Philippians 2

Институт перевода Библии, 2022

← Chapter 1 Jump to: Chapter 3 →

1Eger sizlerde Masiyxtan kelgen jiger, súyispenshilikten payda bolǵan jubanısh, Muxaddes Ruwx penen qarım-qatnas, miyrimlilik hám rehimlilik bar bolsa,

2onda bir pikir hám súyispenshilik penen, bir ruwx hám maqset penen birlesip, meniń quwanıshımdı tolı qılıń.

3Hesh bir nárseni óz ataq-abırayıńızdı asırıw ushın yamasa maqtanshaqlıq penen islemeńler. Al hár birińiz kishipeyillik penen, basqalardı ózińizden ústin dep esaplańlar.

4Tek ózińizdiń ǵana emes, al basqalardıń da paydasın gózleńler.

5Masiyx Iysada bolǵan mına kishipeyillikke sizler de iye bolıńlar:

6Masiyx qudaylıq tábiyatqa iye bola tura, Qudayǵa teń ataqtı alıwǵa umtılıwdı Ózine minásip kórmedi.

7Al Óz ullılıǵınan waz keship, qul kelbetin qabılladı. Ol adam bolıp tuwılıp, adam kórinisinde keldi.

8Ol Ózin pás tuttı hám ólimge, hátte, atanaq aǵashtaǵı ólimge barıp, Qudayǵa boysındı.

9Sonlıqtan da, Quday Onı eń biyik mártebege eristirdi hám Oǵan barlıq atlardan joqarı turatuǵın attı berdi.

10Solay etip, Iysanıń atı atalǵanda aspandaǵılardıń, jerdegilerdiń hám jerdiń astındaǵılardıń barlıǵı dize búgip,

11Quday Ákeniń ullılanıwı ushın, hár bir til Iysa Masiyxtı Iyemiz dep ashıq moyınlaydı.

12Solay etip, súyikli tuwısqanlarım, men janıńızda bolǵanımda, sizler bárqulla Qudayǵa boysınatuǵın edińler. Al házir janıńızda joq waqtımda da burınǵıdan kóbirek boysınıp, qorqınısh hám saqlıq penen, qutqarılıwıńızdı ámelge asıra berińler.

13Sebebi Ózine unaǵan islerdi qálewińiz hám islewińiz ushın, Qudaydıń Ózi sizlerge túrtki saladı.

14Hár bir nárseni tońqıldamay hám tartıspay isleńler!

15Sonda sizler adasqan hám buzılǵan áwlad arasında Qudaydıń kemshiliksiz, taza hám minsiz balaları bolasızlar. Qudaydıń ómir beretuǵın sózlerin basqalarǵa jetkizip, dúnyadaǵı juldızlar sıyaqlı jarqıraysızlar. Solay etip, meniń jan-tánim menen qılǵan miynetim bosqa ketpey, Masiyxtıń qayta keletuǵın kúninde maqtana alaman.

17Sizlerdiń isenim boyınsha bergen qurbanlıǵıńızdı hám etken xızmetińizdi tolıqtırıw ushın, qanım ishimlik sadaqası sıyaqlı tógiletuǵın bolsa da, men quwanaman hám hámmeńizdiń quwanıshıńızdı bólisemen.

18Sol sıyaqlı, sizler de quwanıńlar hám meniń quwanıshımdı bólisińler.

19Hal-jaǵdayıńızdı bilip, meniń de kewlim jay tabıw ushın, Iyemiz Iysa qálese, Timofeydi jaqın arada sizlerge jiberiwden úmit etemen.

20Óytkeni ol sıyaqlı, shın júrekten sizlerdiń ǵamıńızdı oylaytuǵın meniń basqa adamım joq.

21Hámme Masiyx Iysanıń emes, al óz mápin oylaydı.

22Biraq Timofeydiń isenimli adam ekeni sizlerge málim. Sebebi ol ákesiniń janında xızmet etken ul sıyaqlı, Xosh Xabardıń járiyalanıwı ushın meniń qasımda xızmet etti.

23Jaǵdayımnıń qanday bolatuǵını belgili bolıwdan, onı dárriw jiberiwden úmit etemen.

24Iyemizge isenimim kámil, meniń ózim de jaqın arada barıp qalaman.

25Biraq, mútáj bolǵanımda maǵan járdem etiw ushın sizlerdiń jibergen elshińiz, tuwısqanım, sherigim hám Xosh Xabar ushın sawashtaǵı joldasım Epafroditti sizlerge qaytarıp jiberiwdi maqul kórdim.

26Óytkeni ol hámmeńizdi saǵınıp atır hám onıń awırıp qalǵanı haqqında xabar tapqanıńız sebepli, qattı uwayımladı.

27Ol haqıyqattan da, ólim tóseginde jattı. Degen menen, Quday oǵan, tek oǵan emes, al qayǵı ústine qayǵı shekpewim ushın maǵan da rehimlilik etti.

28Sonlıqtan onı jáne kórip quwanıwıńız ushın hám meniń qayǵılarım da jeńillesiwi ushın, onı qattı asıǵıslıq penen janıńızǵa jiberip atırman.

29Onı Iyemizdiń atınan úlken quwanısh penen qarsı alıńlar hám usınday adamlardı húrmet etińler.

30Sebebi sizlerdiń maǵan ete almaǵan xızmetińizdi etiw ushın, ol óz janın qáwip astına qoyıp, Masiyxtıń isi ushın bir ólimnen qaldı.

← Chapter 1 Jump to: Chapter 3 →