2 Timothy 1

Институт перевода Библии, 2022

Jump to: Chapter 2 →

1Masiyx Iysadaǵı wáde etilgen ómir haqqında járiyalaw ushın, Qudaydıń qálewi menen Masiyx Iysanıń elshisi bolǵan men, Pavelden,

2súyikli ulım Timofeyge sálem! Quday Ákemiz hám Iyemiz Masiyx Iysa saǵan miyrim, rehim hám tınıshlıq bersin!

3Men ata-babalarım sıyaqlı pák hújdan menen xızmet etetuǵın Qudayǵa kúni-túni duwa etkenimde seni úzliksiz eske alıp, shúkirlik bildiremen.

4Seniń kóz jaslarıń yadımda. Jáne diydarlasıp, quwanıshqa bóleniwim ushın, seni kóriwdi ańsap atırman.

5Seniń haqıyqıy isenimiń de yadımda. Burın kempir apań Loidada hám anań Evnikada bolǵan usı isenimniń házir sende bar ekenine tolıq isenemen.

6Sonlıqtan qollarımdı ústińe qoyıp duwa etiwim arqalı Qudaydıń saǵan bergen sıyın bar inta menen qollana beriw kerekligin esińe túsirip atırman.

7Óytkeni Quday bizlerge qorqaqlıq ruwxın emes, al kúsh, súyispenshilik hám saldamlılıq ruwxın berdi.

8Solay etip, Iyemiz haqqında gúwalıq beriwden hám Ol sebepli tutqın bolǵan mennen arlanba. Kerisinshe, Qudaydıń bergen kúshi menen Xosh Xabar ushın meniń menen birge qıyınshılıq kór.

9Quday bizlerdi islegen islerimiz sebepli emes, al Óz maqseti hám miyrimi menen qutqarıp, muxaddes bolıp jasawǵa shaqırdı. Bul miyrimdi Ol bizlerge dúnya jaratılmastan burın Masiyx Iysa arqalı bergen edi.

10Al endi bolsa, bul miyrimdi Qutqarıwshımız Masiyx Iysanıń dúnyaǵa keliwi menen ashıq kórsetti. Masiyx Iysa ólimniń kúshin joq qılıp, Xosh Xabar arqalı joǵalmaytuǵın máńgilik ómirdi ayan qıldı.

11Men Quday tárepinen usı Xosh Xabar ushın xabarshı, elshi hám muǵallim bolıp tayınlandım.

12Sonlıqtan bul sebepli azap shegip atırman. Biraq ta, men arlanbayman. Sebebi Kimge isengenimdi bilemen hám maǵan tapsırılǵandı Onıń Óziniń sol kúnge deyin saqlay alatuǵınına da isenemen.

13Mennen óziń esitken durıs tálimattı órnek qılıp, Masiyx Iysaǵa degen isenim hám súyispenshilik penen jasa.

14Saǵan tapsırılǵan iygilikli tálimattı ishimizde jasaytuǵın Muxaddes Ruwx járdeminde saqla.

15Aziya úlkesindegilerdiń hámmesiniń, solar arasında Figel hám Hermogenniń meni taslap ketkenin bileseń.

16Iyemiz Onisifordıń úy-ishine Óz rehimin bersin. Óytkeni ol kóp márte maǵan jubanısh berdi hám tutqınlıǵımnan arlanbadı.

17Kerisinshe, Rimge kelgende, meni tapqansha, erinbey izledi.

18Sol kúni Iyemiz oǵan Óz rehimin bersin! Onıń Efeste maǵan qansha xızmet etkenin sen de júdá jaqsı bileseń.

Jump to: Chapter 2 →