1 John 2

Институт перевода Библии, 2022

← Chapter 1 Jump to: Chapter 3 →

1Balalarım! Men bulardı sizlerge gúna islemewińiz ushın jazıp atırman. Biraq eger birimiz gúna islep qoysaq, Ákeniń aldında Jaqlawshımız, haq bolǵan Iysa Masiyx bar.

2Ol bizlerdiń gúnalarımızdıń keshiriliwi ushın qurban boldı. Ol tek bizlerdiń emes, al pútkil dúnyanıń gúnaları ushın baǵıshlanǵan qurbanlıq boldı.

3Eger Qudaydıń buyrıqların orınlasaq, Onı biletuǵınımızdı usı arqalı bilip alamız.

4«Onı bilemen» dep, Onıń buyrıqların orınlamaǵan adam ótirikshi, onda haqıyqatlıq joq.

5Biraq Qudayǵa degen súyispenshilik Onıń sózin orınlaǵan adamda haqıyqattan kámal tabadı. Qudayda ekenimizdi usı arqalı bilip alamız.

6«Qudayda jasayman» degen adam Iysa sıyaqlı jasawı shárt.

7Súyikli tuwısqanlarım, sizlerge jańa buyrıqtı emes, ázelden ózlerińiz qabıl etken eski buyrıqtı jazıp atırman. Bul eski buyrıq – sizler esitken Qudaydıń sózi.

8Biraq sizlerge jáne jańa buyrıq ta jazıp atırman. Bunıń haqıyqat ekeni Masiyx hám sizler arqalı kórinip atır. Sebebi qarańǵılıq ótip baratır, al haqıyqıy nur álle qashan jarqırap tur.

9«Nurdaman» dep, tuwısqanın jek kóretuǵın adam ele qarańǵılıqta boladı.

10Tuwısqanın súygen adam nurda jasaydı hám onda súrnigiwge sebep bolmaydı.

11Biraq, tuwısqanın jek kóriwshi qarańǵılıqta boladı. Ol qarańǵılıqta júrip, qayaqqa baratırǵanın bilmeydi. Óytkeni qarańǵılıq onıń kózlerin soqır etken.

12Balalarım, sizlerge jazıp atırman, Sebebi Iysanıń atı arqalı gúnalarıńız keshirildi.

13Ákeler, sizlerge jazıp atırman, Óytkeni sizler eń bastan bar Bolǵandı bilesizler. Jaslar, sizlerge jazıp atırman, Sebebi sizler shaytandı jeńdińler. Balalarım, sizlerge jazdım, Óytkeni sizler Ákeni bilesizler.

14Ákeler, sizlerge jazdım, Sebebi sizler eń bastan bar Bolǵandı bilesizler. Jaslar, sizlerge jazdım, Óytkeni sizler kúshlisiz hám sizlerde Qudaydıń sózi bolıp, Sizler shaytannıń ústinen jeńiske eristińler.

15Dúnyanı hám dúnyadaǵı nárselerdi súymeńler. Kim de kim dúnyanı súyse, onda Ákege degen súyispenshilik joq.

16Sebebi dúnyada bolǵan hár bir nárse: deneniń qálewleri, kózdiń qálewleri hám ómirdegi menmenlik Ákeden emes, dúnyadan.

17Dúnya hám onıń qálewleri ótip ketedi, biraq Qudaydıń erkin orınlaǵan adam máńgi jasaydı.

18Balalarım, bul sońǵı waqıt. Masiyxqa qarsı turıwshınıń keletuǵının esitkenińizdey, álle qashan Masiyxqa kóp qarsı turıwshılar payda boldı. Sońǵı waqıt bolǵanın usınnan bilemiz.

19Olar aramızdan shıqtı, biraq bizlerge tiyisli emes edi. Eger bizlerge tiyisli bolǵanda, bizler menen birge qalar edi. Olardıń ketkeni arqalı olardıń hesh biriniń bizlerge tiyisli emes ekeni málim boldı.

20Al sizler muxaddes bolǵan Masiyxtan Muxaddes Ruwxtı alǵanlıqtan, hámmeńiz haqıyqattı bilesizler.

21Men sizlerge haqıyqattı bilmegenińiz ushın emes, al haqıyqattı hám hesh qanday jalǵannıń haqıyqattan emes ekenin bilgenińiz sebepli jazıp atırman.

22Iysanıń Masiyx ekenin tán almaǵan adam ótirikshi bolmasa, onda kim ótirikshi? Ákeni hám Uldı tán almaǵan adam – Masiyxqa qarsı turıwshı.

23Uldı tán almaǵan adamda Áke de joq. Al Uldı tán alǵan adamda Áke de bar.

24Áwel bastan esitken sózińizdi ózlerińizde saqlańlar. Eger áwel bastan esitken sózińiz sizlerde bolsa, sizler de Ul hám Áke menen birge bolasızlar.

25Masiyxtıń Ózi bizlerge wáde etken máńgilik ómir – usı.

26Bulardı sizlerdi azǵırmaqshı bolıp atırǵanlar haqqında jazıp atırman.

27Biraq sizler Masiyxtıń Muxaddes Ruwxına iyesiz. Sizlerde Muxaddes Ruwx bolǵanlıqtan, sizlerge hesh kimniń úyretiwiniń hájeti joq. Masiyxtıń Muxaddes Ruwxı sizlerge hámmesin úyretedi. Onıń tálimi haqıyqıy, jalǵan emes. Onıń sizlerge úyretkeni sıyaqlı, Masiyx penen jasańlar.

28Awa, balalarım, endi Masiyx penen qarım-qatnasta bolıp, Ol kelgende, Onıń aldında uyatqa qalmawımız ushın márt bolayıq.

29Qudaydıń haq ekenin bilseńiz, haq is qılǵan hár bir adamnıń da Onnan tuwılǵanın biliń.

← Chapter 1 Jump to: Chapter 3 →