Numbers 31 — ฉบับอักษรโรมันใหม่ - Thailand Bible Society, 2007

2“Oix zuqc weic I^saa^laa^en Mienh jaauv win bun Mi^ndien Mienh, nqa'haav meih ziouc guei seix aqv.”

3Mose ziouc gorngv mbuox baeqc fingx, “Oix zuqc ginv deix meih mbuo nyei mienh, yaac liuc leiz wuoqc ginc bun ninh mbuo dorh mingh caux Mi^ndien Mienh mborqv jaax weic tengx Ziouv jaauv win.

4Fingx-fingx I^saa^laa^en Mienh, yietc fingx oix zuqc paaiv yietc cin dauh.”

5Hnangv naaic, mouz fingx I^saa^laa^en Mienh ginv cuotv yietc cin dauh. Yietc zungv maaih yietc waanc i cin dauh dorh jienv mborqv jaax nyei wuoqc ginc.

6Mose ziouc paaiv ninh mbuo cuotv mingh mborqv jaax, yietc fingx yietc cin dauh. Aengx maaih E^le^aa^saa sai mienh nyei dorn, Fi^ne^hatc, dorh jienv singx dinc nyei jaa-sic yaac nanv jienv nzatc biomv weic zoux jangx-hoc.

7Ninh mbuo ziux Ziouv mbuox Mose nyei waac mborqv Mi^ndien Mienh, yaac daix nzengc ninh mbuo nyei dauh dauh m'jangc dorn.

8Yiem ninh mbuo daix nyei naaiv deix mienh, maaih Mi^ndien Mienh nyei biaa dauh hungh, Ewi, Lekem, Sux^aa, Hu^aa caux Le^mbaa. Ninh mbuo yaac longc nzuqc ndaauv daix Mbe^o nyei dorn, Mbaa^laa^am.

9I^saa^laa^en Mienh zorqv Mi^ndien m'sieqv dorn caux fu'jueiv yaac guaatv nzengc Mi^ndien Mienh nyei saeng-kuv, ngongh guanh yungh guanh, yaac luv nzengc ninh mbuo nyei yietc zungv ga'naaiv.

10I^saa^laa^en Mienh yaac buov nzengc Mi^ndien Mienh nyei zingh caux yietc zungv ndopv-liuh ciangv.

11Ninh mbuo zorqv nzengc ninh mbuo caangv daaih luv daaih nyei ga'naaiv, liemh mienh, liemh saeng-kuv,

12dorh taux Mose caux E^le^aa^saa sai mienh caux I^saa^laa^en zuangx mienh nyei ndopv-liuh ciangv wuov, yiem Mo^apc ndau-baengh, Jor^ndaen Ndaaih hlen, Ye^li^ko Zingh doix-ngaanc.

13Mose caux E^le^aa^saa sai mienh caux zuangx mienh nyei bieiv zeiv cuotv ndopv-liuh ciangv mingh buangh ninh mbuo.

14Mose qiex jiez haic naaiv deix mborqv jaax nzuonx daaih nyei baeng-bieiv, dongh gunv yietc cin dauh baeng caux yietc baeqv dauh baeng nyei baeng-bieiv.

15Mose naaic ninh mbuo, “Meih mbuo weic haaix diuc liouh jienv naaiv deix m'sieqv dorn nyei maengc?

16Se dongh naaiv deix m'sieqv dorn muangx Mbaa^laa^am nyei waac, yiem Be^o wuov zanc dorh I^saa^laa^en Mienh leih Tin-Hungh ziouc maaih domh wuon-baengc hoic Ziouv nyei mienh.

17Weic naaiv oix zuqc daix nzengc naaiv deix yietc zungv dorn caux bueix jiex m'jangc dorn nyei m'sieqv dorn.

18Mv baac maiv bueix jiex m'jangc dorn wuov deix sieqv se liouh jienv weic meih mbuo ganh.

19“Da'faanh daix mienh fai muoqv zuqc janx-daic wuov deix, oix zuqc yiem ga'nyiec ziqc ndopv-liuh ciangv buangv siec hnoi. Da'faam hnoi caux da'cietv hnoi oix zuqc saax nzengc ganh nyei uix caux caangv daaih wuov deix mienh nyei uix.

20Yaac oix zuqc saax deix-deix lui-houx caux yietc zungv longc ndopv, yungh biei fai ndiangx zoux daaih nyei ga'naaiv.”

21E^le^aa^saa sai mienh yaac mbuox mingh mborqv jaax nzuonx daaih nyei baeng, “Naaiv se ziux Ziouv jiu bun Mose nyei leiz.

22Jiem, nyaanh, dongh siqv, hlieqv, yangh tiec, caux jungz,

23da'faanh haih zuqc duqv douz nyei yietc zungv oix zuqc jiex douz, ziouc cing-nzengc aqv. Mv baac corc oix zuqc longc saax uix nyei wuom saax. Zuqc maiv duqv douz nyei, oix zuqc jiex wuom.

24Taux da'cietv hnoi wuov hnoi oix zuqc nzox nzengc lui-houx, meih mbuo ziouc cing-nzengc mi'aqv. Bieqc ndopv-liuh ciangv duqv aqv.”

25Ziouv gorngv mbuox Mose,

26“Meih caux E^le^aa^saa sai mienh caux baeqc fingx nyei zuangx bieiv zeiv oix zuqc saauv nzengc caangv daaih nyei ga'naaiv, liemh mienh liemh saeng-kuv.

27Oix zuqc bun nqoi zoux i gouv. Bun yietc gouv mingh mborqv jaax nyei baeng. Bun yietc gouv zuangx mienh.

28Mingh mborqv jaax nyei baeng duqv nyei buonc, maiv gunv mienh, ngongh, lorh, ba'gi yungh fai yungh, hmz baeqv dauh oix zuqc maeqv cuotv dauh weic fungx bun Ziouv.

29Yiem baeng nyei buonc maeqv cuotv naaiv deix, oix zuqc jiu bun E^le^aa^saa sai mienh benx Ziouv nyei buonc.

30Yiem I^saa^laa^en Mienh nyei buonc, liemh mienh, ngongh, lorh, ba'gi yungh, yungh caux nyungc-nyungc saeng-kuv, hmz ziepc dauh oix zuqc maeqv cuotv yietc dauh bun Lewi Mienh, dongh goux Ziouv nyei Ndopv-Liuh nyei mienh.”

31Mose caux E^le^aa^saa sai mienh ziouc ei jienv Ziouv mbuox Mose nyei waac zoux.

32Cih cuotv baeng ganh longc nyei, caangv daaih zengc njiec nyei ba'gi yungh maaih juqv sinx siec waanc biaa cin dauh,

33ngongh, siec waanc i cin dauh,

34lorh, juqv waanc yietc cin dauh,

35maiv bueix jiex m'jangc dorn nyei sieqv, buo waanc i cin dauh.

36Mingh mborqv jaax nyei baeng duqv nyei buonc se hnangv naaiv. Ba'gi yungh, duqv buo sinx buo waanc siec cin hmz baeqv dauh.

37Fungx bun benx Ziouv nyei buonc maaih luoqc baeqv cietv ziepc hmz dauh.

38Ngongh, duqv buo waanc juqv cin dauh. Fungx bun benx Ziouv nyei buonc maaih cietv ziepc nyeic dauh.

39Lorh, duqv buo waanc hmz baeqv dauh. Fungx bun benx Ziouv nyei buonc maaih luoqc ziepc yietv dauh.

40Mienh, duqv yietc waanc juqv cin dauh. Fungx bun benx Ziouv nyei buonc maaih faah ziepc nyeic dauh.

41Mose zorqv maeqv daaih fungx bun Ziouv nyei buonc jiu bun E^le^aa^saa sai mienh ziux Ziouv mbuox Mose nyei waac.

42Mose zorqv mingh mborqv jaax caangv daaih nyei ga'naaiv maeqv daaih bun yietc buonc I^saa^laa^en Mienh.

43Zuangx baeqc fingx duqv nyei buonc, ba'gi yungh maaih buo sinx buo waanc siec cin hmz baeqv dauh,

44ngongh, buo waanc juqv cin dauh,

45lorh, buo waanc hmz baeqv dauh,

46mienh, yietc waanc juqv cin dauh.

47Ziux Ziouv nyei waac, yiem I^saa^laa^en Mienh nyei buonc, liemh mienh, liemh saeng-kuv, hmz ziepc dauh maeqv cuotv dauh jiu bun Lewi Mienh, dongh goux zaangc Ziouv nyei ndopv-liuh nyei mienh.

48Gunv baeng-guanh nyei zuangx baeng-bieiv, dongh gunv yietc cin dauh nyei bieiv caux yietc baeqv dauh nyei bieiv, mingh taux Mose wuov

49gorngv mbuox ninh, “Yie mbuo, meih nyei bou, saauv nzengc yiem yie mbuo nyei buoz-ndiev nyei baeng, yaac maiv zitc yietc dauh.

50Yie mbuo gorqv-mienh ziouc dorh yie mbuo duqv daaih nyei jiem-siou-setv, se kou buoz nyei kou, jiemh, maaih yienx nyei buoz-ndoqv-nzaeng, m'normh hiun, caux limc, fongc horc bun Ziouv weic yiem Ziouv nyei nza'hmien fiqv yie mbuo nyei zuiz.”

51Mose caux E^le^aa^saa sai mienh ziouc zipv ninh mbuo jiu bun nyei jiem, se daav daaih nyei siou-setv.

52Gunv yietc cin dauh baeng caux yietc baeqv dauh baeng nyei baeng-bieiv jiu bun Mose caux E^le^aa^saa weih fongc horc bun Ziouv, nyei yietc zungv jiem, nziang daaih maaih yietc baeqv ziepc juov joih.

53(Naaiv deix mborqv jaax nyei baeng, gorqv-mienh caangv daaih nyei ga'naaiv gorqv-mienh ganh longc.)

54Mose caux E^le^aa^saa sai mienh ziouc zipv gunv yietc cin dauh baeng caux yietc baeqv dauh baeng nyei bieiv jiu bun nyei jiem, dorh bieqc Wuic Buangh nyei Ndopv-Liuh an jienv Ziouv nyei nza'hmien weic bun Ziouv jangx I^saa^laa^en Mienh.