Acts 27

Jinghpaw Common Language Bible © Bible Society of Myanmar, 2009

← Chapter 26 Jump to: Chapter 28 →

1Hpestu gaw anhte hpe Itali mung de sa dat na myit daw dan ngut jang, Pawlu hte kaga bawng nkau mi hpe Hkawseng wa a hpyen ma latsa rawng ai dap up ai Yuli ngu ai du wa a lata hta ap dat mi ai.

2Shaloi anhte gaw Asi mung a Nammukdara hkin-gau hkan na mare ni de pru sa wa hkyen nga ai Adramuti mare nna du sa ai sanghpaw li hta shang jawn nna rawt sa mat wa ga ai. Dai sanghpaw hta Htesaloni mare na Makedoni mung masha Aristarku mung anhte hte rau lawm nga ai.

3Hpang shani e anhte Sidon mare de du ga ai, Yuli gaw Pawlu hpe matsan dum nna shi a jinghku ni kaw sa jahkrum na hte shi hta ra kadawn ai lam ni jaw ya, galaw da na ahkang jaw mu ai.

4Anhte dai kaw na pru jang, nbung n sun ai majaw Kupru zunlawng hpe shinggrup nna garet sa wa ga ai.

5Dai hpang Kiliki mung hte Pamhpuli mung na panglai hpe rap di sa wa yang Luki mung na Mura mare de du ga ai.

6Dai shara e hpyen du wa gaw, Itali mung de rap sa wa hkyen nga ai Alexandru mare na sanghpaw li mu hkrup nna, dai hta e anhte hpe shashawn mi ai.

7Dai kaw nna anhte gaw, nhtoi law law wa, yat yat sa wa yang Kidu mare makau ang de yak hkak kaba hkrum let du ga ai. Nbung n sun ai majaw shawng de n shanang sa wa lu nna Kreti zunlawng hpe shinggrup let, Salmone ginchyum ang hku lai wa ga ai.

8Hkin-gau hte jahtep na yak la ai hte garet hkawm wa yang, Lasea mare hte nau n tsan ai shim ai daru kaja ngu ai shara de du ga ai.

9Anhte gaw dai shara kaw nhtoi tsawmra na hkra hkring nga ai rai nna lusha gam aten ngu ai htingrai htingrat poi aten pyi lai mat sai. Panglai hta li hte hkrun lam matut hkawm na hkrit tsang ra ai shata du ra ai.

10Pawlu gaw, “Hkau hte e, anhte ndai shara kaw nna panglai hkrun lam hkawm na ga yang, grai hkrit tsang shara nga na rai nna sanghpaw li hte gun rai ni hten za lam kaba hkrum na ra ai hta n ga, anhte a asak pyi sum na lam ngai mu nngai,” ngu nna shanhte hpyi tsun shadum wu ai.

11Rai ti mung hpyen du wa gaw Pawlu a ga hta li hkang ai wa a ga hte sanghpaw li madu tsun ai ga hpe mahtang grau nna kam mat wu ai.

12Dai daru hta nshung ta lai hkra hkring nga na n hkrak ai shara langai mi rai nga ai majaw dai kaw na pru nhtawm Hponik daru du lu yang du hkra sa nna, dai yang e nshung ta tawt hkra hkring nga na masha law malawng myit hkrum ma ai. Dai Hponik daru gaw Kreti zunlawng kaw na rai nna sinna dingda hte sinna dingdung de man yawng ai daru rai nga ai.

13Dai rai nna dingda nbung angwi sha bung wa jang sanghpaw la ni gaw, shanhte myit ai lam awng dang sai zawn nawn nna, hpri chyinghkyi dawm la nhtawm, Kreti zunlawng makau hku jahtep lu ai daram jahtep nna garet sa wa ma ai.

14Rai ti mung gade nna yang, sinpraw dingdung nbung laru gaw dai zunlawng de nna ru wa ai.

15Dai nbung laru sanghpaw li hpe adawt ai majaw nbung hpe n shadaw lu jang anhte dat dat nna, nbung e woi ai de yawng nang ga ai.

16Kawda ngu ai zunlawng kaji a dingda maga de du ai shaloi nbung laru kaw na loi mi makawp maga shingbyi la lu ga ai. Dai shara kaw sanghpaw li a shingdu na sak hkye li n hten mat hkra tsam mari shakut ga ai.

17Sanghpaw la ni dai li hpe garawt mara la nhtawm sumri hte sanghpaw kan hpe bat nna ngang hkra li hpe hkang shakap da ma ai. Bai shanhte gaw Libya hkin-gau na Surti ngu ai zaibru jang hta sanghpaw li mara mat na tsang ai majaw de a sumpan ni hpe shayu kau nna nbung yawng ai maga de tsawt nang ga ai.

18Hpang shani mung nbung laru matut nna ja nga ai majaw li hta na hpaga rai nkau mi hpe hka de htawm jahkrat bang kau mu ai.

19Masum ya ngu na shani sanghpaw li hte seng ai arung arai daw chyen mi hpe htawm jahkrat kau mu ai.

20Law law ya wa jan n mu, shagan ni mung n dan pru ai hte ja la ai laru sha aru nga ai majaw hpang jahtum e anhte lawt lu na myit mada shara yawng htum mat ma sali ai.

21Ya shanhte shat n sha ai tsawmra ya wa na wa ai hpang Pawlu gaw shanhte a ka-ang e rawt tsap let, “Hkau hte e, nanhte nye a ga madat nna Kreti zunlawng na n pru myit taw gaw ning re ai hten bya ai hte sum hkrum ai lam hpe koi yen lu na ga ai.

22Ya rai ti mung. ngai nanhte hpe hpyi nem made ga, myit shalan mu, nanhte hta na kadai mung asak sum na myit dai n rai, sanghpaw li sha sum hkrum na marin dai.

23Hpa majaw nga yang ngai hpe up ai, ngai nawku daw jau ai Karai Kasang a lamu kasa langai mi mana e nye a makau e sa tsap nna,

24‘Pawlu e, hkum hkrit e! Hkawseng Kehta a man e nang tsap lu na rin dai; Karai Kasang gaw nang hpe matsan dum nga ai rai nna, nang hte rau ndai sanghpaw li hta jawn ai ni yawng a asak sum shangun na ra ai n rai,’ nga nna ngai hpe tsun sai.

25Dai re ai majaw hkau hte e, hkum tsang myit, ngai hpe tsun dan ai hte maren rai na ra ai ngu nna ngai Karai Kasang hpe kam sham nga nngai.

26Rai ti mung anhte a sanghpaw li gaw zunlawng langai hta mara mat na ra ai ngu nna shanhte hpe shalan mu ai.

27Ya nhtoi shi mali ya du ai shana, anhte a sanghpaw li gaw Ka-ang Panglai hta, nbung laru yawng ai maga de yawng tsawt kayin hkawm nga yang yup tung hpawa e, sanghpaw la ni gaw hkarang kawng langai ngai de ni wa sam nga ai nga nna myit ma ai.

28Dai rai nna shanhte hka shadawn yu yang lalam hkun sung nga ai hpe chye lu ma ai, bai loi hkring mi rai jang bai shadawn yu yang lalam shi manga sha sung sai hpe mu ma ai.

29Dai re ai majaw, lunghkrung hte ahtu hkrup na hpe tsang ai rai nna, shanhte a li mai de na hpri chying hkyi mali jahkrat nhtawm, nhtoi htoi u ga ngu nna, ala nga ma ai.

30Dai hpang sanghpaw la ni gaw sanghpaw baw na hpri chyinghkyi nkau mi jahkrat na zawn di masu nhtawm asak hkye li jahkrat nna rawt hprawng na maw nga ma ai.

31Pawlu mahtang hpyen du wa hte hpyen la ni hpe, “Dai sanghpaw la ni sanghpaw ntsa e n nga sa yang gaw nanhte nan asak lawt lu na, myit mada shara nga sana n rai,” ngu mu ai.

32Shaloi hpyen la ni gaw li kaji dun ai sumri ni hpe sa dan di kau nna, li kaji hpe jahka kau ya mu ai.

33Ya nhtoi htoi wa mahka e, Pawlu gaw shanhte mahkra hpe lusha sha na tsun shadut mayu wu ai rai nna nanhte kaning rai byin na lam hpe ala nga let, lusha hpa mung n sha ai nga ai gaw dai ni, shi mali ya na wa manit dai.

34Dai re ai majaw, lusha lama ma sha mu, dai gaw nanhte hkrung nga na matu ra ahkyak ai lam rai nga ai. Nanhte a kara singgawng langai mi pyi sum hkrum na n rai, ngu nna shalan wu ai.

35Shing nga tsun ngut jang, Pawlu gaw muk nkau mi hpe la nna shanhte mahkra a man e Karai Kasang a chyeju hpe shakawn let, ahkyep alep nhtawm woi sha mu ai.

36Shaloi she nlang hte myit pyaw nna lu sha sha shajang ma ai.

37Dai li ntsa e anhte yawng marai lahkawng tsa sanit shi kru rai nga ga ai.

38Masha shagu hkru hkra sha ngut jang shanhte hkaulan n-gu ni hpe hka de kabai bang kau ai hte sanghpaw li hpe shatsang mu ai.

39Nhtoi htoi jang, sanghpaw la ni gaw, shanhte kanang yang du taw nga ai hpe n chye sawn la ti mung, panglai hpung gaw zaibru jang langai mi hpe mu mada nna, byin mai yang dai zaibru jang ntsa de sanghpaw li hpe gawt mara na myit daw dan ma ai.

40Dai rai nna shanhte hpri chyinghkyi ni hpe dan di nna panglai hta jahkrat kau da mu ai, bai li hkang ai lasham sumri ni hpe mung raw nna sanghpaw li baw de na sumpan sharawt shachyen nhtawm dai zaibru jang de hkang wa ma ai.

41Rai ti mung sanghpaw li gaw hka tang ai shara de du nna zaibru jang hkin-gau hta wa ahtu nhtawm mara chyat mat ai; sanghpaw li baw daw zaibru jang hta jung mat nna n shamu lu ai hte mai daw hpe ja la ai hkaleng kayat ai majaw achyen chyen rai hten agrawp mat wa ai.

42Shaloi hpyen ma ni gaw bawng ni hpungyawt rap nna hprawng lawt na hpe tsang ma ai majaw dai hpe makawp maga na matu shanhte hpe sat kau na hkyen nga ma ai.

43Rai ti mung, dap up du wa gaw, Pawlu hpe hkye la mayu nna hpyen la ni maw ai hpe hkum kau nhtawm, shing rai na malai hka hpungyawt chye ai ni yawng sanghpaw ntsa na shawng gumhtawn hkrat nna hkarang de kaw pru wa na hkang da mu ai.

44Dai hpang ngam ai ni hpe hpun pyen pa ni shing n rai sanghpaw hten mat ai achyen achya ni hta noi nna rap wa na hkang da mu ai. Shing rai anhte nlang hkarang de kaw nna ashim sha lawt lu ga ai.

← Chapter 26 Jump to: Chapter 28 →