Ezra 3

ฉบับอักษรโรมันใหม่ - Thailand Bible Society, 2007

← Chapter 2 Jump to: Chapter 4 →

1Taux cietv hlaax, I^saa^laa^en Mienh, gorqv-mienh yiem njiec gorqv-mienh nyei buonv-mungv mi'aqv. Ninh mbuo yietc zungv daaih gapv zunv yiem Ye^lu^saa^lem Zingh.

2Yo^saa^ndakc nyei dorn, Ye^su^aa, caux juangc zoux sai mienh nyei mienh, caux Se^an^ti^en nyei dorn, Se^lupv^mbaa^mben, caux ninh nyei muoz-doic cien-ceqv jiez gorn ceix I^saa^laa^en Mienh nyei Tin-Hungh nyei ziec-dorngh, weic bun ninh mbuo dorh ga'naaiv daaih buov ziec ziux fiev jienv Tin-Hungh nyei mienh, Mose, nyei Leiz-Latc Sou.

3Maiv gunv ninh mbuo gamh nziex weih gormx nyei buonv-deic mienh, ninh mbuo yiem loz-gorn-ndoqv ceix ziec-dorngh yaac ndorm-ndorm muonz-muonz dorh ga'naaiv mingh buov ziec bun Ziouv.

4Ziux fiev jienv leiz-latc, ninh mbuo yaac jiex Mbiorv Liuh nyei Zipv. Ei jienv leiz nyei soux mouc ninh mbuo hnoi-hnoi dorh ga'naaiv mingh buov ziec.

5Nqa'haav ninh mbuo aengx dorh zanc-zanc buov ziec nyei ga'naaiv caux bieqc Siang-Hlaax ziec nyei, caux ziux norm-norm zipv ziec nyei, aengx caux gorqv-mienh cuotv fim ziec bun Ziouv nyei ga'naaiv.

6Cietv hlaax saeng-yietv, mienh jiez gorn dorh ga'naaiv mingh ziec bun Ziouv, maiv gunv ninh mbuo maiv gaengh liepc zaangc Ziouv nyei biauv nyei gorn-ndoqv.

7I^saa^laa^en Mienh zorqv nyaanh bun la'bieiv-zaangc caux ndiangx-zaangc. Aengx zorqv nyanc hopv caux ga'lanv youh bun Sai^ndorn Mienh caux Tailaqv Mienh weic zorqv Le^mbaa^norn Mbong nyei si^ndaa zongh ndiangx wuonc njiec taux koiv, aengx wuonc gan koiv njiec taux Yapv^faa, ziux Besie Guoqv nyei hungh, Sailatv, nqoi nzuih bun ninh mbuo zoux.

8Nzuonx Ye^lu^saa^lem Zingh, zaangc Tin-Hungh nyei biauv, da'nyeic hnyangx nyeic hlaax, Se^an^ti^en nyei dorn, Se^lupv^mbaa^mben, caux Yo^saa^ndakc nyei dorn, Ye^su^aa, caux ninh mbuo nyei muoz-doic cien-ceqv, se dongh sai mienh caux Lewi Mienh, caux yietc zungv zuqc guaatv mingh aengx nzuonx daaih nyei I^saa^laa^en Mienh, jiez gorn zoux gong. Ninh mbuo paaiv hnyangx-jeiv nyic ziepc hnyangx faaux maengx nyei Lewi Mienh zoux ceix zaangc Ziouv nyei biauv nyei gunv gong mienh.

9Ye^su^aa caux ninh nyei dorn mbuo caux ninh nyei cien-ceqv, caux Katc^mi^en caux ninh nyei dorn mbuo (se Ho^ndaa^wi^yaa nyei zeiv-fun) caux He^naa^ndatc nyei bungh buonc dorn-jueiv fun-faqv caux muoz-doic, se naaiv deix Lewi Mienh tengx jienv gunv ceix zaangc Tin-Hungh nyei biauv nyei gong-mienh.

10Zaangc mienh liepc Ziouv nyei biauv nyei gorn-ndoqv wuov zanc, zuangx sai mienh zuqv jienv zoux sai nyei lui-houx, nanv jienv nzatc cuotv daaih. Lewi Mienh, Aasaapc nyei zeiv-fun, nanv jienv caauh zeiv. Ninh mbuo lomh nzoih ceng Ziouv ziux zinh ndaangc I^saa^laa^en Mienh nyei hungh, Ndaawitv, dingc daaih nyei yietc nyeic.

11Ninh mbuo baaux nzung ceng yaac laengz zingh Ziouv gorngv, “ Ziouv za'gengh longx haic. Ninh yietc liuz hnamv I^saa^laa^en Mienh taux maanc gouv maanc doic.” Zuangx mienh lomh nzoih heuc qiex mbui nyei ceng Ziouv weic zuqc zaangc Ziouv nyei biauv nyei gorn-ndoqv liepc jiez daaih aqv.

12Mv baac maaih hnyangx-jeiv gox nyei sai mienh camv nyei, caux Lewi Mienh, caux bungh buonc nyei bieiv zeiv, dongh buatc jiex loz wuov norm zaangc Tin-Hungh nyei biauv nyei mienh, buatc ih zanc liepc naaiv norm nyei siang-gorn-ndoqv ziouc nyiemv duqv mbui haic. Aengx maaih mienh camv! nyei njien-youh nyei heuc.

13Yiem wuov nyei zuangx mienh maiv maaih haaix dauh haih samx duqv cuotv wuov deix qiex mbui, haaix nyungc se njien-youh nyei qiex haaix nyungc se nyiemv nyei qiex, weic zuqc zuangx mienh za'gengh! mbui haic. Yiem go nyei mienh yaac muangx duqv haiz.

← Chapter 2 Jump to: Chapter 4 →