Colossians 2

Институт перевода Библии, 2022

← Chapter 1 Jump to: Chapter 3 →

1Men sizler ushın, sonday-aq, Laodikiyadaǵılar hám meni júzbe-júz kórmegenlerdiń hámmesi ushın qanshelli ǵayrat salıp atırǵanımdı biliwińizdi qáleymen.

2Meniń usı ǵayrat salıwımnıń maqseti – sizlerdiń kewillerińiz jubanısh tawıp, súyispenshilik penen birlesiwińizden ibarat. Solay etip, sizler minsiz túsinikten payda bolatuǵın kámil isenim menen, Qudaydıń sırı bolǵan Masiyxtı bilip alasızlar.

3Masiyxta aqıl-danalıqtıń pútkil ǵáziynesi jasırılǵan.

4Bunı men hesh kimniń sizlerdi maylı til menen aldap ketpewi ushın aytıp atırman.

5Sebebi meniń ózim arańızda joq bolsam da, ruwxım sizler menen birge bolıp, arańızdaǵı tártipti hám Masiyxqa degen isenimińizdiń bekkemligin kórip, quwanıp atırman.

6Sonlıqtan Masiyx Iysanı Iyemiz dep qabıl etken bolsańız, Onıń menen tıǵız qatnasta bolıp jasańlar.

7Onda tamır jayıp hám tiklenip, ózlerińiz úyrengendey, isenimde bekkemlenip barıńlar hám Qudayǵa sansız shúkirlik bildirińler.

8Saq bolıńlar! Masiyxqa emes, al adamlardıń úrp-ádetlerine hám bul dúnyadaǵı mánissiz qaǵıydalarǵa tiykarlanǵan filosofiya, bos hám ótirik sózler menen hesh kim sizlerdi olja etpesin.

9Óytkeni qudaylıq tábiyattıń pútkil tolılıǵı Masiyxtıń denesinde jasaydı.

10Sizler de hár qanday hákimshilik hám biyliktiń bası Masiyx penen qatnasta bolıp, usı tolılıqqa eristińiz.

11Sizler Masiyx penen qatnasta bolıp, súnnet etildińiz. Bul súnnet adamnıń qolı menen qılınatuǵın súnnet emes, al Masiyx tárepinen islengen súnnet bolıp, usı arqalı gúnakar tábiyatıńız kesip taslanadı.

12Suwǵa shomıldırılǵanıńızda Masiyx penen birge kómildińler hám Onı ólimnen tiriltken Qudaydıń kúshine isenip, sol waqıtta Onıń menen birge tirildińler.

13Sizler gúnalarıńız hám gúnakar tábiyatıńızdıń súnnetsizligi sebepli óli edińler, biraq Quday sizlerdi Masiyx penen birge tiriltti. Ol barlıq gúnalarımızdı keshirdi.

14Muxaddes Nızam talapları boyınsha bizlerge qarsı ayıp taǵıp, húkim belgileytuǵın hújjetti Quday óshirdi hám onı atanaq aǵashqa shegelep, joq qıldı.

15Ol ruwxıy hákimler menen biylewshilerdi quralsızlandırdı. Olardı Masiyxtıń atanaq aǵashtaǵı ólimi arqalı jeńip, kópshiliktiń kóz aldında masqara etti.

16Solay etip, jeytuǵın hám ishetuǵın nárselerge, bayramǵa, jańa ayǵa yamasa Shabbat kúnine baylanıslı hesh kim sizlerdi húkim etpesin.

17Bular tek keliwi tiyis nárseniń kóleńkesi, al haqıyqatlıq bolsa Masiyxta.

18Jalǵan kishipeyillikten hám perishtelerge sıyınıwdan lázzet alatuǵın hesh kim sizlerdi sıyıńızdan ayırmasın. Olar tek ózleri kórgen ayanlarǵa ǵana berilip, óz gúnakar tábiyatınıń aqılı menen sebepsiz kókirek kóteredi.

19Bundaylar iseniwshiler jámáátiniń bası bolǵan Masiyx penen baylanıstı úzgen. Áne usı bastan pútkil dene buwın hám sińirdiń járdemi menen kúsh alıp hám birlesip, Qudaydıń qálegen jolı menen ósip baradı.

20Eger sizler Masiyx penen birge ólip, bul dúnyanıń mánissiz qaǵıydalarınan qutılǵan bolsańlar, onda nege bul dúnyaǵa tiyisli adamlar sıyaqlı: «Uslama», «Jeme» hám «Qol tiygizbe» degen qaǵıydalarǵa qulaq asasız?

22Bunday qaǵıydalardıń hámmesi qollanıw arqalı joq bolatuǵın nárselerge baylanıslı bolıp, adamlardıń buyrıq hám tálimatlarına tiykarlanǵan.

23Awa, bul qaǵıydalar jalǵan dindarlıq, jalǵan kishipeyillik hám deneni qıynaw boyınsha aqıllıday bolıp kórinedi. Biraq gúnakar tábiyattıń qálewlerin júwenlewde olardıń hesh qanday paydası joq.

← Chapter 1 Jump to: Chapter 3 →