1 John 5

Jinghpaw Common Language Bible © Bible Society of Myanmar, 2009

← Chapter 4 Jump to:

1Yesu gaw Meshia rai nga ai nga nna kam sham ai wa kadai rai ti mung, Karai Kasang a kashu kasha rai nga ai rai nna dai kawa hpe tsaw ra ai wa kadai rai ti mung, kasha wa hpe mung tsaw ra wu ai.

2Anhte gaw Karai Kasang hpe tsaw ra nna, shi a hkang da ai ga ni hpe hkan galaw ga yang gaw, Karai Kasang a kashu kasha ni hpe mung tsaw ra nga ga ai lam anhte chye ga ai.

3Hpa majaw nga yang, Karai Kasang a hkang da ai ga ni hpe hkan galaw ai lam gaw shi hpe tsaw ra ai lam rai nga ai. Shi a hkang da ai ga chyawm gaw, anhte a matu yak la nga ai n rai.

4Hpa majaw nga yang Karai Kasang a kashu kasha shagu gaw dai mungkan ga hpe dang kau lu nga ai. Mungkan ga hpe anhte padang dip lu ai lam gaw anhte a makam masham a majaw rai nga mali ai.

5Yesu gaw Karai Kasang a kasha rai nga ai nga nna kam sham ai wa sha n rai yang gaw mungkan ga hpe kadai wa dang kau lu na rai nga a ta?

6Yesu Hkristu gaw hka hte hkalup hkam la nna sai hkaw ai hte si hkam nhtawm du sa ai wa nan rai nga ai. Shi gaw hka hte sha du sa ai n rai, hka hte mung sai hte mung, du sa ai. Dai hku du sa ai teng nga ai hpe dai Wenyi shi nan sakse hkam nga ai, hpa majaw nga yang, dai Wenyi gaw teng man ai lam rai nga ai.

7Sakse masum nga nga ai.

8Dai ni gaw: Wenyi, hka hte sai rai nna ndai ni masum gaw maren sha bung ai hku sakse hkam ya nga ma ai.

9Anhte gaw masha a sakse hkam ai ga hpe kam chye ga ai; rai ti mung Karai Kasang a sakse hkam ai lam gaw grau nna ngang kang ai rai nna, shi gaw shi a Kasha wa a lam sakse hkam ya sai.

10Dai rai nna Karai Kasang a Kasha hpe kam sham ai wa kadai rai ti mung, ndai sakse hkam ai ga hpe shi a kraw lawang hta matsing da nga ai; rai ti mung Karai Kasang hpe n kam n sham ai wa kadai rai ti mung, Kasha a lam Karai Kasang hkam ya ai ga hpe n kam n sham ai majaw Karai Kasang hpe masu ya ai wa re ngu nna shadu wu ai.

11Dai sakse ga chyawm gaw da ndai rai nga ai; Karai Kasang gaw anhte hpe n htum n wai asak jaw mani ai rai nna, dai asak a npawt nhpang gaw Kasha wa nan rai nga ai.

12Dai Kasha hpe lu ai wa kadai rai ti mung, dai asak hpe mung lu nu ai; Kasha hpe n lu ai wa kadai rai ti mung, dai asak hpe mung n lu wu ai.

13Nanhte gaw htani htana asak lu la manit dai lam hkrak chye lu myit ga, Karai Kasang a Kasha hpe kam sham nga ai nanhte hpang de ngai ndai laika ka dat nngai.

14Karai Kasang gaw shi a myit ra ai hku hte maren anhte hpyi ai hpa hpe rai ti mung madat ya nga ai lam hkrak sha kam lu ga ai rai nna anhte shi a man de nden ja ai hte sit shang lu ga ai.

15Anhte shi kaw hpyi ai ten shagu shi madat mara ya nga ai; ndai lam teng nga ai hpe anhte chye ga ai rai nna anhte shi kaw hpyi ai lam hpe mung lu la saga ai anhte chye ga ai.

16Na a kahpu kanau wa langai ngai n si ging ai yubak langai ngai galaw nga ai hpe nang mu hkrup n yang gaw, nang gaw shi a matu mara Karai Kasang kaw akyu hpyi ya mai nga ai. Karai Kasang gaw shi hpe htani htana asak jaw na wu ai. Dai gaw si ging ai yubak mara n galaw ai ni a matu chyu sha hpyi ya na hku rai nga ai. Rai ti mung si ging ai yubak mara ngu ai nga ai rai nna, de a matu Karai Kasang kaw nang hpyi nem mai ai lam ngai n tsun nngai.

17N ding n hpring ai amu mahkra gaw; yubak rai nga ai. rai ti mung n si ging ai yubak mung nga ai.

18Karai Kasang a kashu kasha rai nga ai wa gaw yubak hpe matut nna n galaw ai hpe anhte chye ga ai, hpa majaw nga yang, shi hpe Karai Kasang a kasha e bau sin nga ai rai nna, dai n hkru ai wa gaw shi hpe n hkra lu wu ai.

19Mungkan ting gaw n hkru ai wa a up hkang ai a kata e rai nga ai, rai ti mung anhte gaw Karai Kasang hte seng ai rai nga ga ai hpe anhte chye ga ai.

20Karai Kasang a Kasha gaw du sa ra ai rai nna, teng man ai Karai Kasang hpe chye chyang lu ai myit, shi anhte hpe jaw da mi ai hpe anhte chye ga ai. Anhte gaw Kasha Yesu Hkristu hte langai sha tai nna hkrung nga ga ai majaw, teng man ai Karai Kasang hte mung langai sha tai nna hkrung nga ga ai. Dai wa gaw teng man ai Karai Kasang hte n htum n wai asak mung rai nga ai.

21Ngai shu ngai sha ni e, masu ai karai ni hpe koi gam nga mu law!

← Chapter 4 Jump to: