2 Kings 25

Jinghpaw Common Language Bible © Bible Society of Myanmar, 2009

← Chapter 24 Jump to:

1Zedekia gaw Babelon Hkawhkam Nebuhkadneza hpe gumlau wu ai; Nebuhkadneza hte shi a hpyen luksuk ni gaw Zedekia hkaw dung ai jahku ning na shata shi a nhtoi shi ya shani e, Yerusalem mare hpe htim gasat ma ai. Shanhte gaw mare shinggan e dap jung da nna mare grup grup na mare bunghku hpe wang da mu ai;

2Zedekia hkaw dung ai shi langai ning du hkra, dai mare hpe wang tawn da mu ai.

3Dai shaning a shata mali nhtoi jahku ya ngu na shani hta dai mare e hkuwa kaba wa ai majaw amyu masha ni hta sha na lusha hpa mung n nga nga ma ai,

4mare bunghku ni hpe tawk waw pru wa ma ai. Babelon masha ni gaw dai mare hpe wang shinggrup da nga ma ti mung, share shagan ai hpyenla ni yawng gaw hkawhkam wa a sun makau na bunghku lahkawng a lapran na chyinghka lam hku shana e shanhte pru nhtawm Yawdan Kadit ang ang de hprawng pru mat wa ma ai.

5Rai ti mung Babelon hpyen luksuk ni gaw Hkawhkam Zedekia hpe hkan shachyut nna Yerihko pa layang e shi hpe hkan rim la mu ai; shi a share shagan hpyenla ni yawng mung shi hpe shakram kau da ma ai.

6Zedekia gaw Hamat mung Ribla mare e nga ai Hkawhkam Nebuhkadneza hpang de woi sa wa hkrum nna, dai yang e Nebuhkadneza shi hpe daw dan wu ai.

7Zedekia yu nga yang, shi a shadang sha ni hpe sat kau ya wu ai. Dai hpang Nebuhkadneza gaw Zedekia a myi hpe achyaw malawk kau shangun nhtawm hpri sumri hte gyit nna Babelon mung de woi mat wa ma ai.

8Babelon Hkawhkam Nebuhkadneza hkaw dung ai shi jahku ning ngu na shata manga a nhtoi sanit ya shani hta, hkawhkam wa a hpaji jaw wa hte hpyen luksuk ni a hpyen du kaba rai nga ai Nebuzaradan gaw Yerusalem mare de shang wa wu ai.

9Shi gaw Yerusalem mare na Nawku Htingnu, hkawhkam htingnu ni hte Yerusalem mare hta nga ai ahkyak ai masha ni a dum nta ni yawng hpe nat kau wu ai.

10Shi a hpyenla ni mung mare bunghku ni hpe agrawp daw kau ma ai.

11Dai hpang Nebuzaradan gaw dai mare hta ngam nga ai amyu masha ni, kung kyang ai amu galaw masha ni hte Babelon masha ni hpang de rap sa wa na ni hpe Babelon mung de woi mat wa wu ai.

12Rai ti mung shi gaw matsan htum ai amyu masha ni hpe Yuda mung e shangam kau da nhtawm sut gan hpa mung n madu lu ai ni hpe dai mung na sabyi sun ni hte sun hkauna ni hta amu shang galaw na matu tawn kau da ya wu ai.

13Dai Babelon masha ni gaw magri mang shadaw ni hte Nawku Htingnu kata hta nga ai leng ni hpe mung, kaba ai magri mang angdung ni hpe mung rau agrawp mani kau nna dai magri mang ni yawng hpe Babelon mung de la mat wa ma ai.

14Shanhte gaw shingban ni hte tawn hkungri hpe jasan jaseng yang lang ai dap dagawt kau ai ban, pyengdin shadun, shagu hkungga nawng jau ai kaw na sai lapri yang lang ai ban, manam pyaw ai baw nat nawng yang lang ai jarung ni hte Nawku Htingnu kata e nawku daw jau ai shaloi lang ai kaga magri mang arung arai ni yawng hpe mung la mat wa ma ai.

15Shanhte gaw aja gumhpraw ni hte galaw da ai ban jarung ni hte grung ai wan n-ga mara lang ai ban kaji ni hte hka wan ni hpe mung la mat wa ma ai.

16Hkawhkam Shawlumon Nawku Htingnu gaw gap yang lang na matu galaw da ai shadaw lahkawng, leng ni, hte grai li nna kaba ai angdung magri mang arung arai ni rai nga ai.

17Bung ai shadaw lahkawng hta, langai hte langai gaw tsaw de pe 27 hpra tsaw nna dai shadaw yan a ntsa na magri mang bandung gaw pe 4 chyen rai nga ai; de a grup grup mahkra hta hkainu si nampan ni hte mahkri shawn maka ka shatsawm da nga ai. Dai ni yawng hpe mung magri mang hte galaw da nga ai.

18Dai hta n-ga, hpyen du kaba Nebuzaradan gaw Hkinjawng Agyi Kaba Seraia hpe mung, shi hta lawu grit re ai hkinjawng Zehpania hte kaga ahkyak ai Nawku Htingnu salang masum hpe woi mat wa wu ai.

19Hpyen hpung ni hpe woi awn ai hpyen du wa hpe mung, dai mare hta naw ngam nga ai hkawhkam wa kam lu ai hpaji jaw salang marai manga hpe mung, hpyen du wa a ningtau rai nga ai hpyen rung jahpan jum agyi wa hte kaga ahkyak ai masha marai kru shi ni hpe mung dai mare kaw nna shi woi mat wa wu ai.

20Nebuzaradan gaw dai masha ni hpe Babelon hkawhkam wa nga ai Hamat mung Ribla mare de woi wa wu ai.

21Hkawhkam wa gaw dai shara e shanhte yawng hpe adup ai hte sat kau wu ai. Yuda amyu masha ni gaw shanhte a mungdan de woi la kau ai hkrum nga ma ai.

22Babelon Hkawhkam Nebuhkadneza gaw Shahpan a kashu, Ahikam a kasha Gedalia hpe Yuda mung du shatai nhtawm, Babelon mung de woi la n hkrum ai ni yawng hpe woi hpareng na matu shi hpe san tawn da wu ai.

23Yuda du salang ni hte asum garai n jaw ai hpyenla ni gaw dai shiga hpe na ai shaloi, shanhte gaw Mizpa mare e nga ai Gedalia hpang de sa zup ma ai. Dai du salang ni gaw Nehtania a kasha Ishmaela, Karea a kasha Yohanan, Netohpa mare na Tanhumet a kasha Seraia hte Mahka mare na Yezania hte rai ma ai.

24Gedalia gaw shanhte hpe, “Babelon du salang ni hpe nanhte n hkrit tsang ra na re ai lam ngai nanhte hpe tsun dan made ga. Ndai mung e nga nga nhtawm Babelon hkawhkam hpe daw jau mu; shaloi nanhte yawng ngwi pyaw lu na rai myit dai,” ngu nna tsun wu ai.

25Rai ti mung shata sanit ngu na dai shaning hta Nehtania a kasha Ishmaela mung, hkawhkam dinghku na Elishama a kashu hte gaw kaga marai shi hte rau Mizpa mare de sa nna Gedalia hpe sa sat kau mu ai. Shi gaw dai yang e shi hte rau nga ai Babelon masha ni hte Israela masha ni hpe sat kau wu ai.

26Shanhte gaw Babelon masha ni hpe hkrit nga ma ai majaw Israela masha ni yawng ngu na sut su ai ni hte matsan mayan masha ni n nga, luksuk du salang ni hte rau Egutu mung de pru mat wa ma ai.

27Babelon Hkawhkam Ewila-merodak hkawhkam tai wa ai shaning hta, shi gaw Yuda Hkawhkam Yehoiahkin hpe htawng e sharen da ai kaw na shalawt dat let matsan dum ai myit madun dan wu ai. Dai gaw Yehoiahkin a bawng dung ai sumshi sanit ning a shata shi lahkawng a hkun sanit ya shani e byin ai lam rai nga ai.

28Ewila-merodak gaw shi hpe matsan dum la wu ai rai nna shi hte rau Babelon mung de bawng dung hkrum nga ai kaga hkawhkam ni hpe shi jaw ya ai hta grau galu kaba ai arawng aya hte shi hpe shagrau sha-a wu ai.

29Dai rai nna Yehoiahkin gaw shi a htawng hpun palawng ni hpe galai kau nna shi a prat dingsa hkawhkam a sha ku e sha lu na ahkang lu nga ai.

30Shi hkrung nga dingsa ra mara a matu shani shagu na jarit gumhpraw jaw ya ai mung hkrum wu ai.

← Chapter 24 Jump to: