Micah 2

Институт перевода Библии, 2022

← Chapter 1 Jump to: Chapter 3 →

1Jınayat qılıwdı oylaytuǵınlar, Hátteki tóseginde jatqanda, Jawızlıq jobalastıratuǵınlar, hásiret shegesiz! Tań atqanda, olar dúzgen jobasın júzege asıradı. Sebebi olardıń sonı islewge kúshi jetedi.

2Kewli kúsegen atızlardı iyelep, Zorlıq penen úylerdi tartıp aladı. Olar shańaraqlardı ezip, miyras jerlerin basıp alıp atır.

3Sol sebepli Jaratqan Iye bılay deydi: «Men bul xalıqqa sonday bir apat tayarlap atırman, Bunnan hesh birińiz qashıp kete almaysız. Basıńızdı kóterip, júre almaysız, Sebebi sonday apatshılıq zaman keledi.

4Sol kún kelgende, sizlerdi masqaralap, Sizler haqqında mınaday qayǵılı jır aytıladı: „Bizler pútkilley wayran boldıq! Jaratqan Iye xalqımızdıń barı-joǵın basqalarǵa úlestirdi, Jerlerimizdi satqınlarǵa tarqatıp berdi“».

5Sonıń ushın, Jaratqan Iyeniń xalqı qaytadan jerdi bóliskende, Hesh birińiz shek boyınsha úles jer almaysız.

6Olardıń payǵambarları: «Bular haqqında payǵambarshılıq etpe, Onday payǵambarshılıqtı toqtat, Bizler bolmaymız shermende», – deydi.

7Háy, Yaqıptıń násili, «Jaratqan Iyeniń sabırı tawısılǵan ba eken? Ol usınday islerdi qılar ma edi?» – dep aytıwıńız orınlı ma? Jaratqan Iyeniń sózleri tuwrı júrgen adamǵa, Jaqsılıq alıp kelmey me?

8Jaratqan Iye bılay deydi: «Jaqında óz xalqıńızǵa dushpanday zulımlıq qıldıńız! Sawashtan qaytqan adamlarday qáwetersiz júrgenlerdi ańlıp, Olardıń iynindegi shapanın tartıp aldıńız.

9Xalqımnıń hayalların jaǵımlı úylerinen shıǵarıp jiberdińiz, Jas balalardıń nesiybesin máńgige qırqıp tasladıńız.

10Qánekey, turıń, ketiń bul jerden! Artıq aman-esenlik taba almaysız bul elden! Óytkeni gúnańız sebepli elińiz tolıq wayran boldı».

11Jalǵan sóyleytuǵın ótirikshi kelip: «Sizlerge sharap hám ótkir ishimlik mol boladı, dep payǵambarshılıq qılaman», – dese, Ol bul xalıqtıń payǵambarı sanaladı!

12Jaratqan Iye bılay deydi: «Biraq háy, Yaqıp urpaǵı, Men hámmeńizdi sózsiz jıynayman, Qalǵan izraillılardı toplayman. Qoradaǵı qoylarday, jaylawdaǵı súriwdey etip, Jıynayman sizlerdi bir jerge. Sonda tolıp tasar elińiz adamlarǵa».

13Quday olarǵa jol ashadı, Tutqınlıqtan azat etedi. Qala dárwazasınan shıǵıp ketedi. Patshańız bolǵan Jaratqan Iye olarǵa jetekshi bolıp, aldında júredi.

← Chapter 1 Jump to: Chapter 3 →