2 Corinthians 13

Институт перевода Библии, 2022

← Chapter 12 Jump to:

1Men sizlerge úshinshi mártebe barajaqpan. Muxaddes Jazıwda aytılǵanday: «Hár bir is eki yamasa úsh adamnıń gúwalıǵı tiykarında qaraladı».

2Bunnan aldın arańızda ekinshi mártebe bolǵanımda eskertken edim. Endi házir sizlerden uzaqta bolǵanımda da tákirarlap eskertip atırman: men sizlerge jáne barǵanımda, burın gúna islegenlerdiń de, basqa hámme adamlardıń da hesh birin ayamayman!

3Sebebi sizler Masiyxtıń men arqalı sóyleytuǵınına dálil izleysizler. Masiyx sizlerge degen is-háreketinde hálsiz emes, Ol sizlerdiń arańızda Óz qúdiretin kórsetedi.

4Ol hálsiz bolıp atanaq aǵashqa shegelense de, házir Qudaydıń qúdireti menen jasap atır. Masiyx penen qatnasta bolǵan bizler de hálsiz bolsaq ta, Onıń menen birge Qudaydıń qúdireti arqalı sizlerdiń paydańız ushın jasaymız.

5Isenimde turǵan ya turmaǵanıńızdı biliwińiz ushın, ózlerińizdi ózlerińiz sınap kórińler. Iysa Masiyxtıń ishińizde ekenligin bilmeysizler me? Eger bilmeseńiz, sınawdan óte almay jıǵılǵan bolar edińiz.

6Bizlerdiń sınawdan ótkenimizdi biletuǵınıńızdan men úmit etemen.

7Hesh qanday jamanlıq islemewińizdi sorap, bizler Qudayǵa duwa etemiz. Bundaǵı maqsetimiz ózlerimizdiń sınawdan ótkenimizdi kórsetiw emes, al bizler sınawdan ótpegen bolıp kórinsek te, sizlerdiń jaqsılıq islewińizden ibarat.

8Óytkeni bizler haqıyqatqa qarsı hesh nárse isley almaymız, al tek haqıyqat ushın háreket etemiz.

9Bizler hálsiz, al sizler kúshli bolsańız, bizler quwanamız. Bizler sizlerdiń tuwrılanıp, jetilisip barıwıńız ushın da duwa etemiz.

10Sonlıqtan sizlerge kelgen waqtımda Iyemizdiń maǵan bergen biyligi menen qatal is tutıwǵa májbúr bolmawım ushın, bul nárselerdi arańızda bolmaǵan waqtımda jazıp atırman. Men bul biylikti sizlerdi qulatıw ushın emes, al tiklew ushın alǵanman.

11Qullası, tuwısqanlarım, xosh bolıńlar. Jetilisip barıńlar, meniń aytqanlarıma qulaq asıńlar, bir oy-pikirli bolıńlar hám tatıwlıqta jasańlar. Súyispenshilik hám tınıshlıq tiykarı bolǵan Quday sizler menen birge boladı.

12Bir-birińizdi muxaddes posa menen súyip sálemlesińler. Barlıq muxaddesler sizlerge sálem aytıp atır.

13Iyemiz Iysa Masiyxtıń miyrimi, Qudaydıń súyispenshiligi hám Muxaddes Ruwxtıń sherikligi hámmeńizge yar bolsın!

← Chapter 12 Jump to: