Psalms 89

Mien Bible (Thai Script) © Thailand Bible Society, 2007

1โอ เฒี้ยว อ่า, เยีย อ๋อย เหยียด ลิ์ว ป๋าว ฑูง เธง เม่ย เหฒียบ ฒัวะ เญย ฮนั้ม เมี่ยน. เยีย อ๋อย หล่ง เยีย เญย ฑุ่ย ฒุ่น เม่ย เหฒียบ ฒัวะ เญย เฮญี้ยว ก๊อง บั๋ว เหยียด ต่อย เจี๋ย เหยียด ต่อย.

2เยีย อ๋อย ก๊อง เม่ย อ๋อย เหยียด ลิ์ว เหฒียบ ฒัวะ เญย ฮนั้ม เมี่ยน. เม่ย ม่าย เหฒียบ ฒัวะ เญย เฮญี้ยว ด่ง ลู่ง ว้วน.

3เม่ย ก๊อง, เยีย เหธา เยีย กิ๊น ต้าย เญย เมี่ยน เหลียบ เจี์ย แหง่ง หว่า, เยีย เหธา เยีย เญย โปว, ดาวิด, โฮ้ว เจี๊ยน หว่า

4ก๊อง, “เยีย อ๋อย เหลียบ เม่ย เญย เฒ้ย-ฟุน เถา เหยียด ลิ์ว, เหลียบ เม่ย เญย ฮู่ง เหว่ย เถา หม่าน โก๊ว หม่าน ต่อย.

5โอ เฒี้ยว อ่า, โท้ ปุน ลู่ง เธง เม่ย โหฒว วั้ว เต๋ย บัวะ ฮ่อง เญย สี่, หย่า ปุน ธีง-เหฑ่ง วั้ว เต๋ย เยียม กั๊บ ฒุ้น เญย ต๋อง เธง เม่ย เหฒียบ ฒัวะ เญย เฮญี้ยว.

6เยียม วั้ว ลู่ง ม่าย หาย เต้า ไฮ่ ฮนั้ง เฒี้ยว? เยียม ลู่ง หฒั่ง วั้ว เต๋ย ม่าย หาย เต้า ไฮ่ ด่ง เฒี้ยว?

7เซ เยียม ธีง-เหฑ่ง วั้ว เต๋ย เญย หวุ่ย กะญั์ว นิ่น บัว ท่าย เญย ทิน-ฮู่ง. เยียม เว่ย ก๋อม นิ่น เญย เหยียด ฒู้ง นิ่น เก้า โฮล เก้า เผย ฝู่ เจี๋ย.

8โอ เน่น เจี๋ย เญย เฒี้ยว ทิน-ฮู่ง อ่า, ไม้ ม่าย หาย เต้า ด่ง เม่ย เฮ้น. โอ เฒี้ยว อ่า, เม่ย โหฒว เญย เหยียด ฒู้ง เซ เหฒียบ ฒัวะ เญย.

9เม่ย กุ๊น เสย ไห่ เญย ค้อย. ค้อย เจี์ย ต้ม หล่าง เม่ย ปุน เซ้ก เหฑ่ง.

10เม่ย เบ๊าะ ฮู้ ลาหับ ฮนั้ง ไต๋ ไต่ เญย เมี่ยน, เม่ย หล่ง เม่ย เฮ้น ไห่ เญย ปั์ว เบ๊าะ เม่ย เญย วิน-วั้ง หฑาน เหฑ่ง.

11ลู่ง เป๋น เม่ย เญย. เดา หย่า เม่ย เญย. ป้าม เกน เหธา เยียม ป้าม เกน เญย หม่าน หมวด เม่ย เหฒย ต้าย.

12น่าม ปูง เหธา ป๊ะ ปูง เม่ย เหฒย ต้าย. ทาโบ บง เหธา เฮโมน บง เฌียน-โย่ว เญย เธง เม่ย เญย เม่ง.

13เม่ย เญย ปั์ว ม่าย ชะ เฮ้น ไห่. เม่ย เญย บย่าว เจี๊ยะ ปั์ว หย่า ซูง ฝาว ฮลัง.

14โหฒว หอบ เญย เจ๊า เหธา แป้ง ฟิม เญย สี่ โหฒว เม่ย เญย เหว่ย เญย กอน-โด๊ะ. เม่ย โหฒว เญย เหยียด ฒู้ง เซ เม่ย ฮนั้ม เมี่ยน หย่า เหฒียบ ฒัวะ เญย โหฒว.

15โอ เฒี้ยว อ่า, ฮิ้ว ตุ๊ เฌียน-โย่ว เญย เห่ว วั้ว เต๋ย เมี่ยน ม่าย ออน-เหลาะ, เซ เยียม เม่ย เญย หฑะเฮมียน เญย ฌัง ยั่ง เญย เมี่ยน.

16นิ่น บัว เหว่ย เม่ย เญย บั๋ว เฒี่ยง ฮนอย เฌียน-โย่ว. นิ่น บัว หย่า เธง เม่ย เหว่ย เม่ย โหฒว หอบ เญย เจ๊า.

17เม่ย เซ นิ่น บัว เญย ชะ เญย ฌัง-หล่าง. เม่ย เหธย เอน ปุน เยีย บัว เญย ชะ เฮ้น เจี๊ยน ฝาว.

18เยีย บัว เญย ท้อง-ป้าย เป๋น เฒี้ยว เญย, เยีย บัว เญย ฮู่ง เตี๋ย เกวย อิสะลาเอน เญย ธีง-เหฑ่ง ทิน-ฮู่ง.

19ฒิ่น ด่าง เล่า อ๊ะ, เม่ย เยียม หล่าว ย่าง เญย สี่ ก๊อง บั๋ว เม่ย เญย เหฒียบ ฒัวะ แปะ ฝีง, “เยีย ปุน ชะ เหยียด เต้า เบ๊าะ จ๋า เฮ้น เญย เมี่ยน. เยีย เยียม แปะ ฝีง บุด๋ง กิ๊น เต้า หย่า ท่าย นิ่น โหฒว โฮล.

20เยีย ล์อ ปวัด เยีย เญย โปว, ดาวิด, หย่า หล่ง เยีย เญย ธีง-เหฑ่ง โย่ว ออน นิ่น.

21เยีย เญย ปั์ว อ๋อย เหลียบ นิ่น ว้วน, หย่า อ๋อย ปุน ชะ นิ่น เฮ้น.

22วิน-วั้ง ฒู้ง ไม้ ไฮ่ หน่อย ไม้ ตุ๊ นิ่น, เอ๊าะ เมี่ยน หย่า ไม้ ไฮ่ ปุน นิ่น หฒุ ป่าย.

23เยีย อ๋อย เยียม นิ่น เญย วั้ว ด่าง แหมง เบ๊าะ หม่วน นิ่น เญย วิน-วั้ง, หย่า ไต๋ เหฑ่ง เหยียด ฒู้ง ฑอง นิ่น วั้ว เต๋ย เมี่ยน.

24เยีย อ๋อย ฮนั้ม นิ่น หย่า เหฒียบ ฒัวะ เญย เหธา นิ่น เยียม. เหว่ย เยีย เญย เม่ง นิ่น เญย ชะ อ๋อย เฮ้น เจี๊ยน ฝาว.

25เยีย อ๋อย ปุน นิ่น เญย ปั์ว ซูง ค้อย กู้ หงว่าย, นิ่น เญย บย่าว เจี๊ยะ ปั์ว หย่า ซูง ด้าย กู้ หงว่าย.

26นิ่น อ๋อย เห่ว เจี๊ยน บั๋ว เยีย, “เม่ย เซ เยีย เญย เตีย, เยีย เญย ทิน-ฮู่ง, เหธา ปุน เยีย ตุ๊ เหฌียว เญย หละเปย๊ย.”

27เยีย อ๋อย ปุน นิ่น โหฒว เยีย เญย ตอน-หละเก๊า, เยียม ลู่ง เดี๊ย โหฒว เก้า โฮล เจี๋ย เญย ฮู่ง.

28เยีย อ๋อย เหฒียบ ฒัวะ เญย เหยียด ลิ์ว ฮนั้ม นิ่น, เยีย เหธา นิ่น เหลียบ เญย แหง่ง หว่า หย่า เหยียด ลิ์ว ว้วน เญย.

29เยีย อ๋อย เหลียบ นิ่น เญย ฮู่ง โต้ว เถา เหยียด ลิ์ว, หย่า ปุน นิ่น เญย ฮู่ง เหว่ย ด่ง ลู่ง เญย ฮนอย-เหญียะ เล่า.

30สี ก๊อง นิ่น เญย เฒ้ย-ฟุน กวั่ง เยีย เญย เล์ย-หลัด, ไม้ กัน เยีย เญย เล์ย,

31สี ก๊อง นิ่น บัว ป์าม เยีย เญย เล์ย-เหญ่ย, หย่า ไม้ กัน เยีย เญย หลี่ง,

32เยีย ฯฒฯ หล่ง ปย๊า ตี่ง นิ่น บัว ป์าม เญย ฒุ์ย, หล่ง ปย๊า-ปิน เบ๊าะ เหว่ย นิ่น บัว โหฒว ต่อง เญย สี่.

33มป่า เยีย เหฒียบ ฒัวะ ฮนั้ม เญย เฮญี้ยว เยีย ไม้ เฒาะ หฑวน, หย่า ไม้ กวั่ง เยีย เหฒียบ ฒัวะ โหฒว เญย เจ๊า.

34เยีย ไม้ ปู๋ง ด๊อด เยีย แล์ง เญย แหง่ง หว่า, หย่า ไม้ ก๊อย เยีย เญย ฑุ่ย ก๊อง ธ้วด เญย หว่า.

35เยีย เฒี้ยง เจี๊ยน เยีย เญย ธีง-เหฑ่ง บั๋ว โฮ้ว หฑุ่น ต๋อง เหยียด ลิ์ว, เยีย ไม้ ก๊อง-แปะ ดั๊ว ดาวิด.

36นิ่น เญย ฮู่ง โต้ว อ๋อย เหยียด ลิ์ว เยียม, นิ่น เญย ฮู่ง เหว่ย อ๋อย เยียม เยีย เญย หฑะเฮมียน ด่ง บะฮนอย เล่า,

37แอ๋ง ฮนั้ง หฮลา นอ, เหลียบ ต้าย เถา เหยียด ลิ์ว, หย่า เยียม ว้วน ด่ง ลู่ง เล่า.

38มป่า เม่ย เฉีย เจี์ย เม่ย หล่ง โย่ว ออน ต้าย วั้ว เต้า ฯฒฯ กวั่ง แอ๋ง เฆ่ม นิ่น.

39เม่ย ถุย เม่ย เหธา เม่ย เญย โปว เหลียบ เญย แหง่ง หว่า. เม่ย เฒาะ นิ่น เญย ฮู่ง นี้ง ฒอย เหฌี่ย เนีย-บูง ปุน ม่าย หวุย.

40เม่ย แธะ เหฑ่ง นิ่น เญย เหยียด ฒู้ง ฒี่ง หลาด, ปุน นิ่น เว่ย เจี๊ยน ว้วน เญย ต๋อง ป่าย หว่าย เหฑ่ง.

41ตะฟ่าน เจี๋ย เจ๊า เญย เมี่ยน ธ้าง นิ่น เญย กะน้าย, ล์าง หฒั่ง เมี่ยน หย่า ฮว้วด นิ่น.

42เม่ย ปุน นิ่น เญย วิน-วั้ง ตุ๊ ฮี่ง เจี๋ย, ปุน นิ่น เญย เหยียด ฒู้ง วิน-จา เฌียน-โย่ว.

43เม่ย ฒู้ง ปุน นิ่น เญย หฑุ ด๊าว เญย หฑะเฮมียน เบี๊ยน หมี่ อ๊ะ, หย่า ปุน นิ่น เยียม เบ๊าะ จ๋า เธี้ยง หฒุ เซวย.

44เม่ย ปุน นิ่น เญย ฌัง-หล่าง หฒิด เหฑ่ง, หย่า เฒาะ นิ่น เญย ฮู่ง เหว่ย ฟ้ง เหฌี่ย เดา.

45เม่ย จั๊ม นิ่น หลุน เญย เฒี่ยง โห่ โหฒะ เหฌี่ย, หย่า ปุน นิ่น ปวัง เฮมียน เตี๊ย ไญ้.

46โอ เฒี้ยว อ่า, ด่ง หาย เล่า? เม่ย อ๋อย เฒาะ เม่ย กั้น ปี๋ง เถา เหยียด ลิ์ว ไฟ? เม่ย อ๋อย เฉีย เจี์ย ฮนั้ง โต์ว ปั๊ว เจี๊ยน เถา หาย หฒั่น?

47โอ เฒี้ยว อ่า, โท้ จั๋ง เจี๊ยน เยีย เญย แหม่ง ด่ง หาย นั้ง. เม่ย เหฒย เมี่ยน ม่าน ต้าย ปุน นิ่น บัว ด่ง หน่าย ไม้ ลั่ม หล่ง เหยียด เต๋ย.

48ม่าย หาย เต้า เฒี่ยง หย่า ไม้ หฒุ ไต่? ไฟ หาย เต้า ไฮ่ เหฌียว นิ่น กั้น เล่ย ดุ๊ด เยี่ยม เกน เญย ชะ?

49เฒี้ยว อ่า, เม่ย ฒิ่น ด่าง เหฒียบ ฒัวะ ฮนั้ม เญย เฮญี้ยว เจี๋ย หาย? เซ เม่ย เหฒียบ ฒัวะ เญย เหธา ดาวิด แล์ง เจี๋ย เญย หว่า เยียม หาย?

50โอ เฒี้ยว อ่า, โท้ จั๋ง เจี๊ยน เม่ย เญย โปว ฮนั้ง หาย นอ หฒุ เมี่ยน ฮว้วด, หย่า จั๋ง เจี๊ยน เยีย เญย เฮญี้ยว ฮนั้ง หาย นอ เตี๊ย หม่าน เมี่ยน คี.

51โอ เฒี้ยว อ่า, เม่ย เญย วิน-วั้ง ฮว้วด เม่ย หล่ง โย่ว ออน ต้าย วั้ว เต้า. ไม้ กุ๊น มี่ง เถา หาย นิ่น บัว จั๊ด นิ่น.

52อ๋อย หฒุ เธง เฒี้ยว เถา เหยียด ลิ์ว. อาเมน เหธา อาเมน.

← Chapter 88 Jump to: Chapter 90 →