Ezra 1

Mien Bible (Thai Script) © Thailand Bible Society, 2007

Jump to: Chapter 2 →

1ไซลัด โหฒว เปเซีย กั๊วะ เญย ฮู่ง ต้าว หฮญัง วั้ว หฮญัง, เหว่ย ปุน เฒี้ยว หล่ง เยเลมี โต่ว เญย หว่า ธ้วด ต้าย ต๋อย-ติ่ว, เฒี้ยว ต์ง หฒุ ไซลัด ฮู่ง เญย เฮญี้ยว, ปุน นิ่น เฟี้ย เฒ้ย โซว หย่า ฒุ่น ก๋อม นิ่น เญย กั๊วะ ก๊อง,

2“เปเซีย กั๊วะ เญย ฮู่ง เตี๋ย, ไซลัด, ฮนั้ง น้าย นอ ก๊อง. “‘ เฒี้ยว, ลู่ง หฒั่ง เญย ทิน-ฮู่ง, เฒาะ ลู่ง เดี๊ย หม่าน กั๊วะ จิว ปุน เยีย. นิ่น หย่า พ้าย เยีย เยียม ยูดา เต่ย-ปูง, เยลูซาเลม ฒี่ง, เหว่ย นิ่น เหธย นอม หฒั่ง ทิน-ฮู่ง เญย เปย๊า.

3เยียม เม่ย บัว หฒวัง เมี่ยน บุด๋ง, ตะฟ่าน โหฒว ทิน-ฮู่ง เญย แปะ ฝีง วั้ว เต๋ย, โท้ นิ่น บัว เญย ทิน-ฮู่ง เหธา นิ่น บัว เก๊าะ-เมี่ยน เยียม. กุ๊น หฑวน ยูดา เต่ย- ปูง, เยลูซาเลม ฒี่ง, เหธย หฒั่ง เฒี้ยว เญย เปย๊า, เซ อิสะลาเอน เมี่ยน เญย ทิน-ฮู่ง, ต้ง เยียม เยลูซาเลม วั้ว เต้า ทิน-ฮู่ง เญย เปย๊า.

4ม่าย หาย เต้า หฒุ กว๊าด ต้าย เญย เมี่ยน, ไม้ กุ๊น เยียม หาย นอม ต๋อง, ปุน วั้ว นอม ต๋อง เญย เมี่ยน เถง เจียม ญ่าน เหธา เฉียม หล่ง เญย กะน้าย เหธา แซง-คู้. ธ้วด ลิ์ว น้าย, เซว่ย เมี่ยน ธ้วด ฟิม ฝ่ง ห่อ กะน้าย เหว่ย เยลูซาเลม ฒี่ง, หฒั่ง ทิน-ฮู่ง เญย เปย๊า.’”

5ยูดา เหธา เบนยามิน ฝีง เญย ปู้ง ป่วน เปย๊ย เฒ้ย เหธา ไซ เมี่ยน เหธา เลวี เมี่ยน, เซ ต้ง ทิน-ฮู่ง ต์ง หฒุ เฮญี้ยว เญย เหยียด ฒู้ง เมี่ยน, ฯฒฯ หลิ่ว เล์ย หฑวน เยลูซาเลม เหธย หฒั่ง เฒี้ยว เญย เปย๊า.

6เยียม นิด ฟัด นิ่น บัว วั้ว เต๋ย เมี่ยน ปุน กะน้าย เหว่ย เถง นิ่น บัว. ปุน ญ่าน จา-ต๋อง, ปุน เจียม, ปุน เฉียม หล่ง เญย กะน้าย เหธา แซง-คู้, แอ๋ง เหธา ม่าย จ๋า-ฒิ่น เญย กะน้าย. ธ้วด ลิ์ว น้าย เต๋ย, กั้น หธะเหล่ง ม่าย เมี่ยน ธ้วด ฟิม ฝ่ง ห่อ กะน้าย.

7ไซลัด ฮู่ง เตี๋ย แอ๋ง เฒาะ ธ้วด หฒั่ง เฒี้ยว เญย เปย๊า เญย จา-ต๋อง, ต้ง ฒิ่น ด่าง เนบูคัดเน้ดซา ฮู่ง เยียม เยลูซาเลม ธ้าง ต้าย อัน เจี๊ยน นิ่น กั้น เญย เฒี่ยน เญย หมิ่ว-เปย๊า.

8เปเซีย กั๊วะ เญย ฮู่ง, ไซลัด, พ้าย โก๋ว ฮู่ง เตี๋ย เญย จา-ตี้ง เญย เจียน, มิดเลดาด, เฒาะ น้าย เต๋ย จา-ต๋อง ธ้วด ต้าย. มิดเลดาด ซ้าว ลิ์ว แอ๋ง ปุน ยูดา เญย ต้ม เจียน, เซ้ดบัดซา.

9จา-ต๋อง เญย โสว โหม่ว ม่าย ฮนั้ง น้าย. เจียม-ปุ้น 30 นอม ญ่าน ปุ้น 1,000 นอม ญ่าน เปี้ยน 29 นอม

10เจียม-หฑ่อม 30 นอม ญ่าน หฑ่อม 410 นอม กั้น หญู่ง จา-ต๋อง 1,000 นอม

11เจียม ญ่าน เญย จา-ต๋อง เหยียด ฒู้ง ม่าย ปยา ธิน เฝย แป๊ะ นอม. หฒุ กว๊าด มี่ง บาบีโลน เญย เมี่ยน หฑวน เยลูซาเลม วั้ว หฒั่น, เซ้ดบัดซา ต้อ น้าย เต๋ย เหยียด ฒู้ง จา-ต๋อง เหธา เจี๊ยน หฑวน.

Jump to: Chapter 2 →