Exodus 14

ฉบับอักษรโรมันใหม่ - Thailand Bible Society, 2007

← Chapter 13 Jump to: Chapter 15 →

1Ziouv aengx mbuox Mose,

2“Mbuox I^saa^laa^en Mienh daaux nqaang nzuonx corng ndopv-liuh yiem Bi Haa^hi^lotv wuov ndaangc maengx, Mikv^ndon caux koiv mbu'ndongx. Oix zuqc liepc ciangv yiem Mbaa^an Sefon doix-ngaanc, nitv koiv-hlen.

3Faalo Hungh ziouc laaic, ‘I^saa^laa^en Mienh yiem wuov deic-bung youh mingh youh daaih hnangv. Yaac maaih deic-bung-huaang kuonx jienv ninh mbuo.’

4Yie oix bun Faalo nyei hnyouv ngaengc, ninh oix zunc I^saa^laa^en Mienh. Mv baac yie oix hingh jiex Faalo caux ninh nyei zuangx baeng. Mienh ziouc taaih yie. I^yipv Mienh yaac oix hiuv duqv yie se Ziouv. ” I^saa^laa^en Mienh ziouc ei jienv naaiv deix waac zoux.

5Maaih mienh gorngv mbuox I^yipv nyei Faalo Hungh, I^saa^laa^ en Mienh biaux mi'aqv. Ninh caux ninh nyei jien ziouc hnamv-nzuonx. Ninh mbuo gorngv, “Mbuo weic haaix diuc hnangv naaiv nor zoux? Mbuo bungx I^saa^laa^en Mienh mingh nzengc, maiv duqv ninh mbuo fu-sux mbuo aqv niaa.”

6Hungh diex ziouc heuc mienh liuc leiz ninh mborqv jaax nyei maaz-cie yaac dorh jienv ninh nyei baeng-guanh mingh aqv.

7Ninh dorh gauh longx jiex wuov deix luoqc baeqv norm mborqv jaax cie caux yiem I^yipv Deic-Bung yietc zungv mborqv jaax nyei maaz-cie, aengx caux gunv maaz-cie nyei baeng-bieiv yietc zungv gan jienv mingh.

8Ziouv bun I^yipv Deic-Bung nyei Faalo Hungh hnyouv ngaengc, Faalo ziouc zunc I^saa^laa^en Mienh, dongh ninh mbuo bungx laangc nyei cuotv I^yipv nyei ziangh hoc.

9I^yipv Mienh nyei zuangx baeng zunc jienv mingh. Maaih Faalo nyei yietc zungv maaz caux mborqv jaax nyei maaz-cie, geh maaz nyei baeng caux baeng-guanh, yietc zungv zunc jienv ninh mbuo mingh, zunc zaaic I^saa^laa^en Mienh corng jienv ndopv-liuh yiem wuov Koiv-Siqv hlen, nitv Bi Haa^hi^lotv, doix ziangx Mbaa^an Sefon.

10Faalo Hungh zunc aav lamh zaaic wuov zanc, I^saa^laa^en Mienh cau hmien buatc I^yipv Mienh zunc jienv ninh mbuo daaih. Ninh mbuo za'gengh! gamh nziex haic, njiec qaqv tov Ziouv tengx.

11Ninh mbuo dorng jienv Mose gorngv, “Yiem I^yipv Deic-Bung maiv maaih dorngx biopv janx-daic meih cingx daaih dorh yie mbuo cuotv naaiv deic-bung-huaang daic? Meih fungc hnangv naaiv nor dorh yie mbuo cuotv I^yipv Deic-Bung?

12Yiem I^yipv wuov zanc yie mbuo m'daaih mbuox meih, ‘Maiv dungx la'nyauv yie mbuo. Sueih yie mbuo zoux I^yipv Mienh nyei nouh’ maiv zeiz? Zoux nouh corc gauh longx daaih naaiv deic-bung-huaang daic.”

13Mose gorngv mbuox baeqc fingx, “Maiv dungx gamh nziex. Bungx dingc hnyouv zuov jienv. Meih mbuo ziouc buatc ih hnoi Ziouv oix hnangv haaix nor njoux meih mbuo. Dongh meih mbuo ih hnoi buatc naaiv deix I^yipv Mienh, nqa'haav hingv yietc liuz maiv duqv buatc aqv.

14Ziouv ganh oix weic meih mbuo mborqv jaax. Meih mbuo liemh maiv zuqc zoux haaix nyungc.”

15Ziouv gorngv mbuox Mose, “Meih weic haaix diuc heuc jienv tov yie? Gunv mbuox I^saa^laa^en Mienh hungx jienv wuov ndaangc mingh aqv.

16Sung meih nyei biaav-mbiaac jiex koiv gu'nguaaic, wuom ziouc bun nqoi bun I^saa^laa^en Mienh yangh jauv-nqaai jiex wuov ngaanc ziqc koiv.

17Yie oix bun I^yipv Mienh hnyouv ngaengc, ninh mbuo ziouc zunc jienv I^saa^laa^en Mienh mingh. Weic zuqc yie hingh Faalo caux ninh nyei zuangx baeng caux ninh mborqv jaax nyei maaz-cie caux ninh nyei geh maaz baeng, mienh ziouc taaih yie.

18Yie hingh Faalo caux ninh mborqv jaax nyei maaz-cie caux geh maaz baeng duqv mienh taaih yie wuov zanc, I^yipv Mienh ziouc hiuv duqv yie se Ziouv. ”

19Tin-Hungh nyei fin-mienh, dongh yienz I^saa^laa^en baeng nyei jauv wuov dauh, aengx hluotv nzuonx nqa'haav nqaang. Yiem wuov ndaangc maengx wuov norm mbuonx-ndiouh yaac hluotv nzuonx yiem nqa'haav nqaang,

20dangv jienv yiem I^yipv baeng caux I^saa^laa^en baeng mbu'ndongx. Mbuonx-ndiouh bun yietc bung hmuangx, yietc bung njang. Ziangh muonz i bung baeng maiv duqv nitv fatv.

21Mose sung buoz jiex koiv gu'nguaaic. Ziouv bun dong bung maengx nyei domh nziaaux buonc yietc muonz, koiv ziouc tiuv benx ndau-nqaai. Wuom bun nqoi,

22I^saa^laa^en Mienh ziouc duqv yangh jauv-nqaai jiex koiv. Yiem ninh mbuo nyei zaaix maengx, mbiaauc maengx, i bung wuom hnangv zingh laatc nor.

23I^yipv Mienh zunc jienv I^saa^laa^en Mienh mingh. Faalo nyei yietc zungv maaz, mborqv jaax nyei maaz-cie, caux geh maaz nyei baeng gan jienv njiec koiv.

24Lungh aav lamh deix njang, Ziouv yiem wuov norm douz-ndiouh mbuonx-ndiouh mangc I^yipv nyei baeng-guanh ziouc bun ninh mbuo lunc nzengc.

25Ninh zoux bun maaz-cie nyei yienh zietc, maiv haih mingh siepv. I^yipv Mienh gorngv, “Mbuo oix zuqc gaanv biaux I^saa^laa^en Mienh. Ziouv tengx ninh mbuo mborqv yie mbuo I^yipv Mienh aqv.”

26Ziouv aengx gorngv mbuox Mose, “Aengx sung buoz jiex koiv gu'nguaaic bun koiv nyei wuom aengx daaih gapv jienv yiemx I^yipv Mienh, liemh ninh mbuo nyei maaz-cie caux geh maaz nyei baeng.”

27Mose ziouc sung buoz jiex koiv gu'nguaaic. Lungh njang, koiv nyei wuom ziouc gapv jienv hnangv loz wuov nor. I^yipv Mienh njiec qaqv biaux mv baac Ziouv zorqv ninh mbuo guaatv njiec koiv mi'aqv.

28Wuom gapv jienv yiemx nzengc maaz-cie caux geh maaz nyei baeng caux yietc zungv gan I^saa^laa^en Mienh njiec koiv nyei baeng. Maiv maaih yietc dauh duqv maengc cuotv.

29Mv baac I^saa^laa^en Mienh yangh jauv-nqaai jiex koiv. Yiem mbiaauc maengx zaaix maengx, i bung wuom hnangv zingh laatc nor.

30Dongh wuov hnoi Ziouv njoux I^saa^laa^en Mienh biaux ndutv I^yipv Mienh nyei buoz-ndiev. I^saa^laa^en Mienh yaac buatc I^yipv Mienh daic wuov koiv-hlen.

31I^saa^laa^en Mienh buatc Ziouv longc domh qaqv zoux bun I^yipv Mienh nyei sic, ninh mbuo ziouc taaih Ziouv yaac sienx ninh yaac sienx ninh nyei bou, Mose.

← Chapter 13 Jump to: Chapter 15 →