Malachi 4

Институт перевода Библии, 2022

← Chapter 3 Jump to:

1«Mine, sol kún jaqınlap qaldı. Ol lawlap janıp turǵan tandırǵa megzeydi. Sonda menmenler menen jawızlıq qılıwshılar saban sıyaqlı bolıp qaladı. Sol kúni olardıń hámmesi jaǵıp jiberiledi», – deydi Álemniń Jaratqan Iyesi. «Olardıń tamırı da, shaqası da qalmaydı.

2Al sizler, Meniń atıma húrmet kórsetetuǵınlar ushın, nurları menen shıpa beretuǵın ádillik quyashı shıǵadı. Sonda sizler qoradan shıqqan buzawday sekirip oynap, shadlanasızlar.

3Jawızlardı basqılap taslaysızlar. Awa, Men usılardı ámelge asırǵan kúni, olar ayaǵıńızdıń astındaǵı topıraq sıyaqlı bolıp qaladı», – deydi Álemniń Jaratqan Iyesi.

4«Qulım Muwsanıń Nızamın, pútkil Izrail xalqı ushın Xoreb tawında Muwsaǵa bergen qaǵıydalardı hám kórsetpelerdi esińizge alıń.

5Jaratqan Iyeniń ullı hám qorqınıshlı kúni kelmesinen aldın, Men sizlerge payǵambar Iliyastı jiberemen.

6Men kelip, pútkil eldi ǵarǵap, joq qılmawım ushın, ol ákelerdiń júreklerin balalarına, balalardıń júreklerin ákelerine qaratıp, jarastıradı».

← Chapter 3 Jump to: