Galatians 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เม่ย บัว หฮงง ไห่ เญย กาลาเทีย เมี่ยน อ้า! หาย เต้า โหฒว ฟ้าด ดั๊ว เม่ย บัว ฮนั้ม ต่อง? เยีย เม่งๆ เญย ก๊อง เยซู กีตู่ เยียม เหฒียบ หฑั่ง จ๋า ไต่ เญย เจ๊า, ฮนั้ง เม่ย บัว กั้น เญย มฒีง ตุ๊ ปวัด เจี๊ยน นอ.

2เยีย อ๋อย เม่ย บัว บั๋ว เหยียด หญู่ง เยีย. เม่ย บัว ฒิบ สีง ลี่ง เซ เหว่ย เม่ย บัว เอย เจี๊ยน เล์ย-หลัด โหฒว ไฟ เหว่ย เม่ย บัว ไฮ์ คู้ เฝียน ฯฒฯ เสียน?

3เม่ย บัว ฝู่ง ด่ง หน่าย หฮงง? เม่ย บัว หล่ง สีง ลี่ง เจี์ย เหฒียง กอน, อี้ หฒั่น เม่ย บัว อ๋อย หล่ง ป้าม เมี่ยน เญย หฒะเอ๋ย โหฒว เหฒียง ไฟ?

4เม่ย บัว เสี่ยว โค้ว ด่ง หน่าย ธั้ม เซ ไม้ ลั่ม หล่ง ไฟ? ด่ง หาย ม่าย ลั่ม หล่ง เญย ซ่าะ?

5ทิน-ฮู่ง ปุน สีง ลี่ง เม่ย บัว หย่า เยียม เม่ย บัว บุด๋ง โหฒว บัวะ ฮ่อง เญย สี่ เซ เหว่ย เม่ย บัว เอย เจี๊ยน เล์ย-หลัด โหฒว ไฟ เหว่ย เม่ย บัว ไฮ์ คู้ เฝียน ฯฒฯ เสียน?

6ฮนั้ม หมั่ง ก๋า อับลาฮัม! “นิ่น เสียน ทิน-ฮู่ง, ทิน-ฮู่ง ฯฒฯ ฝุน อับลาฮัม เหธา นิ่น หอบ เฮญี้ยว.”

7วั้ว หญู่ง, เม่ย บัว อ๋อย หฒุ ฮิ้ว ตุ๊, เสียน ทิน-ฮู่ง วั้ว เต๋ย เซ โหฒว อับลาฮัม เญย เฒียน เฒ้ย-ฟุน.

8กีง-โซว จา-ด่าง ฮิ้ว ตุ๊ ทิน-ฮู่ง อ๋อย ปุน จั๋น เหว่ย เสียน นิ่น ตุ๊ เหธา นิ่น หอบ เฮญี้ยว. กีง-โซว ฯฒฯ จา-ด่าง ฒุ่น คู้ เฝียน บั๋ว อับลาฮัม, “ลู่ง เดี๊ย เมี่ยน อ๋อย เหว่ย เม่ย ตุ๊ ทิน-ฮู่ง เหธย ฟุ.”

9อับลาฮัม เสียน ทิน-ฮู่ง, ทิน-ฮู่ง ฯฒฯ เหธย ฟุ ปุน นิ่น. ฟี่ ฮนั้ง เญย, เหยียด ฒู้ง เสียน เญย เมี่ยน, ทิน-ฮู่ง อ๋อย เหธย ฟุ.

10ตะฟ่าน เขา เล์ย-หลัด เญย เมี่ยน หฒุ เหฒียว, เหว่ย หฒุ กีง-โซว ก๊อง, “หาย เต้า ไม้ เอย เหฑ่ง เล์ย-หลัด โซว เฟี้ย เจี๊ยน เญย เหยียด ฒู้ง, วั้ว เต้า หฒุ เหฒียว อ๊ะ.”

11ฮนั้ง หน่าย ปวัด ตุ๊ เม่ง เญย. เอย ทิน-ฮู่ง หมั่ง, ไม้ ม่าย หาย เต้า เขา เล์ย-หลัด ตุ๊ เหธา ทิน-ฮู่ง หอบ เฮญี้ยว, เหว่ย หฒุ กีง-โซว ก๊อง, “หาย เต้า เสียน เขา ทิน-ฮู่ง ฯฒฯ เหธา ทิน-ฮู่ง หอบ เฮญี้ยว, วั้ว เต้า ตุ๊ เฒี่ยง เจี๊ยน.”

12มป่า เล์ย-หลัด ไม้ ปั่ง เสียน ฟิม โหฒว กอน-โด๊ะ. เหว่ย หฒุ กีง-โซว ก๊อง, “หาย เต้า เอย เจี๊ยน เล์ย-หลัด, วั้ว เต้า ตุ๊ เฒี่ยง เจี๊ยน.”

13เล์ย-หลัด ปุน บัว หฒุ เหฒียว มป่า กีตู่ หฒุ เหฒียว ตี๊ บัว ฯฒฯ หฒัวะ บัว เล่ย ดุ๊ด เล์ย-หลัด. เหว่ย หฒุ กีง-โซว ก๊อง, “หาย เต้า หฒุ ขวัง เจี๊ยน เดี๋ยง, วั้ว เต้า หฒุ เหฒียว อ๊ะ.”

14กีตู่ เยซู ฮนั้ง น้าย นอ โหฒว เหว่ย ปุน จั๋น ไฮ่ เสียน นิ่น ฯฒฯ ตุ๊ ทิน-ฮู่ง เหธย ฟุ ฮนั้ง นิ่น เหธย ฟุ ปุน อับลาฮัม วั้ว นอ. ฮนั้ง หน่าย ปุน บัว เหว่ย เสียน กีตู่ ฯฒฯ ตุ๊ ฒิบ ทิน-ฮู่ง แล์ง ปุน เญย สีง ลี่ง.

15หฒวัง ก๋อ-โย์ว อ่า, เยีย อ๋อย เป๊ย เหยียด หญู่ง โพว-ทง เญย สี่. สี ก๊อง ม่าย อี ล่าน เมี่ยน ต้ง เฮญี้ยว เหลียบ เหฒียง แหง่ง หว่า, หาย เต้า หย่า ไม้ ไฮ่ กวั่ง หย่า ไม้ ไฮ่ ทิบ.

16ทิน-ฮู่ง แล์ง เหฒียง หว่า ปุน อับลาฮัม เหธา นิ่น เญย เฒ้ย-ฟุน. ก๊อง “เฒ้ย-ฟุน” วั้ว โจ๋ว หว่า, ไม้ เฒ์ย ก๊อง เถา “เหยียด หฒวัง เฒ้ย-ฟุน,” ต้ง เมี่ยน ธั้ม วั้ว หญู่ง. กีง-โซว ก๊อง เถา ดุ เต้า นิ่น เญย เฒ้ย-ฟุน ฮนั้ง, เซ ต้ง กีตู่.

17เยีย เญย เอ๋ย เล์ย เซ ฮนั้ง น้าย. ทิน-ฮู่ง เหลียบ เหฒียง แหง่ง หว่า หย่า แล์ง เอย เจี๊ยน แหง่ง หว่า โหฒว. ฆะฮ้า เฝย แป๊ะ ฟ่า เหฒียบ หฮญัง ทิน-ฮู่ง เหลียบ เล์ย-หลัด ต้าย, มป่า เล์ย-หลัด ไม้ ไฮ่ ปุน วั้ว เต๋ย แล์ง เญย หว่า ด๊อด ไฟ ไม้ ลั่ม หล่ง.

18สี ก๊อง อ๋อย หฒุ เขา เล์ย-หลัด หธีง ตุ๊ หฑิบ ทิน-ฮู่ง อ๋อย เหธย ปุน เญย นอ, ฯฒฯ ไม้ หฒุ เขา ทิน-ฮู่ง แล์ง เญย หว่า. มป่า ทิน-ฮู่ง อ๋อย เหธย ปุน อับลาฮัม เญย, นิ่น เอย นิ่น แล์ง เญย หว่า เหธย ปุน หมี่ อ๊ะ.

19วั้ว หญู่ง, ทิน-ฮู่ง เหว่ย หาย ติ่ว เหลียบ เล์ย-หลัด ต้าย? ทิน-ฮู่ง ทิบ เล์ย-หลัด ต้าย เหว่ย ปุน ธีง ฒุ์ย ฮนั้ง หาย นอ, ฒั้ว อ๋อย ฒิบ ทิน-ฮู่ง แล์ง เญย หว่า วั้ว เต้า อับลาฮัม เญย เฒ้ย-ฟุน ต้าย เถา. เซ ฟิน-เมี่ยน จิว ปุน เต้า บุด๋ง เมี่ยน เหลียบ เล์ย-หลัด ต้าย.

20โหฒว บุด๋ง เมี่ยน ไม้ เฒ์ย ขูง เถง เหยียด ปูง ฮนั้ง. มป่า ทิน-ฮู่ง เป๋น เหยียด เต้า.

21ฮนั้ง หน่าย, เล์ย-หลัด เหธา ทิน-ฮู่ง แล์ง เญย หว่า ไม้ ตะก้อย ไฟ? ฒู้ง ไม้ เฒ์ย. สี ก๊อง ทิน-ฮู่ง เหลียบ หญู่ง เล์ย-หลัด ปุน เมี่ยน ม่าย เฒี่ยง แหม่ง, เมี่ยน ฯฒฯ ไฮ่ เขา เล์ย-หลัด ตุ๊ เหธา ทิน-ฮู่ง หอบ เฮญี้ยว.

22มป่า กีง-โซว ก๊อง ลู่ง เดี๊ย เมี่ยน หฒุ ฒุ์ย เญย ชะ กุ๊น เหว่ย ปุน เสียน เยซู กีตู่ วั้ว เต๋ย ไฮ่ ตุ๊ ทิน-ฮู่ง แล์ง เหธย ปุน เญย. นิ่น บัว ตุ๊ ต้าย เซ เหว่ย นิ่น บัว เสียน.

23เมี่ยน เสียน กีตู่ ตุ๊ เหธา ทิน-ฮู่ง หอบ เฮญี้ยว เญย เฒี่ยง โห่ ไม้ แก้ง เถา, เล์ย-หลัด ขวน เจี๊ยน บัว ฮนั้ง ขวน ฒุ์ย-เมี่ยน นอ, ฒั้ว เถา เมี่ยน ตุ๊ เสียน กีตู่ เญย เฒี่ยง โห่ ธ้วด ต้าย อ๊ะ.

24ฮนั้ง หน่าย, เล์ย-หลัด กุ๊น เจี๊ยน บัว เถา กีตู่ ต้าย วั้ว หฒั่น, เหว่ย ปุน เมี่ยน เสียน กีตู่ ตุ๊ เหธา ทิน-ฮู่ง หอบ เฮญี้ยว.

25อี้ หฒั่น เสียน กีตู่ เญย เฒี่ยง โห่ เถา, บัว ไม้ หฒุ เล์ย-หลัด กุ๊น อ๊ะ.

26เม่ย บัว เหยียด ฒู้ง เหว่ย เสียน กีตู่ เยซู ตุ๊ โหฒว ทิน-ฮู่ง เญย น่าม โญ์ว.

27เม่ย บัว เจี๋ย ววม เญย เล์ย ตุ๊ เหธา กีตู่ จวั่ง แหม่ง เฒี่ยง, ฯฒฯ ก๊อย เหยี่ยน ตุ๊ กีตู่ เญย เฟียม-ฝีง.

28เหว่ย น้าย ยิวไท เมี่ยน ไฟ จั๋น ไม้ กั้น หญู่ง, โหฒว โน่ว เญย ไฟ ไม้ โหฒว โน่ว เญย, มจั่ง ไฟ มเซียะ หย่า ไม้ กั้น หญู่ง. เม่ย บัว เหธา กีตู่ เยซู จวั่ง แหม่ง เฒี่ยง เหยียด ฒู้ง ฯฒฯ เป๋น เหยียด หญู่ง ฮนั้ง.

29สี ก๊อง เม่ย บัว เป๋น กีตู่ เญย, เม่ย บัว ฯฒฯ เป๋น อับลาฮัม เญย เฒ้ย-ฟุน หย่า อ๋อย หฑิบ ทิน-ฮู่ง แล์ง เหธย ปุน เญย.

← Chapter 2 Jump to: Chapter 4 →