Ruth 1

Институт перевода Библии, 2022

Jump to: Chapter 2 →

1Izraildı biyler basqarǵan dáwirde elde asharshılıq boldı. Yahudanıń Beytlehem qalasınan bir adam hayalı hám eki ulı menen birge bir qansha waqıt jasap turıw ushın Moab eline kóship ketti.

2Ol adamnıń atı Elimelex, hayalınıń atı Naǵıyma, ullarınıń atları bolsa Maxlon hám Kilyon edi. Efratlı bolǵan bul adamlar Yahudanıń Beytlehem qalasınıń turǵınları edi. Olar Moab eline jetip kelip, sol jerde jasap qaldı.

3Aradan bir qansha waqıt ótkennen keyin, Naǵıymanıń kúyewi Elimelex qaytıs boldı. Ol eki ulı menen jesir bolıp qaldı.

4Onıń eki ulı moablı qızlarǵa úylendi: birinshi kelininiń atı Orpa, al ekinshi kelininiń atı Rut edi. Moabta jasaǵanına on jılday bolǵanda,

5Maxlon da, Kilyon da bul dúnyadan kóz jumdı. Solay etip, Naǵıyma kúyewinen hám eki ulınan ayırılıp, jalǵız qaldı.

6Moab elinde júrgen Naǵıyma: «Jaratqan Iye Óz xalqına názerin túsirip, olarǵa nan berdi», – degen gápti esitip, kelinleri menen birge óz eline qaytıwǵa bel bayladı.

7Olar jasaǵan jerin – Moab elin taslap, Yahudaǵa qaray jolǵa shıqtı.

8Jolda kiyatırıp, Naǵıyma kelinlerine: – Barıńlar, ekewińiz de tórkinińizge qaytıńlar. Sizler marhum kúyewlerińizge hám maǵan qanday jaqsılıq qılǵan bolsańız, Jaratqan Iye de sizlerge sonday jaqsılıq qaytarsın.

9Jaratqan Iye sizlerdiń hár birińizge kúyew berip, úyli-jaylı bolıp ketkeysiz! – dep, olardıń betlerinen súydi. Biraq olar zar jılasıp:

10– Yaq, bizler seniń menen birge seniń xalqıńa barajaqpız, – dedi.

11Sonda Naǵıyma kelinlerine bılay dedi: – Qızlarım, úylerińizge qaytıńlar! Meniń menen ketkenińizden ne payda? Sizlerge kúyew bolǵanday, qursaǵımda balam bar ma edi?

12Barıńlar, keynińizge qaytıńlar, qızlarım! Men endi qartaydım, kúyewge shıǵa almayman. Eger de men ele de úmit qılsam boladı, dep usı túni kúyewim menen qosılıp ullar tuwsam da,

13olar erjetkenshe sizler kútip otırar ma edińiz? Solarǵa qarap, turmısqa shıqpay júrer me edińiz? Yaq, qızlarım, Jaratqan Iye meni sonshama baxıtsızlıqlarǵa duwshar etti. Meniń qayǵı-hásiretim sizlerdikinen de kúshlirek.

14Kelinler jáne zar jılastı. Aqırı Orpa enesi menen súyisip xoshlastı. Al Rut bolsa enesinen ayırılǵısı kelmey, onıń menen birge qaldı.

15Naǵıyma Rutqa: – Mine, abısınıń óz xalqına hám óz qudayına qaytıp baratır. Sen de onıń izine erip kete ber! – dedi.

16Biraq Rut bılay dedi: – Seni taslap ketiwge meni májbúr etpe! Sen qay jerge barsań, men de sol jerge baraman, sen qay jerde bolsań, men de sol jerde bolaman. Seniń xalqıń meniń xalqım, seniń Qudayıń meniń Qudayım boladı.

17Sen qay jerde dúnyadan kóz jumsań, men de sol jerde ólip, jerlenemen. Eger de men ólimnen basqa bir sebep penen sennen ayırılsam, Jaratqan Iye meni jazalaǵan ústine jazalasın.

18Naǵıyma Ruttıń ózi menen birge ketiwge qatań qarar etkenin kórip, onı qaytıp úgitlemedi.

19Solay etip, ekewi Beytlehemge qaray júrip ketti. Olar Beytlehemge jetip kelgende, barlıq qala xalqı janlanıp ketip, hayallar: – Haw, bul Naǵıyma emes pe? – desti.

20Naǵıyma olarǵa bılay dedi: – Meni endi Naǵıyma dep emes, al Mara dep atańlar. Sebebi Qúdireti kúshli Quday meniń basıma kóp qayǵı-hásiret saldı.

21Bul jerden ketkenimde men hámmesine iye edim, biraq Jaratqan Iye meni qurı qol qaytardı. Nege meni Naǵıyma dep atap atırsızlar? Qúdireti kúshli Quday meni azap-aqıretlerge duwshar qılıp, baxıtsız etti-ǵo.

22Solay etip, Naǵıyma Moab elinen kelini bolǵan moablı Rut penen birge qayttı. Olar Beytlehemge kelgen waqıtta arpa oraǵı baslanǵan edi.

Jump to: Chapter 2 →