ฒู้ง เฒาะ น้าย เต๋ย สี่ บั๋ว เม่ย บัว หมี่ อ๊ะ.

6เม่ย บัว หย่า ฮิ้ว ตุ๊ หาย หญู่ง ตั๊ง เจี๊ยน ไม้ แก้ง ปุน น้าย เต๋ย สี่ ธ้วด. ฮนั้ง หน่าย, เถา เฒี่ยง โห่, ป์าม เล์ย-หลัด วั้ว เต้า ฯฒฯ หิ่น ธ้วด ต้าย อ๊ะ.

7อี้ หฒั่น ป์าม เล์ย-หลัด เญย ชะ เป่ย เดี๊ย โหฒว กง, มป่า ตั๊ง เจี๊ยน น้าย เต๋ย ชะ วั้ว เต้า อ๋อย ตั๊ง เจี๊ยน มี่ง เถา ทิน-ฮู่ง ต้อ นิ่น ธ้วด มี่ง.

8เถา วั้ว หฒั่น ป์าม เล์ย-หลัด วั้ว เต้า อ๋อย หิ่น ธ้วด ต้าย. มป่า เฒี้ยว เยซู แอ๋ง เหฌี่ย ต้าย วั้ว หฒั่น, เยซู ฯฒฯ หล่ง เยียม ฑุ่ย ปย๊ม ธ้วด เญย เฉีย ไต๋ วั้ว เต้า, หย่า หล่ง เหฌี่ย ต้าย วั้ว หฒั่น ม่าย เญย ฌัง-หล่าง เหมียด เหฑ่ง นิ่น.

9ป์าม เล์ย-หลัด วั้ว เต้า ต้าย วั้ว หฒั่น เซ หฒิว ซาตาน โหฒว เญย กง, หย่า ม่าย ซาตาน เญย ชะ โหฒว หญู่งๆ จ๊า เญย จั๋ง-โห่ เหธา บัวะ ฮ่อง เญย สี่.

10นิ่น หย่า อ๋อย หล่ง หญู่งๆ กู๊ ไกว๋ เญย เอ๊าะ หฒะเอ๋ย ดั๊ว อ๋อย หฒุ เหมียด เญย เมี่ยน. นิ่น บัว หฒุ เหมียด เหว่ย หฒุ นิ่น บัว ไม้ ฮนั้ม เฒียน เล์ย ฯฒฯ ไม้ ตุ๊ เหฌียว.

11เหว่ย น้าย ทิน-ฮู่ง ปุน นิ่น บัว หฒุ ดั๊ว เมี่ยน โหฒว ต่อง เญย ชะ กุ๊น เจี๊ยน, ดั๊ว นิ่น บัว เสียน จ๊า เญย.

12ฮนั้ง หน่าย, ไม้ เสียน เฒียน เล์ย, ต๋าว หฑวน อะเฮน้ย โหฒว ฒุ์ย เญย หฒวัง เมี่ยน, ฒู้ง อ๋อย หฒุ ตี่ง ฒุ์ย อ๊ะ.

13เฒี้ยว ฮนั้ม เญย หฒวัง ก๋อ-โย์ว อ่า, เยีย บัว อ๋อย หฒุ หฒั่นๆ เหว่ย เม่ย บัว แล์ง ฒี่ง ทิน-ฮู่ง, เหว่ย หฒุ เยียม กอน ทิน-ฮู่ง กิ๊น เม่ย บัว เหว่ย ปุน เม่ย บัว ตุ๊ เหฌียว. เม่ย บัว ตุ๊ เหฌียว เซ เหว่ย เม่ย บัว เขา สีง ลี่ง ปุน เม่ย บัว เป๋น ทิน-ฮู่ง เญย ธีง-เหฑ่ง เมี่ยน, หย่า เหว่ย เม่ย บัว เสียน เฒียน เล์ย.

14ทิน-ฮู่ง หล่ง เยีย บัว ฒุ่น เญย คู้ เฝียน เห่ว เม่ย บัว ต้าย เสียน. หย่า เห่ว เม่ย บัว ต้าย เหว่ย ตุ๊ ป่วน บัว เญย เฒี้ยว เยซู กีตู่ เญย ฌัง-หล่าง.

15ก๋อ-โย์ว อ่า, อ๋อย หฒุ เสียน ว้วน, ไม้ ตู๋ง ปู๋ง ด๊อด เยีย บัว หฌาว เญย เฒียน เล์ย, ไม้ กุ๊น เยีย บัว ฒุ่น เญย หว่า ไฟ เฟี้ย เฝียน หฌาว เญย หว่า.

16โท้ บัว เญย เฒี้ยว เยซู กีตู่ กั้น เหธา บัว เญย หฒั่ง เตี๋ย ทิน-ฮู่ง, ต้ง ฮนั้ม บัว, หย่า เหธย เอน เหยียด ลิ์ว ออน บัว เญย เฮญี้ยว, หย่า ปุน หลง ไห่ เญย ม่าย ลั่ม ฮนั้ม, วั้ว เต้า,

17ออน เม่ย บัว เญย เฮญี้ยว หย่า เหลียบ ว้วน เม่ย บัว เหว่ย โหฒว หญู่งๆ คู้ สี่ หย่า ก๊อง หญู่งๆ คู้ หว่า.

← Chapter 1 Jump to: Chapter 3 →