Haggai 2

Институт перевода Библии, 2022

← Chapter 1 Jump to:

1Sol jıldıń jetinshi ayınıń, jigirma birinshi kúni Jaratqan Iyeden payǵambar Xaggayǵa mınaday sóz tústi:

2– Yahuda hákimi Shealtiel ulı Zerubbabelge, bas ruwxaniy Iosadaq ulı Eshuaǵa hám qalǵan xalıqqa bılay dep ayt:

3«Sizlerdiń arańızda usı Ibadatxananıń burınǵı saltanatın kórgen adam bar ma? Házirgi kórinisi qanday? Burınǵıǵa salıstırǵanda, házir hesh nárse emestey bolıp kórinip turǵan joq pa?

4Endi sen, háy, Zerubbabel, jigerlen! – deydi Jaratqan Iye. – Háy, bas ruwxaniy Iosadaq ulı Eshua, jigerlen! Háy, eldegi pútkil xalıq, jigerleniń! – deydi Jaratqan Iye. – Jumısqa kirisińler! Sebebi Men sizler menen birgemen, – deydi Álemniń Jaratqan Iyesi.

5– Mısır jerinen shıqqanıńızda, sizler menen dúzgen kelisimim boyınsha, Meniń Ruwxım sizlerdiń arańızda boladı. Qorqpańlar!

6Álemniń Jaratqan Iyesi bılay deydi: Tez arada aspan hám jerdi, teńiz hám qurǵaqlıqtı jáne silkindiremen.

7Barlıq xalıqlardı titiretemen hám olar bahalı buyımların usı jerge alıp keledi, – deydi Álemniń Jaratqan Iyesi. – Men usı Ibadatxananı saltanatqa bóleymen.

8Gúmis te, altın da Meniki, – deydi Álemniń Jaratqan Iyesi.

9– Keleshekte bul Ibadatxananıń saltanatı aldınǵısınan da ullı boladı, – deydi Álemniń Jaratqan Iyesi. – Sol jerge tınıshlıq beremen».

10Dariydiń patshalıǵınıń ekinshi jılında, toǵızınshı aydıń, jigirma tórtinshi kúni Jaratqan Iyeden payǵambar Xaggayǵa mınaday sóz tústi:

11– Álemniń Jaratqan Iyesi bılay deydi: Ruwxaniylerge Nızamǵa baylanıslı mına sorawdı ber:

12«Eger arańızdaǵı birińiz qurbanlıqtan alınǵan muxaddes góshti kiyiminiń etegi menen alıp baratırǵan bolsa, onıń etegi nanǵa, sorpaǵa, sharapqa, záytún mayına yamasa basqa bir awqatqa tiyip ketse, sol awqat muxaddes bola ma?» Xaggay usı sorawdı bergende, ruwxaniyler: – Yaq, – dep juwap berdi.

13Xaggay sózin dawam etip, bılay dedi: – Ólige bir jerin tiygizip, haram sanalǵan bir adam usı awqatlardıń birewine bir jerin tiygizip alsa, sol awqat haram sanala ma? Ruwxaniyler: – Awa, haram sanaladı – dep juwap berdi.

14Sonda Xaggay bılay dedi: «Bul xalıq, usı millet Meniń kóz aldımda da sonday, – deydi Jaratqan Iye. – Olardıń hár bir islegen isleri, qurbanlıq orında usınǵan hár bir qurbanlıqları da haram.

15Endi búgingi kúnnen baslap neler bolǵanın oylanıp kóriń. Jaratqan Iyeniń Ibadatxanasınıń tasın órip baslamasıńızdan aldın neler bolǵanı haqqında jaqsılap oylanıp kóriń.

16Qırmanǵa jigirma ólshem dán alaman dep barǵanıńızda, onnan tek ǵana on ólshem dán shıǵatuǵın edi. Sharap sıǵatuǵın iskenjeden eliw gúze sharap alaman dep barǵanıńızda bolsa, onnan tek ǵana jigirma gúze sharap shıǵatuǵın edi.

17Óytkeni Men sizlerdiń qol miynetińizdi quwrap qalıw, keselleniw hám burshaq penen jazaladım. Sonda da, Maǵan qaytıp keliwden bas tarttıńlar, – deydi Jaratqan Iye.

18– Búgin, toǵızınshı aydıń jigirma tórtinshi kúninen baslap, Jaratqan Iyeniń Ibadatxanasınıń tırnaǵın qaytadan salıp baslaǵan kúnnen baslap neler bolıp atırǵanına dıqqat salıp, oylanıp kórińler.

19Ǵállexanada bir tuqım qalıp pa edi? Júzim, ánjir, anar hám záytún aǵashı búginge deyin miywesin berip pe edi? Biraq búginnen baslap, Men sizlerdi jarılqayman».

20Sol aydıń jigirma tórtinshi kúni Jaratqan Iyeden Xaggayǵa ekinshi márte mınaday sóz tústi:

21– Yahuda hákimi Zerubbabelge bılay dep ayt: «Men aspan menen jerdi silkindiremen.

22Patshalıqlardı qulataman, jat xalıqlardıń kúshin joq qılaman. Sawash arbaların olardıń ústindegiler menen qosıp, awdarıp taslayman. Atlar hám shabandozları jıǵıladı, olardıń hámmesi bir-biriniń qılıshınan óledi.

23Sol kúni seni, – deydi Álemniń Jaratqan Iyesi, – Óz qolıma alaman, háy, Shealtiel ulı qulım Zerubbabel, – deydi Jaratqan Iye. – Seni Ózimniń mór júzigim sıyaqlı qılaman, sebebi Men seni tańladım, – deydi Álemniń Jaratqan Iyesi».

← Chapter 1 Jump to: