Ezra 4

Институт перевода Библии, 2022

← Chapter 3 Jump to: Chapter 5 →

1Yahuda hám Benyamin urıwlarınıń dushpanları súrginnen qaytqanlardıń Izraildıń Qudayı Jaratqan Iyege arnap Ibadatxana qurıp atırǵanın esitti.

2Olar Zerubbabelge hám áwlad basshılarına kelip: – Bizler de sizler menen birge qurılısqa qatnasayıq. Sebebi bizler de sizler sıyaqlı Qudayıńızǵa sıyınamız. Bizlerdi usı jerge alıp kelgen Assiriya patshası Esar-Xaddonnıń dáwirinen beri, Oǵan arnap qurbanlıq berip kelemiz, – dedi.

3Biraq Zerubbabel, Eshua hám Izraildıń basqa áwlad basshıları olarǵa bılay dep juwap berdi: – Qudayımızǵa arnap Úy qurıw ushın sizlerdiń bizler menen birge qurılısqa qatnasıwǵa haqıńız joq. Persiya patshası Kirdiń buyrıǵı boyınsha, Izraildıń Qudayı Jaratqan Iyege arnap Úydi jalǵız ózimiz quramız.

4Sonda sol jerdegi xalıqlar Yahuda xalqın qorqıtıp, qurılıs isine tosqınlıq jasawǵa hám isten qolın suwıtıwǵa háreket etti.

5Dushpanlar keńesshilerge para berip, Persiya patshası Kirdiń pútkil húkimdarlıǵı dawamında olardıń jobalarına qarsılıq qılıp keldi. Bul awhal Persiya patshası Dariydiń patshalıǵına deyin dawam etti.

6Jıllar ótip, Axashwerosh taxtqa otırıp, onıń patshalıǵı baslanıwdan, dushpanlar Yahuda hám Erusalim turǵınları ústinen shaǵım xat jazdı.

7Sońınan Persiya patshası Artakserkstiń dáwirinde de Bishlam, Mitredat, Tabeel hám olardıń basqa joldasları patshaǵa xat jazdı. Xat aramey tilinde jazılǵan bolıp, patshaǵa awdarıp berildi.

8Wákil Rexum menen xatker Shimshaydıń patsha Artakserkske Erusalimdi qaralap jazǵan xatınıń mazmunı mınaday edi:

9«Wákil Rexum, xatker Shimshay hám olardıń basqa joldasları: Tripolis, Persiya, Erex hám Babilon turǵınlarınan hám Suza qalasınıń, yaǵnıy elam xalqınıń biyleri hám hámeldarlarınan,

10jáne de, ullı hám qúdiretli Asnappar tutqın etip ákelip, Samariya qalalarına hám Evfrattıń arǵı tárepine qonıslandırǵan xalıqlardan».

11Olar jibergen xattıń nusqası mınaday edi: «Patsha Artakserkske Evfrat dáryasınıń arǵı tárepinde jasaytuǵın xızmetshilerinen.

12Patshaǵa mınanı málim etpekshimiz: siziń qol astıńızdan shıǵıp, bizge, Erusalimge kelgen yahudiyler qozǵalańshı hám jawız qalanı qayta qura basladı. Olar diywallardı tiklep, imaratlardıń tiykarların dúzetip atır.

13Jáne mınanı da málim etpekshimiz: eger usı qala qurılıp, onıń diywalları qayta tiklenip bolınsa, onda olar salǵırt, salıq hám bajı pulların tólemey qoyadı. Nátiyjede patsha qaznasına zıyan keledi.

14Patsha sarayınıń duzına ózlerimiz de sherik bolǵanımız sebepli hám patshamızdıń zıyanǵa ushırawına qarap tura almaytuǵın bolǵanlıqtan, xat jiberip, patshanı xabardar qılıp qoymaqshımız.

15Eger ata-babalarıńızdıń jılnama kitabınan izletseńiz, jazbalarda bul qalanıń qozǵalańshı, patshalar hám wálayatlar ushın qáwipli bolǵanın kóresiz. Bul qala ázelden qozǵalańnıń oshaǵı bolǵanlıqtan, wayran etilgen.

16Usı sebepli patshaǵa málim etemiz: eger usı qala qayta tiklenip, diywalları qayta qurılsa, onda dáryanıń arǵı jaǵındaǵı iyeliklerińizden de ayırılasız».

17Patsha mınaday juwap jiberdi: «Wákil Rexumǵa, xatker Shimshayǵa, Samariyada hám dáryanıń arǵı tárepinde jasaytuǵın olardıń basqa joldaslarına sálem!

18Sizlerdiń bizlerge jibergen xatıńız meniń aldımda oqılıp, awdarıldı.

19Meniń buyrıǵım menen izlew alıp barıldı hám bul qalanıń ázelden patshalarǵa qarsı bas kóterip kelgeni, qozǵalań hám búlginshiliktiń mákanı bolǵanı tastıyıqlandı.

20Erusalimde Evfrat dáryasınıń arǵı tárepindegi pútkil jerlerdi iyelep, olardan salǵırt, salıq hám bajı pulların óndirgen qúdiretli patshalar jasaǵan eken.

21Sonlıqtan sol adamlardıń isti toqtatıwı ushın buyrıq ber. Men buyrıq bermegenshe, qalanı qayta qurmasın.

22Abaylı bolıńlar, itibarsızlıq etpeńler. Patshaǵa zálel keltiretuǵın zıyanlı istiń kóbeyiwine jol qoymańlar».

23Patsha Artakserkstiń bul xatı Rexum, xatker Shimshay hám olardıń joldaslarınıń aldında oqılıwdan, olar asıǵıs Erusalimge, yahudiylerdiń janına bardı hám áskeriy kúsh penen jumıstı toqtatıwǵa májbúr qıldı.

24Solay etip, Qudaydıń Erusalimdegi Úyiniń qurılısı toqtap qalıp, Persiya patshası Dariydiń patshalıǵınıń ekinshi jılına shekem háreketsiz turdı.

← Chapter 3 Jump to: Chapter 5 →