2 Thessalonians 1

Институт перевода Библии, 2022

Jump to: Chapter 2 →

1Ákemiz Qudayǵa hám Iyemiz Iysa Masiyxqa tiyisli bolǵan Salonika iseniwshileriniń jámáátine, Pavel, Sila hám Timofeyden sálem!

2Ákemiz Qudaydıń hám Iyemiz Iysa Masiyxtıń miyrimi hám tınıshlıǵı sizlerge yar bolsın!

3Tuwısqanlar! Sizler ushın hámme waqıtta Qudayǵa shúkirlik etiw parızımız. Usılay islewimiz orınlı. Sebebi isenimińiz kún sayın ósip, hár qaysısıńızdıń bir-birińizge degen súyispenshiligińiz artıp barmaqta.

4Sonlıqtan bizler basıńızdan keship atırǵan barlıq quwdalaw hám azap-aqıretler waqtındaǵı sizlerdiń sabırlılıǵıńız hám isenimińiz ushın Qudaydıń jámáátlerinde sizler menen maqtanamız.

5Bulardıń hámmesi Qudaydıń ádil jazasınıń belgisi. Nátiyjede, shegip atırǵan azabıńız ushın sizler Qudaydıń Patshalıǵına ılayıqlı dep sanalasızlar.

6Quday ádil: sizlerge azap bergenlerge Ol azap penen juwap qaytaradı.

7Azap shegip atırǵan sizlerge bolsa, bizler menen birge tınıshlıq beredi. Bulardıń hámmesi Iyemiz Iysa Óziniń qúdiretli perishteleri menen jalınlaǵan ot ishinde aspanda kóringende júz beredi.

8Sonda Iyemiz Iysa Qudaydı bilmeytuǵınlardı hám Ózi haqqında Xosh Xabarǵa boysınbaǵanlardı jazalaydı.

9Olar máńgi nabıt bolıwǵa húkim etilip, Iyemizdiń júzinen hám qúdiretli saltanatınan alıslatıladı.

10Iyemiz kelgen kúni Óz muxaddesleri tárepinen ullılanıp, pútkil iseniwshiler tárepinen alǵıslanadı. Olardıń arasında sizler de bolasızlar. Óytkeni bizlerdiń Ol haqqında bergen gúwalıǵımızǵa isendińler.

11Sonlıqtan sizler ushın bárqulla duwa etip atırmız: Qudayımız sizlerdi Ózi shaqırǵan ómirge ılayıqlı qılsın, hár túrli jaqsı arzıw-ármanıńızdı hám isenimge tiykarlanǵan hár bir isińizdi Óz qúdireti menen ámelge asırsın.

12Solay etip, Qudayımızdıń hám Iyemiz Iysa Masiyxtıń miyrimi menen, Iyemiz Iysanıń atı sizler arqalı ullılansın hám sizler de Ol tárepinen mártebeli bolıńlar.

Jump to: Chapter 2 →