Hebrews 1

Институт перевода Библии, 2022

Jump to: Chapter 2 →

1Quday áyyemgi zamanlarda payǵambarlar arqalı kóp mártebe hám hár túrli jollar menen ata-babalarımızǵa sóylegen edi.

2Al bul sońǵı waqıtlarda bolsa, Quday bizlerge Óz Ulı Iysa arqalı sóyledi. Quday Óz Ulın pútkil barlıqtıń miyrasxorı etip belgilep, Ol arqalı pútkil dúnyanı jaratqan edi.

3Qudaydıń Ulı – Qudaydıń saltanatınıń jarqıraǵan nurı bolıp, Ol Qudaydıń tábiyatınıń haqıyqattan qanday ekenin kórsetedi. Ul Óziniń qúdiretli sózi menen pútkil barlıqtı saqlap tur. Ol Ózin qurban etip, bizlerdi gúnalarımızdan tazalaǵannan soń, joqarıdaǵı qúdiretli Qudaydıń oń jaǵına otırdı.

4Qudaydıń Ulı perishtelerden qanshelli joqarı attı alǵan bolsa, Ol olardan sonshelli ústin turadı.

5Óytkeni Quday perishtelerdiń qaysı birine: «Sen Meniń Ulımsań, Búgin Men Saǵan Áke boldım». Jáne de: «Men Oǵan Áke bolaman, Ol Maǵan Ul boladı», – degen edi?

6Jáne de, Quday tuńǵısh Ulın dúnyaǵa jiberip atırıp bılay degen: «Meniń barlıq perishtelerim Oǵan sıyınsın».

7Al perishteler haqqında bolsa, Muxaddes Jazıw bılay deydi: «Quday Óz perishtelerin samalday, Xızmetshilerin ottıń jalınınday qıladı».

8Biraq, Qudaydıń Ulı haqqında Muxaddes Jazıw bılay deydi: «Quday, taxtıń máńgi-baqıy turar, Seniń patshalıq hasań – ádalat hasasıdur.

9Sen ádillikti súyip, nızamsızlıqtı jek kórdiń. Sonıń ushın, Quday, Seniń Qudayıń, Doslarıńnan góre kóbirek Seni, Quwanısh mayı menen mayladı».

10Jáne de, bılay deydi: «O Iyemiz, Áwel basta jerdiń tiykarın Sen salǵansań. Kókler Seniń qollarıńnıń dóretpesi.

11Olar joq boladı, al Sen dawam eteseń. Olardıń hámmesi de kiyimdey tozıp qaladı.

12Olardı shapan sıyaqlı orap qoyasań, Olar kiyim sıyaqlı ózgertiledi. Biraq Sen ózgermeyseń, Hesh tawısılmaydı Seniń jıllarıń».

13Quday perishtelerdiń hesh birine de: «Dushpanlarıńdı ayaǵıńnıń astına bastırmaǵanımsha, Meniń oń jaǵımda otır», – demegen.

14Aqırı perishtelerdiń hámmesi qutqarılıwǵa iye bolatuǵınlarǵa xızmet qılıw ushın jiberilgen xızmetshi ruwxlar.

Jump to: Chapter 2 →