Nahum 3

Институт перевода Библии, 2022

← Chapter 2 Jump to:

1Hásiret shegeseń, háy, qolları qan qala! Jalǵanǵa hám talan-taraj etilgen zatlarǵa tolǵan qala. Ol jerdegi tonawshılıq hesh qashan tawısılmas.

2Esitiler qamshınıń tarsıldısı hám dóńgeleklerdiń dúsirlisi, Shawıp baratırǵan at tuyaqlarınıń dawısı, Sawash arbalarınıń tasır-tusırlısı.

3Hújimge kirdi atlı áskerler, Qılıshlar jalt-jult eter, nayzalar jıltırar, Úyilip ketti óli deneler, Sansız bolıp ketti ólikler, Bularǵa súrnigip atır adamlar.

4Sen, suyıq ayaqlıq penen sheksiz buzıqshılıq qılǵan sıyqırshı hayalsań, Buzıqlıǵıń menen xalıqlardı ózińe tutqın qılıp, Sıyqırshılıǵıń menen ózińe qul etken ediń.

5Álemniń Jaratqan Iyesi bılay deydi: «Saǵan qarsıman, háy Nineviya! Men seniń kóylegińniń etegin joqarı kóterip, Milletlerge jalańash deneńdi kórsetip, Patshalıqlardıń aldında shermende qılaman.

6Ústińe taslandı taslap, seni xorlayman, Adamlarǵa tamasha bolasań sen.

7Seni kim kórse de artqa sheginip, bılay deydi: „Wayran boldı Nineviya, Ol ushın kimniń janı ashıydı eken?“ Seni jubatatuǵın hesh kim joq».

8Mısırdıń bas qalası No-Amonnan seniń qay jeriń artıq edi? Dárya boyında jaylasqan edi sol qala da, Suw menen qorshalıp, qorǵanı Nil dáryası edi, Suwlar onıń qorǵan diywalları bolǵan edi.

9Xabashstan hám Mısır onıń sheksiz kúshiniń bulaǵı edi, Put hám Liviya da onıń awqamlasları edi.

10Solay bolsa da, Tebes xalqı súrgin etilip, tutqınǵa alıp ketildi, Hár bir kósheniń basında tasqa urıp óltirildi náresteleri. Aqsúyek bekleri ushın shek taslandı, Shınjır menen kisenlendi barlıq ullı adamları.

11Háy, Nineviya, sen de más bolıp, tentireklep júreseń, Sen de dushpanlarıńnan jasırınatuǵın jer izleyseń.

12Seniń barlıq qorǵanlarıń, Ánjir aǵashınıń birinshi pisken miywesine megzer. Aǵashtı silkitkende, ánjirler jeytuǵınnıń awzına túser.

13Áskerlerińe qara! Hayal adamnan parqı joq olardıń, Dárwazalarıń dushpanlar ushın keń ashılar. Ot jaǵıp joq qıldı dárwazalarıńnıń támbilerin.

14Qamalǵa túsetuǵın waqtıń ushın suwıńdı toltır, Bekkemle qorǵanlarıńdı! Gerbish tayarlaw ushın ılaydı iyle, Quyatuǵın qáliplerińdi tayarla.

15Bári bir ot jalmap seni jutıp jiberedi, Qılısh seni qırıp taslaydı. Shegirtkeler eginlerdi jep joq qılǵanday, Dushpanlarıń seni joq qıladı. Sizler shegirtkelerdey kóbeye berińler!

16Aspandaǵı juldızlardan da kóp sawdagerleriń, Olar shegirtkeler yańlı elińdi talan-taraj eter, Keyin qanat qaǵıp ushıp keter.

17Seniń húkimdar hám xızmetkerleriń, Suwıq kúnde diywallarǵa qonatuǵın, Al quyash shıqqanda ushıp ketip, ǵayıp bolatuǵın shegirtkelerge uqsaydı.

18Háy, Assiriya patshası, el basqarıwshılarıń óldi, Aqsúyekleriń bolsa, máńgi uyqıǵa ketti, Tarap ketti xalqıń tawlarǵa. Olardı jıynaytuǵın hesh kim qalmadı.

19Jaraqatıńnıń dawası joq, jaralarıń ólimge alıp barar. Seniń awhalıńdı esitken barlıq adamlar, Shadlanıp qolların shappatlar. Óytkeni seniń sheksiz jawızlıǵıńnan azap shekpegen adam bar ma edi? Hesh kim qashıp qutıla almaǵan edi.

← Chapter 2 Jump to: