Romans 10

Kabyle Maybe is 2001

← Chapter 9 Jump to: Chapter 11 →

1Ay atmaten, ayen i țmenniɣ deg ul-iw, d leslak n wat Isṛail meṛṛa, acḥal i ssutreɣ di Ṛebbi ɣef ddemma-nsen iwakken ad țțuselken.

2Axaṭer zemreɣ ad cehdeɣ fell-asen belli ẓewṛen, bɣan ad ɛeǧben i Sidi Ṛebbi meɛna txuṣṣ-iten tmusni.

3Imi ur ḥsiben ara lḥeqq i d yețțasen s ɣuṛ Ṛebbi yerna țnadin ad sbedden lḥeqq-nsen iman-nsen, ur ḍuɛen ara lḥeqq i d-yețțasen s ɣuṛ Ṛebbi;

4axaṭer Lmasiḥ, d nețța i ț-țaggara n ccariɛa, i d lḥeqq n wid yumnen meṛṛa.

5Atah wayen yura Sidna Musa ɣef lḥeqq i d-ițekken si ccariɛa: Amdan ara ixedmen ayen i d-tenna ccariɛa, ad yidir yis.

6Lameɛna atah wamek ițmeslay lḥeqq i d-ițasen si liman: ur qqaṛ ara deg ul-inek anwa ara yalin ɣer igenni; amakken Lmasiḥ ur d-iṣubb ara syenna

7Neɣ anwa ara iṣubben ɣer laxeṛt? amakken ur d-yeḥyi ara Lmasiḥ si ger lmegtin.

8Acu i d teqqaṛ ihi? Awal n tudert atan ɣuṛ-ek, deg imi-k d wul-ik. Awal-agi d awal n liman, d awal i nețbecciṛ.

9Ma tcehdeḍ s yimi-k belli Sidna Ɛisa d Ssid-ik, ma tumneḍ deg wul-ik belli Sidi Ṛebbi isseḥya-t-id si ger lmegtin, atan aț-țețțuselkeḍ.

10Axaṭer ma yella tumneḍ seg wul, Sidi Ṛebbi a k-iḥseb d aḥeqqi; ma tcehdeḍ s yimi-k aț-țețțuselkeḍ.

11Akken i t-id-nnant tira iqedsen: Kra n win yumnen yis weṛǧin ad inneḥcam.

12Ihi ulac lxilaf ger wat Isṛail akk-d wid ur nelli ara n wat Isṛail; imi yiwen n Ṛebbi i gellan, ṭṭfen meṛṛa deg-s, nețța i d-yețțaken mbla ceḥḥa i wid akk ineddhen ɣuṛ-es.

13Akken yura: Kra win ara yedɛun s yisem-is ad ițțusellek.

14Amek ara dɛun ɣuṛ-es ma yella ur uminen ara yis? Amek ara amnen ma yella ur slin ara yis? Amek daɣen ara slen yis ma ulac win i sen-ihedṛen fell-as?

15Amek ara yilin wid ara d-ihedṛen fell-as ma yella ur țțuceggɛen ara? Akken yura di tira iqedsen: Acḥal yelha m'ara nwali teddun-d ɣuṛ-nneɣ wid ițbecciṛen lexbaṛ n lxiṛ.

16Lameɛna ur qbilen ara meṛṛa lexbaṛ-agi n lxiṛ. Nnbi Iceɛya yenna daɣen: A Sidi, anwa i gumnen s wayen i nberreḥ?

17S wakka liman ițțas-ed seg wayen i nsell yeɛnan awal n Lmasiḥ.

18Lameɛna ma nenna-d: ahat ur slin ara? Atah wayen yuran:?ṣut-nsen inuda ddunit meṛṛa, lehduṛ-nsen wwḍen ɣer ixfawen n ddunit.

19Nezmer a d-nini: ahat ur ẓrin ara wat Isṛail? Lameɛna d Musa i d-ixebbṛen d amezwaru s ɣuṛ Sidi Ṛebbi mi d-yenna: A wen-d-ssekkreɣ tismin ɣef win ur nelli ara d agdud; a kkun-id-yas wurrif ɣef wegdud ur nesɛi lefhama.

20Nnbi Iceɛya yessaweḍ armi genna: Ufan-iyi wid ur nennuda ara fell-i, sbeggneɣ-d iman-iw i wid ur nqelleb ara ad iyi-ssinen.

21Meɛna ɣef wat Isṛail yenna:?elqeɣ ifassen-iw ṭul n wass ɣer wegdud i yi-ixulfen, i yi-iɛuṣan.

← Chapter 9 Jump to: Chapter 11 →